ZAJ NYEEM HNUB TIM 20 LUB 3 HLIS 2025
HNUB TSIB, LIS PIAM 2 CAIJ PLAUB CAUG
(YLM 17:5-10; LK 16: 19-31)
Kwv tij Hmoob sawv daws, lub Moo Zoo hnub no yog ib zag paj lug Huab Tais Yes Xus hais txog tus nplua nuj tsis hlub tus pluag. Huab Tais Yes Xus hais tias tus pluag pw ze ntawm tus npua nuj lub rooj loog kom tau noj tej yam poob ntawm tus nplua nuj lub rooj mov kom tsau nws plab. Tus nplua nuj thiab tus pluag tuag, ces tus nplua nuj mus nyob hauv ntuj txias teb tsaus hos tus pluag mas mus nyob hauv Has Nplas Has xub ntiag.
Ua cas thiaj zoo li ntawd?
Puas yog tus nplua nuj ua tej yam phem dua tus pluag?
Puas yog Tswv Ntuj hlub tus pluag dua tus nplua nuj?
Huab Tais Yes Xus hais zaj no mas nws xav qhia dab tsi rau cov tuaj mloog nws?
Huab Tais Yes Xus hais tias tus nplua nuj pw ze ntawm lub rooj loog, nws pom tus nplua nuj niaj hnub ua rooj qav noj mas nws ntshaw noj tej mov poob ntawm tus nplua nuj lub rooj mov. Txhais tias tus pluag pw ze ntawm lub rooj loog tab sis niaj hnub tus nplua nuj ntsia tsis pom tus pluag li, nws tsis tau cev ib yam dab tsi pub rau tus pluag li. Thiab txhais tau tias tus plug tuaj pw nyob ze ze tus nplua nuj lub rooj loog tab sis nws tsis tau ib yam dab tsi ntawm tus nplua nuj li, nws vam tias yuav tau noj tej yam poob saum lub rooj mov tab sis nws tsis tau ib yam dab tsi li vim tias tus nplua nuj tsis tau hla lub rooj loog tawm mus sab nraud ib zaug li.
Huab Tais Yes Xus hais ntxiv tias ‘dev tseem tuaj yaim nws tej qhov txhab thiab’ txhais tau tias tus dev nyob ntawm qhov rooj los twb tsis tau noj ib yam poob ntawm tus nplua nuj lub rooj li thiab, mas tus dev thiaj tshaib txog qhov tias nws yaim cov qhov txhab. Thiab tseem muab xav tau ntxiv tias tab txawm yog dev los twb hlub txog tus pluag ntawd. Yog li mas peb thiaj pom tau tias tus nplua nuj no muaj lub siab nqaim siab cuaj khaum thiab dub npaum li cas. Qhov no yog tus nplua nuj qhov phem.
Kwv tij, tus nplua nuj siab nqaim tsis txawj hlub cov neeg txom nyem, mas thaum nws tuag nws thiaj poob rau ntuj txias teb tsaus. Ntawm tus pluag mas Huab Tais Yes Xus tsis hais tias yog dab tsi nws thiaj mus nyob hauv Has Nplas Has xub ntiag; yam li nyob saum ntuj. Vim zaj paj lug no Huab Tais Yes Xus xav qhia cov neeg siab nqaim siab dub tsis txawj hlub neeg kom lawv tig los yuav siab tshiab txhob ua li tus nplua nuj hauv zaj no.
Ntawm peb sawv daws los kuj ib yam, Huab Tais Yes Xus tsis xav kom peb ua neeg siab dub, ua neeg siab nqaim, ua neeg tsis txawj pom luag tej kev txom nyem. Peb txhob muab lub siab nqaim los cais peb ntawm cov neeg vam txog peb kev pab lawv. Yog peb tsis hla lub taw rooj tawm mus cev tes pab cov neeg txom nyem thaum peb tseem muaj zim txwv ua tau, mas ntshai tsam lig dhau rau peb. Peb txhob tos kom lub taw rooj nqaim nqaim thiab qis qis no txia ua ib lub qhov ntuj tob thiab dav tso peb mam pom txog luag lum tus kev txom nyem, tsam thaum ntawd lig dhau rau peb ib yam li tus nplua nuj pom tus pluag thaum nws twb nyob hauv tub tuag teb lawm. Thaum ntawd, peb xav hla los twb hla tsis tau.
Nyob hauv lub caij Plaub Caug no, lub Koom Txoos txhib peb tsis tseg kom tawm mus nrhiav cov neeg txom nyem thiaj tau ua hauj lwm hlub lawv, txhib peb kom nco txog cov neeg txom nyem thiaj tau thov Ntuj pub rau lawv, txhib peb kom ntsia pom cov neeg txom nyem thiaj tau qee tej yam peb muaj pub rau lawv.
Li ntawd mas kwv tij Hmoob, peb txhob ua li tus nplua nuj hauv zaj paj lug hnub no, es cia tus neeg txom nyem nyob ntsia ntsoov peb mus txog qhov uas tab txwm dev los twb tuaj yaim nws cov qhov txhab. Nyob zoo sawv daws.
