ZAJ NYEEM HNUB TIM 22 LUB 5 HLIS 2025
HNUB NCO TXOG LEEJ NTSHIAB LIS TAS
COV LUS NYOB HAUV ZAM NTAWV MOO ZOO (Z 15: 9-11)
Kwv tij Hmoob, lub Moo Zoo hnub no yog Huab Tais Yes Xus lo lus luv luv hais tias “Nej nyob hauv kuv txoj kev nyiam mog.” Lo lus no yog kom peb ua neej nyob sis nyiam sis hlub.
Huab Tais Yes Xus hais ntxiv tias “Nej yuav nyob ruaj hauv kuv txoj kev nyiam tau, yog nej coj kuv cov lus qhia” yog kom peb ua raws li cov lus Huab Tais Yes Xus qhia rau peb; yog nyiam Tswv Ntuj thiab nyiam cov nyob ib ncig peb ib yam li peb pom Huab Tais Yes Xus nyiam nws Leej Txiv thiab nyiam lub qab ntuj neeg.
Huab Tais Yes Xus yog Tswv Ntuj tsis kav nws nyiam Leej Txiv Tswv Ntuj, ces nws niaj hnub nrhiav ib qho chaw xu kev kom tau thov Ntuj, nws niaj lis piam mus koom teev Ntuj nyob hauv cov tsev txoos, nws zoo siab mloog thiab ua raws li Leej Txiv txhib kom nws ua. Huab Tais Yes Xus nyiam ib zeej tsoom tsis hais tus hlob tus yau, tus muaj tus pluag, tus zoo tus phem. Huab Tais Yes Xus pom lawv poob rau qhov txhaum, pom lawv raug txom nyem muaj mob, mas Huab Tais Yes Xus hlub lawv, ces nws thiaj pab npo lawv hauv lub qhov txhaum, pab cawm lawv hauv kev txom nyem, pab daws lawv tus mob kom zoo hlo.
Tus neeg nyob hauv Huab Tais Yes Xus kev nyiam thiaj yuav tsum ua raws Huab Tais Yes Xus tus piv txwv no; nws nyiam Tswv Ntuj ces nws ua cov hauj lwm kom lub siab txav mus nyob ze Tswv Ntuj yam li nws nquag thov Ntuj, koom nrog sawv daws teev Ntuj ua ke; nws nyiam luag tej ces thaum nws pom sawv daws txom nyem mas nws lub siab hlub lawv, nws thiaj cev tes tawm mus pab lawv kom dim hauv kev txom nyem.
Kwv tij Hmoob, yog peb tsis muaj lub siab nyiam, mas peb puas yuav muaj lub siab hlub; yam li nyob hauv nruab siab koj ntxub tus neeg twg, mas thaum koj pom nws raug txom nyem koj yeej yuav tsis hlub txog nws, koj tsuas thuam nws ntxiv tuaj nruab siab. Tab sis kwv tij Hmoob sawv daws, Huab Tais Yes Xus tsis qhia kom peb ua neeg tsis nyiam luag tej mas Huab Tais Yes Xus thiaj hais tias “Nej nyob ruaj hauv kuv txoj kev nyiam mog, vim kuv nyiam nej ib yam li Leej Txiv nyiam kuv.”
Peb yuav paub txoj kev nyiam tau, yog peb ntsia tias peb cov ua niam ua txiv, peb nyiam peb tej me nyuam zoo li cas. Yeej tsis muaj leej niam leej txiv twg yuav ntxub tau nws cov me nyuam, txawm cov me nyuam txhoj npaum cas los phem npaum cas, lawv yeej nrauj tsis tau txoj kev nyiam lawv cov me nyuam pov tseg.
Kwv tij, tus me nyuam nyiam niam thiab txiv, nws kuj yuav mloog niam txiv lus. Hnub no, yog peb nyiam Huab Tais Yes Xus tiag, peb kuj yuav mloog Huab Tais Yes Xus hais, yog peb nyiam Huab Tais Tswv Ntuj tiag, peb kuj yuav mloog Huab Tais Tswv Ntuj cov lo lus tawm ntawm Huab Tais Yes Xus lub ncauj tuaj. Thaum ntawd, peb thiaj yuav nyob hauv Huab Tais Yes Xus txoj kev nyiam. Nyob zoo.
