ZAJ NYEEM HNUB TIM 25 LUB 2 HLIS 2025
HNUB PEB, LUB LIS PIAM 7 CAIJ NYOB NRUAB XYOO
NXL 2: 1-11; MK 9: 30-37
Kwv tij Hmoob, lub Moo Zoo piav txog Huab Tais Yes Xus rov qhia cov thwj tim tias nws yuav raug tsim txom. Mas Kos hais tias Huab Tais Yes Xus tsis xav kom muaj neeg paub txog cov lus qhia ntawd, vim cov lus qhia txog Huab Tais Yes Xus kev tuag yog ib co lus qhia tob hais txog txoj kev ntseeg lub hauv paus hauv ntsis. Cov lus qhia no tsuas tswh rau cov thwj tim xwb.
Mas Kos piav ntxiv tias Huab Tais Yes Xus qhia zaj lus tob no rau lawv tab sis lawv tsis to taub. Lawv tsis to taub vim lawv tsis muab siab rau mloog thiab lawv tsis xav paub.
Cov thwj tim tsis muab siab rau mloog vim lawv tseem sib cav txog yam lawv xav tuaj nruab siab tias nyob hauv lawv 12 tug ntawd; thaum lawv tus Xib Hwb tau ua vaj lawm, leej twg yuav yog tus loj dua cov.
Kwv tij, lawv los txog tsev nyob Kas Fas Naus, Huab Tais Yes Xus thiaj hu lawv los thiab hais qhia rau lawv tias “Leej twg xav ua tus thawj, mas nws yuav ua tus tuaj tom sawv daws qab thiab yuav ua sawv daws tus tub txib.” Lo lus no yog Huab Tais Yes Xus qhia tias tus loj los yog tus ua thawj mas nws tsis yog nyob rau sawv daws tsob hwb nws, tus thawj tsum yog tus tsob hwb cov neeg nrog nws. Mas Kos piav ntxiv tias Huab Tais Yes Xus coj ib tug me nyuam los sawv hauv nruab nrab lawv thiab puag tus me nyuam cia ces hais tias “Leej twg txais ib tug me nyuam yaus zoo li tus no vim kuv lub npe, yog nws txais kuv. Leej twg txais kuv mas yog nws txais tus xa kuv tuaj.” Cov lus no yog Huab Tais Yes Xus xav qhia cov thwj tim kom lawv to taub yooj yim tias kev ua tub txib yog txais cov neeg txom nyem los cov neeg tsis muaj leej twg nco txog los nyob hauv lawv lub neej. Huab Tais Yes Xus tsis yog hais xwb, peb tseem pom nyob hauv Huab Tais Yes Xus cov hauj lwm thiab; yam li Huab Tais Yes Xus ncig zos kom tau pab sawv daws dig hauv lawv kev txom nyem.
Kwv tij Hmoob, txij hnub peb txiav siab ntseeg txog Yes Xus mas yog peb ua Huab Tais Yes Xus cov thwj tim lawm tiag, mas peb yuav muab siab rau mloog Huab Tais Yes Xus cov lus nyob hauv lub Moo Zoo, peb yuav nrhiav kev paub txog tej yam tob tob nyob hauv Huab Tais Yes Xus cov lus qhia, peb yuav zoo siab nrog Huab Tais Yes Xus raug kev txom nyem mas peb thiaj yuav nrog Huab Tais Yes Xus tuag thiab sawv rov los.
Xav kom hnub no peb xav kom nej cov mloog nraim lub tshaj xo ZOO TSWV ZOV YAJ khaws lo lus no coj mus ua raws:
“Nej txais tos sawv daws, nej tsob hwb lawv.”
