ZAJ NYEEM HNUB TIM 17 LUB 9 HLI 2025
HNUB NCO TXOG LEEJ NTSHIAB NPES LAS MIS NOS
COV LUS NYOB HAUV LUS KAS NTAWV MOO ZOO (LK 7: 31-38)
Kwv tij sawv daws, nyob rau hauv zaj no, qhia txog peb neeg ntiaj teb sawv daws lub siab xav, yog vim sawv daws mob siab rau kev khwv noj khwv haus ntau dua. Ces ua rau neeg tsis quav ntsej los mloog Tswv Ntuj lub suab hu, neeg tsis paub txog Tswv Ntuj txoj kev hlub.
Peb yuav lees tias niaj hnub no, peb yeej ntshaw txoj kev sib hlub, Hmoob xav kom Hmoob txawj sib hlub, tiam sis, txog qhov kawg, nyias ua tsis tau raws li qhov xav, nyias nyiam ua raws nyiam lub siab ntau dua, ces nyias ua ywj nyias siab. Nyias mob siab rau nyias tus kheej, thiab kev nrhiav noj hauv nyias lub cuab lub yig, nyias ua los txawm nyias tus kheej, vim li ntawd, thiaj muaj kev sib khib, thaum yus pom luag zoo dua yus, mas yus khib luag.
Thaum yus ua lub neej muaj, ces yus hais lus saib tsis taus cov pluag dua yus.
Ces thiaj muaj kev sib ntxub ntxaug, yog li ntawd, peb yuav ua cas sib hlub tau?
Yog thaum Tswv Ntuj foom koob hmoov rau peb, kom peb khwv tau noj tau haus, tiam sis, peb tsis txawj sib hlub, ces yeej tsis muaj txiaj ntsim dab tsi. Peb yuav xub nrhiav Tswv Ntuj lub txiaj ntsim ua ntej, peb nrhiav Tswv Ntuj txoj kev hlub, peb muab nws txoj kev nyiam kev hlub tso rau hauv peb lub siab, ces peb lub siab yuav tsis muaj khib, peb yuav tsis hais lus thuam luag lwm tus, thiab peb yuav zoo siab pab luag lwm tus. Peb txawj sib zam, mas thiaj li muaj kev sib hlub tiag tiag. Ces peb sawv daws thiaj yuav ua lub neej nyob thaj yeeb nyab xeeb.
Hnub no Huab Tais Yes Xus uas nws yog tus Tswv hauv txoj kev hlub, nws coj txoj kev hlub tiag tuaj rau peb, kom peb txawj sib nyiam sib hlub, thiab sib zam. Li ntawd, thov kom peb kub siab los mloog Huab Tais cov lus, thiab coj mus ua nyob rau hauv peb lub neej, ces peb thiaj yuav ua lub neej nyob kaj siab nrig.
Nyob zoo sawv daws.
