ZAJ NYEEM HNUB TIM 23 LUB 10 HLI 2025
HNUB NCO TXOG LEEJ NTSHIAB ZAM KAS PIS TAS NOS
COV LUS NYOB HAUV LUS KAS NTAWV MOO ZOO (LK 12: 49-53)
Kwv tij sawv daws, cov His Xas Lais tos ntsoov tus Mes Xias, los yog Leej Pleev, uas yuav tuaj cawm lawv, los ntau ntau pua xyoo. Lawv ntseeg tias : “Leej Pleev” yuav yog ib tug Vaj uas coj lawv mus rau txoj kev vam meej thiaj muaj hwj chim dua ntais, qhov no yog lawv txoj kev cia siab.
Huab Tais Yes Xus cov lus qhia txog Leej Pleev kev tuaj, ua rau lawv me siab, vim txhua yam uas Huab Tais Yes Xus tau tshaj, mas tsis mus raws li lawv txoj kev xav, tsis raws li lawv txoj kev cia siab. Nyob rau hauv qhov tseeb Leej Pleev yuav nqes los txais kev txom nyem thiab tuag nyob rau saum Ntoo Cuam kom sawv daws tau txais kev dim. Txoj kev ntseeg uas hais txog Yes Xus kev tuag cawm ntiaj teb neeg no, ua rau tib neeg sib tawg, vim ib txhias lees txais tsis tau. Neeg feem coob tsuas ntshaw lub hwj chim, ntshaw nyiaj txiag, ntshaw kom muaj. Yog hais txog kev pluag thiab kev txom nyem, mas tsis muaj leej twg ntshaw, tsis muaj leej twg kam lees txais, vim tias tus coj raws li Yes Xus qhia, nws yuav tiv kev txom nyem yoog raws Yes Xus, nws yuav coj lub neej pluag. Li ntawd, cov neeg ntseeg sawv daws, yuav tsum nco ntsoov tias, kev raws Yes Xus yuav tsum txiav siab meej tiag, yuav tsum tso tej kev ntshaw raws ntiaj tej neeg txoj kev ntshaw. Qee zaus yuav ua rau yus ncaim niam ncaim txiv ncaim ntawm yus tej kwv tij phooj ywg, vim yus yuav tsum muab txoj kev ntseeg saib hlob, yus yuav tsum muab Tswv Ntuj los ua tus coj yus kev nyob rau hauv yus lub neej thiab txoj sia.
Qhov no thiaj yog qhov Tswv Ntuj xav taij ntawm peb rov qab, vim qhov paj tshab uas Tswv Ntuj pub rau peb, yog txoj sia nyob mus li.
Nyob zoo sawv daws.
