Zaj nyeem hnub tim 27 lub 6 hli 2026 (Hnub nco txog Leej Ntshiab Xis Lis nyob As Les Xas Nrias).

ZAJ NYEEM HNUB TIM 27 LUB 6 HLI 2026

HNUB NCO TXOG LEEJ NTSHIAB XIS LIS NYOB AS LES XAS NRIAS

COV LUS NYOB HAUV MAS TAIS NTAWV MOO ZOO (MT 8: 5-17)

            Kwv tij Hmoob, nyob hauv lub Moo Zoo hnub no peb pom 2 yam. Ib tuaj mas yog peb pom tus xab txheeb tuaj txhos caug thov Huab Tais Yes Xus pab kho nws tus tub txib mob hnyav. Nws tsis cia Huab Tais Yes Xus mus tom nws tsev. Tos tus xab txheeb hais li ntawd, vim nws paub tias nws yog ib tug neeg muaj txhaum, yog nws cia Huab Tais Yes Xus mus hauv nws tsev, mas nws cov txhaum yuav tsuas rau Huab Tais Yes Xus raws li cov Yus Das ib txwm ntseeg los. THiab yog vim nws ntseeg tias Huab Tais Yes Xus lo lus muaj hwj chim tiag, tsuav Huab Tais Yes Xus hais xwb, mas tus tub txib yeej yuav zoo.

            Huab Tais Yes Xus pom thiab hnov tus xab txheeb hais li ntawd, mas Huab Tais Yes Xus qhuas kawg. Huab Tais Yes Xus thiaj li hais rau nws tias tseev kom muaj tuaj rau nws raws li nws lub siab ntseeg.

            Ob tuaj yog thaum Huab Tais Yes Xus hnov tias Pob Zeb niam tais mob kub cev, ces Huab Tais Yes Xus sawv mus tuav tus niam tais txhais tes thiab tsa nws sawv. Pob Zeb niam tais tus mob thim, ces nws tsob hwb Huab Tais Yes Xus thiab cov thwj tim.

            Ob yam no zoo qhia peb tias yog peb xav kom yam peb thov tsheej xeeb tuaj, mas peb yuav ua tus neeg me thov thiab ntseeg tiag tiag txog qhov peb thov xws li tus xab txheeb. Thiab nyob hauv peb lub neej ua neeg ntseeg, mas peb yuav tau zoo siab tsob hwb Tswv Ntuj thiab ntiaj teb neeg ib yam li Pob Zeb niam tais. Peb ua li ntawd, tsis yog dab tsi, tab sis yog vim peb paub tias niaj hnub Tswv Ntuj hlub peb, Tswv Ntuj saib xyuas peb, ces peb thiaj nco ntsoov ua cov hauj lwm tsob hwb los ua Tswv Ntuj tsaug.

Nyob zoo sawv daws.