ZAJ NYEEM HNUB TIM 24 LUB 2 HLIS 2025
HNUB OB, LUB LIS PIAM 7 CAIJ NYOB NRUAB XYOO
NXL 1: 1-10; MK 9: 14-29
Kwv tij Hmoob sawv daws, lub Moo Zoo hnub no piav txog cov xwm tom qab Huab Tais Yes Xus coj Pob Zeb, Yas Kos thiab Zam nce mus pem roob, ces Mais Xes thiab Es Lias tawm los nrog Huab Tais Yes Xus tham. Thaum ntawd, peb tug thwj tim pom Huab Tais Yes Xus lub hwj chim thiab hnov ib lub suab nrov hauv twv huab tuaj tias “Tus no yog kuv Leej Tub uas kuv nyiam; nej mloog nws mog.”
Lawv peb leeg tau nug Huab Tais Yes Xus txog cov lus raws li tus Yaj Saub Mas Las Kis hais ua ntej lawm tias Es Lias yuav rov los, ces Huab Tais Yes Xus qhia lawv tias Es Lias twb los lawm; tus Es Lias ntawd yog tus Ntxuav Plig Zam.
Thaum Huab Tais Yes Xus lawv nce mus saum roob, mas txhua ib pab thwj tim nyob hauv taw roob tos, ces txawm muaj ib tug coj nws tus mob qaug dab peg tuaj rau cov thwj tim pab kho, tab sis lawv kho tsis tau.
Huab Tais Yes Xus lawv nqes los txog mas leej txiv thiaj hais rau Huab Tais Yes Xus tias cov thwj tim tsis muaj hwj huam kho tau nws tus tub.
Huab Tais Yes Xus pom li ntawd, nws xyu ib suab hais tias “Tiam neeg tsis ntseeg, kuv yuav nrog nej nyob txog thaum twg? Kuv yuav nyiaj nej txog thaum twg?”
Huab Tais Yes Xus hais li no vim nws pom tias cov thwj tim tsis muaj lub siab ntseeg tias lawv tau txais lub hwj huam ntiab dab ntawm Huab Tais Yes Xus, mas lawv thiaj kho tsis tau.
Peb tseem paub ntxiv tias tos tus me nyuam tsis zoo kuj yog vim leej txiv tsis muaj lub siab ntseeg thiab, nws hais rau Huab Tais Yes Xus tias “Yog koj pab tau, thov koj pab peb.”
Kwv tij Hmoob, yog peb tsis ntseeg peb tus kheej tias peb muaj peev xwm ua tau, mas peb kuj yuav ua tsis tau; thaum peb xav tau kev pab ntawm ib tug neeg twg tab sis peb tsis cia siab rau tus neeg ntawd mas peb yeej yuav tsis tau txais kev pab ntawm nws. Piv li kev tsav tsheb yog peb tsis ntseeg peb tus kheej, peb hais tias ‘kuv puas yuav tsav tau tsheb ne’, ces peb yeej tsav tseb tsis tau. Piv li peb mus thov ib tug kwv tij tuaj pab tsav tsheb xa peb mus kev deb tab sis peb twb tsis cia siab rau nws, peb hais rau nws tias ‘kuv tuaj thov koj, yog koj tsav tau tsheb mas koj mus pab tsav txheb xa kuv mus qhov no’, mas ntshai yuav tsis muaj leej twg pab tsav tsheb xa peb mus.
Tus me tub tsis zoo vim nws txiv twb tsis muaj lub siab ntseeg tias Huab Tais Yes Xus cov thwj tim muaj hwj huam ntiab dab tau, ntawm Huab Tais Yes Xus kiag nws twb tsis cia siab tias Huab Tais Yes Xus ntiab tau tus dab qaug dab peg tawm ntawm nws tus me nyuam.
Thaum leej txiv hnov Huab Tais Yes Xus hais li ntawd, nws mam lees tias nws tsis muaj kev cia siab tiag, ces nws hais tias “Kuv ntseeg, thov koj pab kuv vim kuv ntseeg me me xwb.”
Nws hais li ntawd, Huab Tais Yes Xus thiaj cawm tau nws tus me nyuam. Huab Tais Yes Xus hais tias “Dab nplaig txhav, dab lag ntseg. Kuv yuam koj, koj tawm hauv tus me nyuam no mus. Txhob rov los nkag hauv nws ib zaug ntxiv.”
Huab Tais Yes Xus kuj qhia rau cov thwj tim tias “Hom dab ntawd, tsuas yog txoj kev teev ntuj xwb thiab ntiab tau.”
Kwv tij Hmoob sawv daws, lub Moo Zoo hnub no zoo muab ib lub tswv yim rau peb tias muaj ntau zaus peb lub siab ua xyem xyav txog Tswv Ntuj, peb ua pob ntseg lag tsis hnov Tswv Ntuj hais lus rau peb, peb ua nplaig txhav tsis kam tshaj lub Moo Zoo rau luag tej paub; los muaj ntau zaus peb xav pab ib tug neeg twg kom tau txais Huab Tais Yes Xus kev cawm tab sis lawv tsis kam mloog peb hais, lawv tsis ntseeg li, mas kom peb nco thov ntuj pab peb thiab pab tus neeg ntawd. Peb thov ntuj pab kom peb txhob ua xyem xyav ntxiv, kom peb mloog Tswv Ntuj cov lus, kom peb muaj cuab kav tshaj lub Moo Zoo rau lwm tus, kom peb lub siab ntseeg hlob tuaj. Peb thov ntuj rau tus neeg tsis ntseeg, thov kom lawv qhib siab txais lub txiaj ntsim ntseeg ntawm Tswv Ntuj.
