HNUB TIM 14 LUB 11 HLIS; HNUB TSIB LUB LIS PIAM 32 CAIJ NYOB NRUAB XYOO
COV LUS NYOB HAUV LUS KAS NTAWV MOO ZOO (LK 17: 20-25)
Kwv tij Hmoob sawv daws, Tswv Ntuj lub Ceeb Tsheej yuav los txog thaum twg?
Cov Fas Lis Xais pom tias Huab Tais Yes Xus tuaj tshaj txog Tswv Ntuj lub Ceeb Tsheej, ces lawv thiaj nug Huab Tais Yes Xus raws li lo lus saum no. nyob hauv peb coob leej mas ntshai peb kuj yuav xav twj yam hauv nruab siab licov Fas Lis Xais; Tswv Ntuj lub Ceeb Tsheej yuav los txog thaum twg? Puas yog thaum kuv tseem muaj txoj sia nyob? Los puas yuav yog tom qab kuv tuag lawm?
Huab Tais Yes Xus hais tias “Tswv Ntuj lub Ceeb Tsheej yog ib yam uas neeg qhov muag tsom tsis tau.”
Tos Huab Tais Yes Xus hais li, vim tias tas sawv daws tsuas xav tias Tswv Ntuj lub Ceeb Tsheej mas yog zoo li ntiaj teb lub Ceeb Tsheej, xws li thaud lawv muaj lub teb chaws His Xas Lais ua lawv lub ceeb tsheej, muaj Das Vis ua lawv tus vaj. Los Tswv Ntuj lub Ceeb Tsheej zoo li lub Tuam Teb Los Mas, muaj tus vaj Xes Ntxas, muajcov vaj txheeb, lwm txheeb, xab txheeb, muaj nom muaj tswv kav tas txhua tham tsam hauv lub ceeb tsheej. Cov Yus Das xav li ntawd, mas lawv thiaj tos tus Pleev yuav tuaj tsa lub teb chaws His Xas Lais tshiab uas yuav yog Tswv Ntuj lub Ceeb Tsheej. Lawv yuam kev li ntawd, mas lawv thiaj mem tsis tau tias Huab Tais Yes Xus yog tus Pleev raws li Ntawv xub sau txog.
Yog li mas Tswv Ntuj lub Ceeb Tsheej thiaj tsis yog ib lub ceeb tsheej neeg qhov muag pom tau. Tswv Ntuj lub Ceeb Tsheej yog ‘Tswv Ntuj los nyob hauv neeg nruab siab’ ib yam li thaum Huab Tais Yes Xus nyob nruab nrab hauv cov His Xas Lais. Huab Tais Yes Xus thiaj hais rau lawv tias “Tswv Ntuj lub Ceeb Tsheej nyob nruab nrab hauv nej.”
Kwv tij Hmoob, Tswv Ntuj lub Ceeb Tsheej zoo li cas? Tej zaum nej sawv daws yeej xav paub.
Huab Tais Yes Xus hais ntau zaus txog Tswv Ntuj lub Ceeb Tsheej, hnub no peb yuav muab hais li no:
Tswv Ntuj lub Ceeb Tsheej nyob hauv tus neeg muaj siab ncaj, Tswv Ntuj lub Ceeb Tsheej nyob hauv tus neeg tsim kev thaj yeeb, Tswv Ntuj lub Ceeb Tsheej nyob hauv tus neeg muaj lub siab xyiv fab.
Li ntawd, thaum twg peb muaj ib lub siab ncaj rau lwm yam los lwm tus, thaum twg peb tsim kev thaj yeeb sib haum xeeb nrog lwm tus, thaum twg peb muaj klub siab xyiv fab zoo siab luag ntxhi; mas thaum ntawd peb tau saj Tswv Ntuj lub Ceeb Tsheej, peb saib zoo li nyob hauv peb tus plig mas tsuas muaj kev nyob kaj lug.
Kwv tij Hmoob, Tswv Ntuj lub Ceeb Tsheej tuaj txog peb yog thaum peb ua raws li 3 yam hais los no tiag.
Muaj lub siab ncaj, tsim kev thaj yeeb, ua siab xyiv fab hom khaj.
