ZAJ NYEEM HNUB TIM 25 LUB 1 HLIS 2025
HNUB UA HMOOV PAJ LUG HLOOV SIAB TSHIAB
HL 22: 3-16; MK 16: 15-18
Kwv tij Hmoob zoo nyiam, hnub no lub Koom Txoos ua hmoov nco txog thaum Paj Lug hloov siab tshiab los ntseeg txog Yes Xus. Nyob hauv phau ntawv cov Hauv Paus Xa Lus cov hauj mas Lus Kas tau sau zaj no cia. Lus Kas tau sau hais txog cov xwm Paj Lug hloov siab tshiab 3 lwm hauv nws phau ntawv; yam li nyob hauv zaj 9, zaj 22, thiab zaj 26. Cov Yus Das hais tias tus zauv 3 yog tus zauv qhia tias ‘zoo txhij’ tsis muaj dab tsi yuav zoo dhau ntawd lawm, ces thaum Lus Kas sau 3 lwm txog cov xwm Paj Lug hloov siab tshiab thiaj yog nws xav qhia tias cov xwm ntawd yog zoo txhij tsis muaj lwm yam yuav zoo dua ntawd ntxiv, lub ntsiab hauv phau ntawv cov Hauv Paus Xa Lus cov hauj lwm thiaj yog ‘hloov siab tshiab xws li Paj Lug’.
Ua ntej yuav hloov siab tshiab, Paj Lug yog ib tug Yus Das kawm thiab coj rawv Mais Xes txoj cai ib yam li cov Fas Lis Xais, yog li thaum Paj Lug hnov tias muaj ib cov Yus Das tso txoj cai pov tseg mus ntseeg Yes Xus cov lus qhia mas Paj Lug npau taws kawg, nws saib lawv yog yeeb ncuab, nws saib lawv yog cov fav xeeb rau Tswv Ntuj ces nws nrhiav kev hiam cov Yus Das ntawd.
Paj Lug thov ntawv tso cai ntawm cov txwj laus nyob Yes Lus Xas Les kom nws ua tus mus ntes cov ntseeg txog Yes Xus los rau txim, ces nws sawv kev mus ntes lawv nyob Das Mas. Thaum txog ib tug kev, Paj Lug tau ntsib Huab Tais Yes Xus. Paj Lug ntog rau pem teb thiab nws ob lub qhov muag cia li faj tsis pom kev. Paj Lug hnov Huab Tais Yes Xus lub suab nrov hauv qhov ci pom kev tuaj tias “Vim li cas koj hiam kuv? Kuv yog Yes Xus Nas Xas Les uas koj hiam!”
Thaum zoo li no lawm, Paj Lug mam paub tias Yes Xus yog Huab Tais, yog Tswv Ntuj tiag, ces nws ntseeg, nws hloov siab tshiab tam sim ntawd. Paj Lug thiaj nug Huab Tais Yes Xus tias “Huab Tais, kuv yuav ua dab tsi?”
Kwv tij Hmoob, yog peb nyeem zaj hais txog Paj Lug hloov siab tshiab no ntxiv mus, peb pom tias thaum mus txog Das Mas, As Nas Nias ua lub Cim Ntxuav rau Paj Lug.
Zaj Paj Lug hloov siab tshiab qhia peb tias thaum peb ntsib Huab Tais Yes Xus, peb hloov siab tshiab, peb yuav plhis ua tus neeg tshiab thiab ua txoj hauj lwm Tswv Ntuj pub rau peb; yog tshaj lub Moo Zoo.
Kev hloov siab tshiab thiaj tsis yog tig los ntseeg Yes Xus ntawm lub ncauj xwb, kev hloov siab tshiab yog hle lub siab qub pov tseg, tso lub neej qub pov tseg ces hnav dua lub siab tshiab, ua lub neej tshiab nyob hauv kev nyiam kev hlub, muab lub tswv yim dub dub ntxuav kom rov dawb tuaj; yam li Paj Lug tso lub siab ntxub los hnav lub siab nyiam, tso lub neej khi rau txoj cai los npuab Yes Xus lub Moo Zoo, ntxuav lub tswv yim cov Yus Das xwb thiaj yog Tswv Ntuj cov me nyuam los saib cov pej kum neeg yog ib pab kwv tij nyob hauv Yes Xus.
Kev hloov siab tshiab thiaj tsis yog ua tus neeg zoo li qov qub, tiam sis kev hloov siab tshiab yog ua tus neeg tshiab yam li Paj Lug lo lus hais tias “Nyem no tsis yog kuv muaj txoj sia, tab sis yog Leej Pleev muaj txoj sia nyob hauv kuv” ces tus neeg tshiab thiaj tsuas ua cov hauj lwm Huab Tais Yes Xus kom nws ua.
Lub Moo Zoo hauv hnub no, peb thiaj hnov Huab Tais Yes Xus txhib cov neeg hloov siab tshiab tias “Nej mus thoob qab ntuj, nej tshaj lub Moo Zoo rau txhua leej txhua tus. Tus twg ntseeg thiab txais lub cim ntxuav, mas Ntuj yuav cawm nws, hos tus tsis ntseeg yuav raug txim. Tus twg ntseeg, nws hu txog kuv lub npe, nws yuav ntiab dab tau, nws yuav hais ib co lus tshiab, nws yuav tuav nab tau, yog nws haus tshuaj lom neeg, tshuaj yuav tsis ua xwv txheej rau nws, thaum nws tsa tes rau saum cov neeg mob, mas cov mob yuav zoo.”
