ZAJ NYEEM HNUB TIM 31 LUB 5 HLIS 2025
HNUB UA HMOOV TXOG MAB LIAB MUS XYUAS ES LIS XAS NPES
COV LUS NYOB HAUV LUS KAS NTAWV MOO ZOO (LK 1: 39-56)
Kwv tij Hmoob sawv daws, hnub no tas lub Koom Txoos ua hmoov txog Mab Liab mus xyuas tus phauj Es Lis Xas Npes, ces lub Koom Txoos thiaj cev lub Moo Zoo hais txog cov xwm tom qab tus Tshiab qhia tias Mab Liab yuav xeeb Tswv Ntuj Leej Tub, thiab qhia rau Mab Liab paub tias tus phauj laus Es Lis Xas Npes kuj xeeb tub tau 6 hli lawm.
Kwv tij, Mab Liab zoo siab thiab txhawj txog tus phauj, ces nws sawv kev hauv lub xeev Nkas Lis Lais mus nram Yus Das teb kom tau tsob hwb tus phauj.
Thaum Mab Liab tuaj txog, nws foom kev kaj lug ces Leej Ntuj Plig los nyob puv hauv Es Lis Xas Npes, nws tsa suab cav txog Mab Liab tias yog tus tau koob hmoov tshaj ib tsoom poj niam huv tib si, thiab lub txiv txi hauv Mab Liab lub cev tau koob tau hmoov. Es Lis Xas Npes hu Mab Liab ua ‘Tswv Ntuj leej niam’.
Kwv tij Hmoob sawv daws, Es Lis Xas Npes cov lus tsis yog nws hais nws, tab sis yog Leej Ntuj plig qhia nws hais.
Es Lis Xas Npes hais tias Mab Liab yog tus poj niam tau koob hmoov loj tshaj, nws tau ua Tswv Ntuj leej niam, tsis kav Mab Liab tsis muab hlob, nws tsis saib tias txij no mus nws yog tus loj tshaj sawv daws. Mab Liab cav txog Tswv Ntuj uas nco txog cov neeg me muaj siab nyiam tsob hwb Tswv Ntuj. Tsis tas li ntawd, Mab Liab tseem nyob pab tus tus phauj mus txog hnub nws yug me nyuam tas, Mab Liab mam mus tsev.
Mab Liab yog tus tau txiaj ntsim puv siab, yog tus tau koob hmoov tshaj ib zeej tsoom poj niam, vim Tswv Nuj Leej Tub lub hwj chim nyob hauv Mab Liab lub cev; Mab Liab yog lub xab cog lus tshiab ntig Tswv Ntuj Lo Lus, ces lub Koom Txoos thiaj hwm Mab Liab ib yam li thaud cov His Xas Lais hwm Tswv Ntuj lub xab cog lus.
Daim txiag zeb sau Tswv Ntuj Lo Lus ua kom lub xab cog lus mus nqe li cas, Tswv Ntuj Leej Tub kuj ua kom Mab Liab muaj meej mom npaum ntawd.
Kwv tij Hmoob, lub Koom Txoos qhia tias thaum neeg lub cev xeeb tub, mas thaum ntawd thooj nqaij hauv neeg lub cev muaj txoj sia lawm; yog neeg lawm, tsis tas yuav tos yug los puv peb tag kis tso mam hais tau tias tus me nyuam ntawd yog neeg. Li ntawd, hnub Mab Liab mus xyuas tus phauj mas hais tau tias hnub ntawd Tswv Ntuj Leej Tub twb txais lub cev nqaij ua neeg muaj txoj sia nyob hauv Mab Liab lub cev lawm. Yog li mas hnub Mab Liab mus xyuas tus phauj thiaj yog Mab Liab coj Tswv Ntuj Leej Tub tawm mus xyuas ntiaj teb neeg.
Mab Liab koom tes nrog Tswv Ntuj Leej Tub ua Huab Tais Tswv Ntuj txoj hauj lwm tuaj xyuas Tswv Ntuj haiv neeg. Mab Liab mloog Tswv Ntuj lus, nws muab tas nws lub neej los ua Tswv Ntuj tes dej num.
Huab Tais Yes Xus yuav mus saum ntuj, nws hais tias nws yuav nrog cov thwj tim nyob mus li, Huab Tais Yes Xus kuj thov Leej Txiv xa Leej Ntuj Plig tuaj tsa tsev nyob hauv cov neeg ntseeg txog nws. Li ntawd, hais tau tias niaj hnub no peb muaj Huab Tais Yes Xus nrog nraim peb, peb muaj Huab Tais Leej Ntuj Plig nyob hauv peb, mas tsim nyog peb yuav coj Huab Tais Yes Xus mus xyuas peb cov kwv tij, tsim nyog peb tawm mus pab cov neeg vam txog peb ib yam li thaud Mab Liab coj Tswv Ntuj Leej Tub mus xyuas tus phauj thiab pab saib pab tu tus phauj. Nyob zoo sawv daws.
