ZAJ NYEEM HNUB TIM 2 LUB 7 HLI 2026
HNUB TSIB, LIS PIAM 13 CAIJ NYOB RUAB XYOO
COV LUS NYOB HAUV MAS TAIS NTAWV MOO ZOO (MT 9: 1-8)
Kwv tij Hmoob sawv daws, Huab Tais Yes Xus pom tus tuag ceg, mas Huab Tais Yes Xus hais rau nws tias “Koj tso siab mog, koj cov txhaum daws tas lawm.” Tos Huab Tais Yes Xus hais kom nws tso siab, vim Huab Tais Yes Xus pom tias tus tuag ceg xav tias tos nws tuag ceg li ntawd vim nws yog neeg muaj txhaum. Cov His Xas Lais yeej qhia zoo li ntawd. Tus tuag ceg xav li no, ua rau nws tsis muaj kev tso siab, nws tau tus mob sab ntsuj plig thiab sab cev nqaij. Li ntawd, Huab Tais Yes Xus thiaj li hais kom nws tso siab, yam li Huab Tais Yes Xus xub kho nws lub tswv yim kom zoo tuaj tso, mas Huab Tais Yes Xus mam li kho nws tus mob sab cev nqaij.
Nyob hauv peb lub neej ua neeg ntseeg zoo li ntawd, yog peb xav kom Huab Tais Yes Xus cawm tau peb, mas peb yuav xub ntxuav peb lub tswv yim, kho peb sab ntsuj plig ua ntej tso. Yam li peb yuav nquag txais lub Cim Daws Txhau, xyaum zam txim rau cov neeg ua phem ua tsis zoo rau peb, xyaum zam rau yus tus kheej.
Huab Tais Yes Xus hais rau tus tuag ceg tias “Koj tso siab mog”, mas kuj yog Huab Tais Yes Xus xav kom nws ua siab loj tsis txhob ntshai thiab ntxhov siab dab tsi ntxiv.
Kwv tij, peb tseem pom tias nyob hauv cov xwm no, muaj ib cov neeg kwv tus tuag ceg tuaj, yog lawv tsis ntseeg tias Huab Tais Yes Xus muaj hwj huam kho tau lawv tus neeg mob, mas lawv yeej tsis kwv nws tuaj. Li ntawd, tus tuag ceg rov mus taus kev thiaj li tsis yog vim nws ib leeg ntseeg xwb, tseem yog cov neeg kwv nws tuaj ntawd, lawv ntseeg thiab. Li ntawd, thaum peb qaug zog, peb txhob nrhiav chaw tawm mus nyob ib leeg twm zeej. Tab sis peb yuav tau vam txog cov neeg ntseeg xws li peb kom lawv pab peb thiab. Tsis tas li ntawd, qee zaus peb tsum ua tus kwv luag lwm tus uas tab tom raug txom nyem thiab.
Nyob zoo sawv daws.
