ZAJ NYEEM HNUB TIM 19 LUB 7 HLI 2025
HNUB XYA, LIS PIAM 15 CAIJ NYOB NRUAB XYOO
COV LUS NYOB HAUV MAS TAIS NTAWV MOO ZOO (MT 12: 14-21)
Kwv tij Hmoob, peb pom tias thaum muaj neeg yuav ua phem rau Huab Tais Yes Xus, mas Huab Tais Yes Xus xaiv txoj kev maim kom dhau. Tsis yog vim Huab Tais Yes Xus ntshai cov neeg yuav ua phem rau nws. Huab Tais Yes Xus tsis xav kom muaj kev kub ntxhov, muaj kev tsis sib haum. Huab Tais Yes Xus txhav deb cov neeg xav ua phem rau nws, tab sis nws tsis tso txoj kev nyiam kev hlub luag pov tseg, nws tseem niaj hnub kho cov neeg mob tuaj vam txog nws.
Tus Hauv Paus Xa Lus Mas Tais, nws sau phau Ntawv Moo Zoo, nws tau qiv Yaj Saub His Xais cov lus hais txog ‘tus tub txib raug txom nyem’ los taw rau cov nyeem nws phau ntawv kom pom tias Huab Tais Yes Xus yog tus tub txib Tswv Ntuj xaiv, thiab Huab Tais Yes Xus yog tus tub txib Tswv Ntuj nyiam.
Yaj Saub His Xais hais tias Tswv Ntuj tus tub txib tsis cav tsis nthe nrov, nws pom cov tauj qaug mas nws tsis muab lov, tus teeb xeeb cig qauj lias mas nws tsis muab tshuab. Yaj Saub His Xais hais li mas yog nws xav qhia tias Tswv Ntuj tus tub txib yog tus siab zoo, nws hlub cov neeg vam txog nws.
‘Tus tauj qaug’, ‘tus teeb xeeb qauj lias’ yog ib lo paj lug hais txog tus neeg mob txom nyem tshuav tuag. Cov zoo li no mas lawv vam ib tug neeg tuaj pab cawm lawv. Tswv Ntuj tus tub txib tsis tuaj rhuav lawv, nws tus cawm lawv.
Mas Tais qhia tias Huab Tais Yes Xus yog tus siab zoo, nws hlub cov neeg txom nyem mas nws thiaj ncig teb chaws kom tau cawm thiab kho lawv. Huab Tais Yes Xus yog tus tub txib Tswv Ntuj xaiv tiag.
Cov kwv tij, peb to taub lub Moo Zoo raws li hais lawm, peb ho muab los piv rau peb, ces peb yuav pom tias niaj hnub peb yuav ua ib yam li Huab Tais Yes Xus ua. Thaum muaj neeg tsis nyiam peb, xav ua plaub ua ntug rau peb; mas peb tsis txhob nrog nws sib cav, los yog sawv tiv kiag. Peb yuav tau xaiv txoj kev maim kom txhob muaj lus mas yuav zoo dua.
Piv li nyob hauv lub zos peb nyob, muaj tej tus neeg ntxub peb, niaj zaus tuaj nrhiav lus rau peb kom tau muaj plaub; mas peb yuav nyob twj ywm, txhob liam fab rau. Tsis yog peb ntshai, tab sis yog peb tsis xav muaj lus sib cav sib ceg.
Txij hnub peb txais Cim Ntxuav ua Huab Tais Yes Xus thwj tim, peb ntseeg txog Yes Xus, peb zoo siab hlo ua Tswv Ntuj cov tub txib, ces peb thiaj yuav ua tus tub txib raws li Huab Tais Yes Xus tus qauv, peb tsis lov tus tauj qaug, tsis tshuab tus teeb xeeb cig qauj lias; peb ua cov hauj lwm pab cov txom nyem, peb kho cov neeg mob tsis hais cev nqaij los ntsuj plig, peb npo lawv hauv qhov tuag.
Yog nej nco tau, mas thaum Huab Tais Yes Xus xa nws cov thwj tim mus tshaj lub Moo Zoo, nws hais tias “Nej kho cov mob kom zoo, nej tsa cov tuag kom cija rov los, nej kho cov mob ruas kom huv, nej ntiab dab kom khiav” (MT 10: 8).
Qhov no yog kom peb ua tus tub txib raws li Huab Tais Yes Xus tus lwj lwm.
Nyob zoo sawv daws.
