ZAJ NYEEM HNUB TIM 19 LUB 11 HLIS 2025
HNUB PLAUB, LIS PIAM 33 CAIJ NYOB NRUAB XYOO
COV LUS NYOB HAUV LUS KAS NTAWV MOO ZOO (LK 19: 11-28)
Kwv tij sawv daws, nyob rau hauv zaj no, yog Huab Tais Yes Xus hais ib zaj paj lug qhia peb sawv daws. Yog thaum peb mloog tas peb coj los ua tib zoo xav, mas peb yuav to taub tias, kaum leej tub txib uas tus vaj hu tuaj ntawd, yog piv txwv txog cov neeg ntseeg Ntuj sawv daws. Hos kaum choj nyiaj uas tus vaj muab rau lawv coj mus nqes peev, yog zoo li Tswv Ntuj cov lus. Hos tus Vaj ces yog Huab Tais Yes Xus ntag.
Yog peb muab xav li no peb yuav pom hais tias tus vaj rov mus txais nws lub hwj chim ua vaj lawm, thiab muaj ib hnub nws yuav rov los txiav txim rau cov tub txib. Li ntawd, hnub kawg Huab Tais Yes Xus yuav rov los txiav txim rau peb sawv daws tib yam nkaus thiab.
Cov uas txawj coj Tswv Ntuj lo lus mus ua peev hauv nws lub neej kom tawg paj txiv txiv kaum npaug tej tus ntxeev tau 5 npaug. Thaum Huab Tais rov los, ces nws yuav muab paj tshab pauj rau lawv kom txaus lawv txoj kev ua zoo.
Hos cov uas nws muab qhwv twj ywm khaw cia xwb. Zoo yam li cov neeg uas tau hnov Tswv Ntuj cov lus qhia, tiam sis, nws tsis coj mus siv nyob rau hauv nws lub neej, thiab nws tsis coj mus qhia rau luag lwm tus, ces nws lub neej nyob qhov qub xwb. Cov no thaum tus Tswv rov los, tus Tswv yuav muab txhua yam uas nws muaj khaws rov qab thiab muab txhab ntxiv rau tus uas txawj ua hauj lwm zoo. Huab Tais Yes Xus hais tias tus uas muaj lawm luag yuav txhab ntxiv rau, hos tus uas tsis muaj, luag tseem yuav muab qhov uas nws muaj tshem mus thiab.
Kwv tij sawv daws, Huab Tais Yes Xus muab txoj kev zoo rau peb coj, thiab nws qhib qhov rooj tos peb sav daws txhua leej txhua tus lawm. Thov kom peb taug mus raws li Huab Tais Yes Xus qhia peb, ces peb yuav coj ncaj thiab ua zoo txhua txhia hnub, yam li peb mus teev Ntuj txhua txhia hnub, peb hlub luag tej, peb coj luag los nrhiav Huab Tais Yes Xus, peb coj raws li lub Koom Txoos qhia, peb yuav ua li cov tub txib siab ncaj, ces qhov kawg, thaum tus Tswv rov los, peb yuav tau Tswv Ntuj lub Ceeb Tsheej los ua peb tug xwb.
Nyob zoo sawv daws.
