ZAJ NYEEM HNUB TIM 26 LUB 6 HLI 2025
HNUB TSIB, LIS PIAM 12 CAIJ NYOB NRUAB XYOO
COV LUS NYOB HAUV MAS TAIS NTAWV MOO ZOO (MT 7: 21-29)
Kwv tij Hmoob sawv daws, ua cas hnub no Huab Tais Yes Xus hais tias cov tuav txog nws lub npe ua yaj saub, ntiab dab, thiab ua hwj huam yees ntxwv tsis yog cov yuav tau mus hauv Ntuj lub Ceeb Tsheej.
Tos Huab Tais Yes Xus hais li ntawd, vim tias muaj ntau tus lawv muab txoj kev ntseeg txog Yes Xus los ua chaw nrhiav hwj chim, ua chaw tiag taw mus txais lub koob meej. Lawv ua tub tshaj Ntuj Lus kom luag tej qhuas, lawv pab luag tej kom sawv daws nco lawv txiaj ntsim. Lawv tsis yog ua kom Tswv Ntuj nto koob meej, lawv ib txhia tseem siv Huab Tais Yes Xus lub npe los tsob hwb lawv lub siab ntshaw, lawv tseev kom Huab Tais Yes Xus ua raws li lawv lub siab ntshaw.
Vim li ntawd, Huab Tais Yes Xus thiaj hais rau lawv cov ntawd tias “Kuv tsis paub nej, nej txav mus deb kuv.”
Kwv tij, peb yuav tau ceev faj txhob lam tau lam muab Huab Tais Yes Xus lub npe mus nrhiav noj nrhiav lub koob lub npe. Ntau zaus, dab phem siv peb lub siab ntseeg rov los ntxias peb kom ua txhaum rau Tswv Ntuj. Muaj tej yam peb hais tias yog haum Tswv Ntuj txoj cai, yog mus raws li Huab Tais Yes Xus cov lus qhia. Tab sis peb puas tau saib tias qhov ntawd puas mus raws li Tswv Ntuj lub siab nyiam tiag. Piv li tias peb niaj hnub tawm rooj mus pab cov neeg txom nyem, tab sis nyob hauv peb lub cuab mas peb niaj hnub sib cav sib ceg. Piv li tias peb niaj hnub qhia lwm tus kom sis nyiam sis hlub, tab sis peb tsis muaj kev haum xeeb nrog peb cov kwv tij. Piv li tias peb yog ib tug tub tshaj Ntuj Lus tab sis peb tsis kam tsob hwb cov neeg ntseeg yog lawv tsis pub tus nqe zog rau peb.
Peb yuav xyuam xim, peb yuav nquag thov Leej Ntuj Plig tuaj tshoj peb lub siab, kaj peb lub tswv yim kom pom kev, kom peb paub tias yam twg yog ua xis Tswv Ntuj siab, yam twg yog peb tab tom ua ywj peb siab.
Hnub no, Huab Tais Yes Xus thiaj hais tias “Tus yuav tau mus hauv Ntuj lub Ceeb Tsheej tsis yog tus paub kuv, tsis yog tus tau hais txog kuv. Tus yuav tau mus hauv Ntuj lub Ceeb Tsheej yog tus ua raws li Tswv Ntuj lub siab nyiam.”
Tus ua raws Tswv Ntuj lub siab nyiam; yog tus tau hnov Huab Tais Yes Xus lo lus tas, nws khaws coj mus ua raws; yog nyiam thiab hlub sawv daws.
Tus hais ntawm ncauj tab sis tsis nqes tes ua, nws yuav muaj qab hau tau li cas. Tus niaj hnub mus koom lub Txoos Txi Ntuj, niaj hnub teev Ntuj tab sis nws tsis hloov siab tshiab tsis, tsis pauv nws tus yam ntxwv, nws yuav tau mus hauv Ntuj lub Ceeb Tsheej tau li cas.
Yog li peb ntseeg txog Yes Xus lawm, peb coj Ntuj kev cai lawm, tsim nyog peb yuav tau ua raws li Huab Tais Yes Xus txoj cai.
Thaum tus kws lij choj nug tias “Xib Hwb, nyob hauv txoj cai, lo lus qhia twg loj dua cov?” Mas Huab Tais Yes Xus hais rau nws tias “Koj yuav muab tas koj lub siab, tas koj tus ntsuj plig, tas koj lub tswv yim los nyiam koj tus Huab Tais Tswv Ntuj Thiab hais ntxiv tias “Koj yuav nyiam tus nyob ze koj ib yam nkaus li koj nyiam koj” (MT 22: 34-40).
Ob lo lus no yog Huab Tais Yes Xus txoj cai.
Yog peb ua li ntawd, mas peb ua xis Tswv Ntuj siab, ua raws li Tswv Ntuj lub siab nyiam.
Nyob zoo sawv daws.
