ZAJ NYEEM HNUB TIM 21 LUB 8 HLI 2025
HNUB NCO TXOG LEEJ NTSHIAB VAJ QHIA PIS OS 10
COV LUS NYOB HAUV MAS TAIS NTAWV MOO ZOO (MT 22: 1-14)
Cov kwv tij Hmoob, lub Moo Zoo hnub no mas Huab Tais Yes Xus hais zaj paj lug txog tus vaj caw sawv daws tuaj koom lub ntees tshoob; yog tuaj nyob hauv Tswv Ntuj lub Ceeb Tsheej los yog peb hais tias mus nyob saum ntuj.
Huab Tais Yes Xus zaj paj lug no, mas yog Huab Tais Yes Xus tab tom ntuas kom peb muab Tswv Ntuj saib cia saum lub sam xeeb. Peb tsum ras txog Tswv Ntuj kev khuv leej mas Tswv Ntuj thiaj hu peb tuaj koom rooj tshoob hauv Ntuj Ceeb Tsheej, peb tsum ras ntsoov tias Tswv Ntuj yog tus nyob siab muaj hwj chim loj tas nrho, tsis kav nws hu peb tsoom neeg me tsis tsim nyog mus hauv Ntuj Ceeb Tsheejm kom peb tau tuaj koom nws rooj tshoob, thiab peb yuav cim cia tias yog peb txais nkaus Tswv Ntuj lo lus hu mas Tswv Ntuj lub hwj chim yuav los roos peb.
Tab sis mas cov kwv tij, vim peb lub siab qias siab tsis huv, peb tsuas xam txog kev noj haus, kev nrhiav yug peb txoj sia xwb, mas peb ib txhia thiaj tau hais rau Tswv Ntuj tias ‘hnub no kuv tsis xyeej’, los hais tias ‘nej kav tsij noj ua ntej, ib pliag kuv mam tuaj.’
Cov kwv tij, yog muaj neeg tuaj hu nej mus koom ib rooj tshoob los ib rooj qav, mas nej cia li sawv tsees mus, los nej yuav tu nej lub cev, nej yuav hnav tsoos tsho kom zoo saib tso, nej mam sawv kev mus?
Peb cov Hmoob nyob lub ntuj qub qab mas kawg cia li sawv tsees mus zoo li ntawd tiag, tab sis nyob rau lub ntuj tiam no, mas sawv daws yuav tau npaj tu cev kom zoo saib tso, vim yus saib tau luag.
Hnub no Tswv Ntuj hu peb mus koom nws rooj tshoob mas peb kuj yuav tau ua li ntawd thiab.
Tswv Ntuj hu sawv daws tsis hais tus zoo los tus phem, tab sis tus tsim nyog yuav tau nyob hauv lub ntees tshoob los yog nyob hauv lub Ceeb Tsheej mas yog tus hnav tsoos noj tshoob. Tus hnav tsoos noj tshoob yog tus hnav lub siab tshiab, tus tau ntxhua nws tus ntsuj plig kom ntshiab txaus vim Tswv Ntuj lub Ceeb Tsheej yog thaj chaw ntshiab.
Huab Tais Leej Txiv xa Huab Tais Leej Tub tuaj tuag txhiv ntiaj teb neeg. Huab Tais Leej Tub muab nws cov ntshav los zawv peb cov txhaum kom txhob tsuas rau peb tus ntsuj tus plig, mas peb thiaj ntshiab tuaj. Thaum peb tig los ntseeg txog Yes Xus, peb txais lub Cim Ntxuav nyob hauv Huab Tais Yes Xus lub Koom Txoos lawd, tsis yog tias peb tau kev cawm lawm, ces peb rov qab mus coj lub qub neej ua phem ua tsis zoo. Txij hnub peb txais lub Cim Ntxuav los txog niaj hnub no, peb yuav tau npaj lub siab kom ntshiab, npaj peb cev ris tsho noj tshoob kom txhij.
Nyob zoo sawv daws.
