ZAJ NYEEM HNUB TIM 20 LUB 8 HLI 2025
HNUB NCO TXOG LEEJ NTSHIAB NPES NAS
COV LUS NYOB HAUV MAS TAIS NTAWV MOO ZOO (MT 20: 1-16)
Cov kwv tij Hmoob sawv daws, nej mloog Huab Tais Yes Xus zaj paj lug no tas, mas nyaj nej yuav xav twj ywm hauv siab tias tus tswv teb mas nws coj tsis ncaj, nej yuav hlub cov tub zog tuaj ua zog ib hnub txwm nkaus, tab sis ua cas lawv tus nqi zog tau xws li tus tuaj ua ib teev xwb. Tsim nyog cov tuaj ua ntej yuav tau ntau dua cov tuaj tom qab mas. Nej puas yog xav li no?
Kwv tij Hmoob sawv daws, peb ua neej nyob mas peb yeej xav thiab coj li ntawd tiag, tab sis nyob ntawm Tswv Ntuj mas tsis yog li ntawd. Tswv Ntuj kev txiav mas tsis yog tias tus neeg twg ua hauj lwm ntev dua los ua num tau ntau dua. Tswv Ntuj yuav txiav ib tug neeg twg lub txim los saib tias tus neeg twg tau ua zoo dua lwm tus, mas Tswv Ntuj txiav mus raws qhov tseeb, mus raws kev nyiam, kev hlub.
Nej twb hnov tias tus tswv teb nrog cov tub zog hais haum tias lawv tus nqi zog yog ib hnub ib lub txiaj nyiag, yog li mas tus tuaj ntxov los lig, tus tswv tebj thiaj muab tib tug nqi zog zoo tib yam. Qhov no yog tus tswv teb lub siab ncaj rau cov neeg tuaj ua nws daim teb. Tswv Ntuj lub siab ncaj rau neeg kuj zoo ib yam li ntawd, Tswv Ntuj tsis txiav tias tus neeg twg yuav ntseeg ntxov los lig, tsuav kom nws ntseeg xwb, mas nws yuav tau txais Tswv Ntuj lub Ceeb Tsheej zoo xws tib yam.
Huab Tais Yes Xus tseem xav qhia tias Tswv Ntuj txoj kev ncaj yeej xub nyob ua ntej yuav muaj neeg lawm, Tswv Ntuj yeej ua ncaj rau sawv daws ib yam nkaus.
Huab Tais Yes Xus hais ntxiv tias tus tswv teb tawm mus ncig hauv cov zos 4 lwm ntxiv, nws pom cov neeg nyob dag tom tshav puam, nws hais kom lawv tuaj ua zog hauv daim teb, mas cov neeg ntawd zoo siab tuaj, lawv tsis yig. Qhov no pom tias vim tus tswv teb hlub thiab nyiam cov nyob dag tom tshav puam, nws thiaj hais kom lawv mus ua zog tom nws daim teb, ces lawv thiaj yuav tau txais tus nqi zog los yug lawv tsev neeg.
Qhov no kuj yog tsom txog Tswv Ntuj lub siab hlub neeg. Tswv Ntuj yeej hlub neeg zoo tib yam, nws tsis xaiv hlub tus no tseg tus tod. Tswv Ntuj tawm tuaj hu peb txhua lub caij kom peb tig rov los ntseeg txog nws xws li tus tswv teb hauv zaj paj lug no.
Huab Tais Yes Xus piav ntxiv tias cov xub tuaj ua ntej yws tias tus tswv ua tsis ncaj rau lawv vim lawv ua hauj lwm ib hnub hos tus tuaj tom qab ua ib teev xwb, ua cas nws tau nqe zog ntau ib yam li lawv cov ua ib hnub, ces tus tswv teb tias “Kuv tsis tau ua tsis ncaj rau koj, wb tsis tau hais haum tias ib hnub ib lub txiaj nyiag lod? Puas yog koj khib vim kuv siab zoo?”
Kwv tij Hmoob sawv daws, Tswv Ntuj xav kom peb ua zoo li Tswv Ntuj, zoo siab rau tus neeg tau txais nws tus nqe zog, tsis yog yuav khib lawv. Peb cov Tswv Ntuj tau hu los xub paub Tswv Ntuj mas peb yuav tsum nrog cov kwv tij nyuam qhuav ntseeg Ntuj zoo siab thaum lawv tau txais txiaj ntsim paj tshab ntawm Tswv Ntuj.
Thov kom peb nco tias tus neeg twg muab hlob, nws ntxub luag tej, nws tsis xav kom lawv tau zoo dua nws, mas Tswv Ntuj yuav rho nws tawm hauv Tswv Ntuj lub Ceeb Tsheej mus.
Yam uas tus neeg ntseeg tsum tau ua txawm tias ntseeg tau ntev, los nyuam qhuav tig los ntseeg, mas yog nyias kav tsij ua nyias qhov hauj lwm Tswv Ntuj hais kom ua kom zoo tshaj plaws, thiab ib tug tsis txhob khib lwm tus mas thiaj tsim nyog txais lub txiaj nyiam Tswv Ntuj pub rau.
Txawm tus hlob tus yau, tus muaj tus pluag, tus txawj ntse los tus ruam, tus xub paub Tswv Ntuj los tus nyuam qhuav paub, tus ib txwm ntseeg los tus ntseeg tom qab; Tswv Ntuj yeej yuav pub rau sawv daws sib luag, tsuav yog tus ntawd tau leg qav leg num rau Huab Tais Tswv Ntuj xwb. Li ntawd, cov neeg ntseeg tsis txhob hais rau cov tsis ntseeg tias “Tswv Ntuj tsis hlub koj.”
Cov ntseeg ntev ntseeg ruaj tsis txhob khib cov ntseeg tshiab tau txais txiaj ntsim paj tshab ntawm Tswv Ntuj. Tsim nyog cov neeg ntseeg yuav nrog cov tsis ntseeg los cov ntseeg tshiab zoo siab thaum lawv pom tias Tswv Ntuj pom lawv.
Cov neeg ntseeg tsis hais ntseeg ntev ntseeg luv sawv daws kuj yuav sib pab tsim Ntuj lub Ceeb Tsheej nyob hauv lawv lub neej. Tsis muaj qhov tias ntxov los lig. Tsuas muaj qhov tias thaum koj hnov Huab Tais Yes Xus hu koj los pab leg hauj lwm rau Tswv Ntuj, los pab tsim kev thaj yeeb, kev haum xeeb, kev sis nyiam sis hlub; koj yuav teb los tsis teb Huab Tais Yes Xus, koj yuav ua los tsis ua xwb.
Nyob zoo sawv daws.
