ZAJ NYEEM HNUB TIM 18 LUB 6 HLI 2026
HNUB TSIB, LIS PIAM 11 CAIJ NYOB RUAB XYOO
COV LUS NYOB HAUV MAS TAIS NTAWV MOO ZOO (MT 6: 7-15)
Kwv tij Hmoob sawv daws, zaj Ntawv Moo Zoo hnub no mas yog Huab Tais Yes Xus qhia cov thwj tim thov Ntuj raws li zaj niaj hnub no peb hais tias ‘Peb Txiv nyob saum ntuj’. Ua ntej yuav qhia cov thwj tim thov Ntuj, Huab Tais Yes Xus ntuas lawv ua ntej tias kom lawv tsis txhob ntuas mus ntuas los, los yog hais lus ntau lus ntev. Txhob xav tias yus hais ntau, mas Tswv Ntuj thiaj li mloog, txhob xav li ntawd, tsis muaj qab hau dab tsi.
Pom muaj ib txhia, kuv thov Ntuj tas, koj ho sawv los thov Ntuj, koj thov tas, tus tod ho sawv los thov. Tab sis lawv cov lus lub ntsiab puav leej yog hais mus zoo tib yam. Muab xav saib qhov no puas haum rau Huab Tais Yes Xus cov lus qhia.
Huab Tais Yes Xus xav kom peb thooj siab koom ib lub ntsws los thov nws, Huab Tais Yes Xus thiaj li hais tias “Yog muaj ob leeg hauv nej koom suab thov dab tsi nyob ntiaj teb no, mas kuv Txiv nyob saum ntuj yuav pub yam ntawd rau nkawd.”
Thov Ntuj tsis yog kev yuam Tswv Ntuj kom mloog yus, los yog tiam dab tsi rau Tswv Ntuj. Thov Ntuj yog cav lus zoo txog Tswv Ntuj, yog thov kom Tswv Ntuj pab peb ua tau raws li Tswv Ntuj pom zoo, yog ua xis Tswv Ntuj siab.
Muaj ntau yam Tswv Ntuj xav kom peb ua, tab sis nyob hauv hnub no yog lo lus tias “Yog nej zam rau cov neeg ua txhaum rau nej, mas nej Txiv nyob saum ntuj kuj yuav zam rau nej thiab.” Li ntawd, niaj hnub ua ntej yuav thov Ntuj, tsim nyog peb yuav xub xav saib hnub no peb puas tau zam rau tus ua tsis zoo rau peb tso, mas peb mam thov Ntuj ua ke.
Nyob zoo sawv daws.
