ZAJ NYEEM HNUB TIM 17 LUB 1 HLIS 2025
HNUB NCO TXOG LEEJ NTSHIAB AS NTHOS NYUS
HN 4: 1-5, 11; MK 2: 1-12
Kwv tij Hmoob zoo nyiam, muaj ib hnub Huab Tais Yes Xus nyob hauv lub nroog Kas Fas Naus ze ntawm lub pas dej Nkas Lis Lais. Muaj cov neeg coob coob tuaj mloog Huab Tais Yes Xus ntom nti. Pom muaj 4 tug neeg kwv ib tug tuag ceg pw saum lub txaj tuaj, lawv txiv kom tau mus cuag Huab Tais Yes Xus tab sis vim neeg coob dhau, mas lawv ua ib siab kwv tus tuag mus saum lub ruv tsev. Lawv muab lub ruv yaws ces lawv ua hlab ntaub cev tus tuag ceg los cuag Huab Tais Yes Xus.
Lawv ua cuag ntawd vim lawv tso siab tias Huab Tais Yes Xus cawm tau lawv tus neeg, lawv lub siab kuj ntseeg li ntawd thiab. Ntawm tus tuag ceg, mas nws kuj ntseeg txog Yes Xus ib yam li cov neeg kwv nws tuaj.
Lawv ntseeg thiab tso siab mas lawv thiaj ua tiag kom tau kev cev tus tuag ceg mus kom txog Huab Tais Yes Xus.
Lawv ntseeg thiab lawv ua hauj lwm kom pom tias lawv ntseeg!
Ces Huab Tais Yes Xus hais tias “Koj cov txhaum daws tas lawm.”
Peb hnov tus Leej Choj hais cov lus no thaum peb mus txais lub Cim Daws Txhawm. Tus Leej Choj sawv Huab Tais Yes Xus chaw daws txhaum rau peb nyob hauv Huab Tais Yes Xus lub siab hlub neeg. Peb txhua tus kuj yuav zam txim rau tus tau ua txhaum rau peb vim peb nyiam thiab hlub nws. Yog peb tsis zam rau tus ua txhaum rau peb mas hais tau tias txoj kev nyiam tsis nyob hauv peb; txhais tias peb tsis muaj Tswv Ntuj nrog peb nyob vim Tswv Ntuj yog kev nyiam.
Thaum Huab Tais Yes Xus hais rau tus tuag ceg tias “Koj cov txhaum daws tas lawm” mas cov Kws Ntawv Ntshiab xav twj ywm tias Huab Tais Yes Xus tab tom thuam Tswv Ntuj vim tib neeg yuav daws txhaum rau luag tsis tau, kawg Tswv Ntuj xwb thiaj daws tau neeg cov txhaum. Huab Tais Yes Xus yeej paub tias lawv yuav xav li no, mas nyob hauv hnub no Huab Tais Yes Xus thiaj txhob txwm hais rau tus tuag ceg tias “Koj cov txhaum daws tas lawm”, tsis hais li niaj zaus nws kho cov neeg mob tias “Koj lub siab ntseeg cawm koj lawm” los hais tias “Koj rov zoo, rov huv tuaj mas.”
Kwv tij, Huab Tais Yes Xus hais tias nws txoj sia yog tus nqe txhiv lub qab ntuj neeg; yog cov ntshav cog lus tshiab. Huab Tais Yes Xus tuag thiab sawv rov los mas nws thiaj npo tau sawv daws kom dim hauv kev txhaum. Li ntawd, niaj hnub no tus ntseeg txog Yes Xus yog nws thov txais lub Cim Daws Txhaum, mas peb thiaj ntseeg tias Huab Tais Yes Xus daws nws cov txhaum lawm tiag; Huab Tais Yes Xus hais rau cov thwj tim tias “Nej khi yam twg nyob ntiaj teb no mas Ntuj yuav saib yam ntawd yog khi nyob saum ntuj; nej daws yam twg nyob ntiaj teb no mas Ntuj kuj yuav saib yam ntawd yog daws nyob saum ntuj.”
Huab Tais Yes Xus hlub peb tshaj mas nws thiaj pub lub hwj chim daws txhaum no rau cov thwj tim kom pab tau cov neeg ntseeg txog Yes Xus txhua tus kom lawv tau txais lub txiaj ntsim cawm neeg. Peb tsoom ntseeg sawv daws thiaj yuav kub siab txais lub Cim Daws Txhaum thaum peb hnov zoo li nyob hauv peb tus plig tab tom muaj mob, tab tom poob rau kev phem kev tsis zoo. Thaum ntawd, peb yuav ua tiag nrhiav Huab Tais Yes Xus kom tau daws peb cov txhaum, ces Huab Tais Yes Xus yuav siv tus Leej Choj lub ncauj los hais lus rau peb tias “Koj cov txhaum daws tas lawm. Koj sawv, koj kwv koj lub txaj. Koj rov mus tsev.”
