ZAJ NYEEM HNUB TIM 22 LUB 1 HLIS 2025
HNUB NCO TXOG LEEJ NTSHIAB TUB TSOB HWB VIS SES NTHES
HN 7: 1-3, 15-17; MK 3: 1-6
Kwv tij Hmoob zoo nyiam, hnub no peb rov hnov Mas Kos hais txog ‘hnub xas npas tos’. Tswv Ntuj Lo Lus nyob rau nag hmo Mas Kos hais txog cov Fas Lis Xais pom Yes Xus cov thwj tim de tej hnab nplej noj ces lawv hais tias yog cov thwj tim hla hnub xas npas tos; lawv ua tej yam txwv tsis pub ua. Nyob hauv hnub no peb hnov hais txog Huab Tais Yes Xus ua hauj lwm hauv hnub xas npas tos; yam li kho tus neeg qhuav tes.
Huab Tais Yes Xus saib kev nyiam thiab hlub neeg loj dua cov txoj cai, mas Huab Tais Yes Xus hais rau cov Yus Das sawv daws tias “Hnub xas npas tos, puas kheev kom ua qhov zoo los cia ua qhov phem, cawm ib txog sia los txo ib txog sia?”
Cov Fas Lis Xais thiab cov Thoob Xwm Txoj Cai mas lawv muab txoj cai saib nruj, lawv tsuas ntsia ntsoov saib tus twg ua hla los tsis hla txoj cai, ces lawv lub siab hlub lwm tus saus tas. Lawv nrhiav kev muab txim rau cov neeg tsis ua raws txoj cai, lawv tsis nco qab zam rau cov neeg tau ua txhaum. Lawv txhais tes zoo tab sis lawv lub siab qhuav.
Kwv tij, tus neeg qhuav tes mas nws txhais test sis muaj zog tuav los yog nqa tau dab tsi; txhais tes qhuav ntawd ua tsis tau hauj lwm, txhais tes ntawd tsis muaj qab hau dab tsi ntxiv. Cov neeg nyob hauv lub tsev txoos pom tus neeg tes qhuav zoo li ntawd nrog lawv nyob, lawv tsis yog tsis hlub tus tes qhuav xwb lawv tseem yuav nrhiav txim rau tus neeg cev tes mus pab tus neeg tes qhuav nyob hauv hnub xas npas tos thiab. Lawv ob txhais tes zoo tab sis lawv lub siab qhuav lawm tiag!
Vim lawv lub siab qhuav, mas Huab Tais Yes Xus thiaj ‘npau taws vog’ rau lawv. Tas cov neeg nyob hauv lub tsev txoos puav leej paub tias Huab Tais Lo Lus qhia kom ua qhov zoo thiab pab cawm neeg txoj sia nyob hauv hnub xas npas tos, tab sis lawv tsis muaj ib tug yuav muaj cuab kav teb tau.
Kwv tij Hmoob, yog peb muab cov neeg Yus Das nyob hauv lub tsev txoos hnub no los piv rau peb lub neej niaj hnub no mas peb pom zoo li cas?
Peb yuav pom tias niaj hnub no peb muaj lub sij hawm cia ua qhov zoo, pab lwm tus, ua cov hauj lwm sis nyiam sis hlub; tab sis, tab sis peb ho tsis ua. Peb xav tau tab sis peb tsis kam nqes tes ua. Peb paub tias ua tau tab sis peb tsis nco ua. Peb lub siab qhuav lawm tiag.
Kwv tij Hmoob, nyob hauv txoj kev ntseeg Ntuj mas thaum peb pom cov hauj lwm ua qhov zoo tab sis peb tsis nco ua los yog tab meeg tsis ua, mas lub Koom Txoos saib tias ‘yog peb tau ua txhaum’.
Tsis yog kev ua phem xwb thiaj yog txhaum, kev tab meeg los yog txhob txwm tsis ua qhov zoo kuj yog txhaum thiab.
Kwv tij, Huab Tais Yes Xus cov lus hauv hnub no mas Huab Tais Yes Xus tsis xav kom peb ua neeg siab qhuav pom qhov tsim nyog ua tab sis tsis kam ua. Huab Tais Yes Xus xav kom peb ‘xyab tes’ ua cov hauj lwm sis nyiam sis hlub mas peb lub siab thiaj yuav tsis qhuav.
Thov kom peb nco ntsoov tias tus twg tab meeg tsis ua qhov zoo, mas tus ntawd tab tom ua txhaum; tus twg txhob txwm ntsia tsis pom kev pab lwm tus, mas tus ntawd tab tom ua txhaum.
