ZAJ NYEEM HNUB TIM 30 LUB 5 HLIS 2025
HNUB RAU, LIS PIAM 6 CAIJ HLA
COV LUS NYOB HAUV ZAM NTAWV MOO ZOO (Z 16: 20-23)
Kwv tij Hmoob sawv daws, lub Moo Zoo hnub no yog Huab Tais Yes Xus cov lus txuas zaj nag hmo, hais tau tias yog tib zaj. Nag hmo Huab Tais Yes Xus hais txog nws kev tuag thiab sawv rov los. Txoj kev tuag ua kom nws thiab cov thwj tim sib ncaim, lawv muaj kev quaj kev seev. Txoj kev sawv rov los ua kom nws thiab cov thwj tim rov sib ntsib, ces lawv yuav muaj kev luag kev hu nkauj lom zem, ces peb thiaj muab piv rau peb lub neej uas muaj kev tu siab tab sis kom peb tso siab rau Huab Tais Yes Xus, ces peb yuav muaj kev zoo siab.
Hnub no, Huab Tais Yes Xus nthuav ntxiv tias nws txoj kev tuag, zoo li tus poj niam daws cev. Thaum tus poj niam mob plab yuav yug me nyuam, thaum kws tshuaj coj tus poj niam mus yug me nyuam lawm, tus txiv mas ntxhov siab tas nrho, tsis paub tias xyos poj niam yug puas tau, xyos me nyuam yug nyuaj los tsis nyuaj. Ntawm tus poj niam, nws ntsaj tas zog vim mob nws plab dhau lawm.
Tab sis thaum yug hlo tus me nyuam tawm los, tus niam qhov mob hloov hlo ua kev zoo siab; tus txiv qhov ntxhov siab hloov hlo ua kev kaj siab. Nkawd ob leeg lub siab loj tuaj. Nkawd xav pom nkawd tus me nyuam.
Huab Tais Yes Xus kev tuag thiab sawv rov los zoo li ntawd.
Kwv tij, peb paub tias thaum Huab Tais Yes Xus raug ntes thiab raug ntsia nyob saum Ntoo Cuam, mas cov thwj tim ntxhov siab tas nrho, lawv lub ntuj tsaus nti. Txog hnub chiv lub lis piam, cov poj niam dhia los qhia lawv tias Huab Tais Yes Xus sawv rov los, mas lawv tsis ntseeg, tab sis thaum lawv rov pom Huab Tais Yes Xus myob nruab nrab hauv lawv, ces lawv ntseeg, lawv zoo siab.
Nyob hauv peb lub neej yeej zoo li ntawd thiab, peb txhua tus neeg yeej hla tsis dhau ces ploj kev tuag, tsis hais ntawm tus nyob ze yus los ntawm yus ntiag tug.
Thaum peb ib tug neeg txheej ze txoj sia tu, peb tu siab, peb quaj pnyiav vim peb hlub tshua txog nws, peb tsis xav kom nws ncaim peb mus.
Peb ua neej nyob mas peb ntshai txoj kev tuag, ntshai ncaim ntawm sawv daws, ntshai lub neej tom qab ntawd tias yuav mus tshwm rau qhov twg. Peb khuv xim ntau yam uas peb tsis tau ua, tsis tau muaj. Peb hlub cov txheeb ze, peb txhawj txog lawv.
Kwv tij Hmoob sawv daws, txoj kev tuag mas zoo li ntawd tiag, tab sis Huab Tais Yes Xus qhia rau peb kom ntsia txoj kev tuag dua tshiab. Huab Tais Yes Xus twb yeej txoj kev tuag lawm, yog peb taug raws li tus lw Huab Tais Yes Xus npaj rau peb mas peb yuav muaj kev zoo siab txais kev ploj tuag nyob hauv peb thiab cov txheeb ze. Peb muaj kev tso siab, peb vam khom tias peb thiab lawv yuav tau sib ntsib pem Ntuj Ceeb Tsheej.
Nyob zoo sawv daws.
