ZAJ NYEEM HNUB TIM 31 LUB 1 HLIS 2025
HNUB NCO TXOG LEEJ NTSHIAB ZAM NPOS KOS
HN 10: 32-39; MK 4: 26-34
Kwv tij Hmoob zoo nyiam, thaum peb xav cog ib tsob ntoo, mas peb muab lub noob coj mus faus rau hauv tej av, peb ywg dej rau chiv kom lub noob ntawd tawg kaus nrhau cag hlav ua tsob yub ntoo. Tab sis yog peb saib tej noob nroj mas yuav pom tias peb twb tsis ywg dej twb tsis rau chiv, ua cas nyob nyob lub noob nroj ntawd nws txawj tuaj nws. Thaum peb kawm tej txuj hais txog xyoob ntoo nroj tsuag, peb mam paub tias tej noob qoob los noob nroj, nyob hauv mas lawv muaj txoj sia, lawv tos kom poob kiag rau tej qhov chaw noo thiab muaj chiv ces lawv yeej yuav txawj nthaw kau nrhau cag lawv. Qhov peb ua mas tsuas yog tu kom tsob qoob hlob mus raws li peb ntshaw xwb.
Hnub no peb thiaj hnov Huab Tais Yes Xus hais tias Tswv Ntuj lub Ceeb Tsheej ua hauj lwm zoo li ntawd. Peb tseb Lo Lus rau hauv neeg nruab siab, Lo Lus mam ua hauj lwm nyob hauv neeg.
Tswv Ntuj lub Ceeb Tsheej uas Huab Tais Yes Xus hais txog no, tsis yog lub Ceeb Tsheej muaj nrim dej nrim av, muaj vaj muaj tse xws li cov ceeb tsheej peb pom nyob hauv ntiaj teb no. Tswv Ntuj lub Ceeb Tsheej Huab Tais Yes Xus hais txog yog qhov kev zoo, kev kaj siab xyiv fab nyob hauv neeg nruab siab.
Huab Tais Yes Xus tau hais tseg tias tus tau Tswv Ntuj lub Ceeb Tsheej los ua nws lub cuab tam mas yog tus pluag hauv nruab siab thiab yog tus raug hiam vim txoj kev ncaj. Tos nws muaj Tswv Ntuj lub Ceeb Tsheej nyob hauv nws vim tias lawv txaus siab mloog Huab Tais Yes Xus cov lus qhia ua qhov zoo thiab lawv nyiam ua qhov ncaj. Tus neeg mloog Huab Tais Yes Xus thiab nws nyiam qhov ncaj mas nws ua qhov zoo, nws nyob kaj lug, nws lub siab xyiv fab.
Li ntawd, cov neeg tau Tswv Ntuj lub Ceeb Tsheej ua nws twg, lawv thiaj yuav tau tawm mus tseb kev zoo, kev kaj, kev xyiv fab rau cov neeg nyob ib ncig lawv. Lawv tsis muab xav ntau ntau; yim xav yim ua rau siab fab xwb.
Kwv tij Hmoob, cov neeg ntseeg yog cov muaj Huab Tais Yes Xus ua lawv tus Xib Hwb, lawv yog cov thwj tim mas lawv mloog thiab ua raws li Huab Tais Yes Xus qhia. Yog li mas cov neeg ntseeg thiaj yog cov muaj Tswv Ntuj lub Ceeb Tsheej nyob hauv lawv. Yog cov neeg ntseeg tsis tawm mus ua qhov zoo; yam li nyiam thiab hlub cov neeg nyob ze peb, mas Tswv Ntuj lub Ceeb Tsheej puas yuav ua tau hauj lwm, Tswv Ntuj lub Ceeb Tsheej puas yuav hlob huam vam tuaj. Kawg zoo li cov noob nplej uas peb muab ntim cia hauv phawv, zoo li cov noob pob kws peb muab dai cia saum nthab. Yog cov neeg ntseeg tawm mus ua raws li Huab Tais Yes Xus cov lus qhia kom nyiam thiab pab lwm tus, mas Tswv Ntuj lub Ceeb Tsheej yuav hlob thiab huam ib yam li Huab Tais Yes Xus tau piv Tswv Ntuj lub Ceeb Tsheej zoo li lub noob zaub roj uas neeg coj mus tseb ces nws tuaj ua tsob ntoo loj thiab ncau ceg deb rau tej noog tau los nkaum.
