ZAJ NYEEM HNUB TIM 16 LUB 7 HLI 2025
NIAM MAB LIAB NYOB SAUMROOB NKAS MES
COV LUS NYOB HAUV MAS TAIS NTAWV MOO ZOO (MT 11: 25-27)
Cov kwv tij, nej hnov Huab Tais Yes Xus hais tias ‘Txiv, koj zais tej yam ntawd rau cov neeg thoob tsib thiab cov neeg ntse, koj qhib rau cov me nyuam yaus.”
Huab Tais Tswv Ntuj zais dab tsi?
Yog zais txoj kev paub txog Huab Tais Tswv Ntuj.
Cov kwv tij, peb muab ua tib zoo xav mas yuav pom li Huab Tais Yes Xus hais. Cov neeg lawv khav tias lawv ntse txaus lawm, lawv hais tias lawv muaj tswv yim thoob tsib to nrog mas lawv tsis kam ntseeg tias muaj Tswv Ntuj. Muaj tej tus lawv nyeem, lawv tshawb thiab nrhiav txog Huab Tais Yes Xus lub neej, tab sis lawv tsis paub Huab Tais Yes Xus.
Tsis zoo li cov neeg lees tias lawv yog neeg me, lawv tsis muab hlob. Cov neeg me lawv xav paub Huab Tais Yes Xus, lawv xav txais kev cawm ntawm Huab Tais Yes Xus, mas lawv ntseeg tias muaj Tswv Ntuj tiag.
Cov neeg txawj ntse hais tias cov neeg me ntseeg tias muaj Tswv Ntuj mas yog lawv vwm, yog lawv qaug qav. Tab sis qhov tseeb yog vim lawv tsis xav kom muaj dua lwm tus thoob tsib dua lawv, loj dua lawv. Lawv rov dag lawv.
Kwv tij, tus nyiam ua neeg me xwb nws thiaj yuav qhib siab paub tau Huab Tais Yes Xus, thiab ntseeg tau tias muaj Tswv Ntuj tiag. Niaj hnub, peb thiaj yuav thov Ntuj tas zog kom peb nyiam ua neeg me, kom peb txhob ua neeg khav theeb tsis kam txais Huab Tais Tswv Ntuj.
Huab Tais Yes Xus yog tus piv txwv qhia txog tus neeg me tsis muab hlob zoo tshaj plaws rau peb.
Huab Tais Yes Xus yog Tswv Ntuj, tab sis nws txo lub hwj chim Tswv Ntuj, ces nws nqes los txais lub cev neeg xws li peb kom tau nyob nruab nrab hauv peb. Huab Tais Yes Xus nrog ntiaj teb neeg koom txais kev txom nyem, koom nrog sawv daws ua tib lub neej, thiab tseem txaus siab tuag saum Ntoo Cuam kom tau txhiv ntiaj teb neeg.
Thaum ntawd, cov Yus Das thiab cov tub rog Los Mas ntsia Huab Tais Yes Xus dai saum Ntoo Cuam. Lawv tsis pom Huab Tais Tswv Ntuj kev nyiam lawv nyob hauv Huab Tais Yes Xus. Tab sis muaj cov poj niam, cov neeg me lawv ntsia pom.
Kwv tij, nyob hauv peb cov tsev teev Ntuj muaj tus Ntoo Cuam loj loj. Nyob ntawm tus Ntoo Cuam muaj Huab Tais Yes Xus raug ntsia rau. Ntawm Huab Tais Yes Xus phab tav, muaj ib lub qhov hmuv, cov ntshav ntws tawm los. Thaum nej chaws mus hauv, nej ntsia pom nej puas xav txog Tswv Ntuj lub siab nyiam nej; los nej ntsia zoo li ib tug mlom tsis muaj dab tsi deev nej siab.
Hnub no, nej hnov cov lus no lawm, peb xav kom nej ua tus neeg me ntsia Huab Tais Yes Xus raug ntsia saum Ntoo Cuam, nws ris kev mob kev ntsaj, nws tsa muag ntsia saum ntuj thiab thov Huab Tais Leej Txiv kom zam rau nej. Nej yuav pom Huab Tais Tswv Ntuj txoj kev nyiam nej thiab hlub nej. Nej kua muag yuav ntws tawm los, nej yuav nco Huab Tais Yes Xus lub txiaj ntsim cawm nej, ces nej yuav ntseeg kho ntseeg ruaj txog tus Tswv Ntuj hlub nej.
Cov kwv tij, nej tseem yuav thov Ntuj rau cov neeg muab hlob, cov tsis kam qhib siab mloog Huab Tais Yes Xus, cov tsis kam lees tias muaj Tswv Ntuj. Thov Huab Tais Tswv Ntuj qhib lawv lub siab lub tswv yim kom lawv pom qhov zais ntshis hauv Tswv Ntuj, kom lawv hloov tau lub siab tshiab los ntseeg txog Tswv Ntuj.
