ZAJ NYEEM HNUB TIM 5 LUB 3 HLIS 2025
HNUB PLAUB TXAIS TSHAUV
(YE 2: 12-18: 2KLN 5: 20-6: 2; MT 6:1-6, 16-18)
Kwv tij Hmoob sawv daws, hnub no yog Hnub Plaub Txais Tshauv; yogh nub qhib lub caij Plaub Caug. Ib tsam tsaus ntuj mas nej yuav tau mus koom lub txoos teev Ntuj ces tus Leej Choj yuav muab cov tshauv los ua Ntoo Cuam lub Cim rau ntawm nej hauv pliaj thiab hais tias “Koj hloov siab tshiab, koj ntseeg txog lub Moo Zoo mog.” QHov no yog lub cim qhia tias nej tu siab rau nej cov txhaum, ces nej yuav them txim txhaum.
Ces txij hmo ntawd mus 40 hnub sib law sawv daws yuav ua cov hauj lwm them txim kom tau ntxuav sawv daws lub siab thiab tus plig kom ntshiab txaus txais Huab Tais Yes Xus tuaj nyob hauv peb hnub nws sawv rov los.
Hnub no peb thiaj hnov lub Moo Zoo hais txog 3 txoj hau kev them txim txhaum li no:
1. Kev pub rau lwm tus; yog lub cim tias tus pub ntawd nws muab txoj kev nyiam lwm tus saib loj dua nws lub cuab tam, nws txiav siab tsis muab nws khi rau ntiaj teb lub cuab tam.
2. Kev teev Ntuj; yog lub cim tias tus ntawd fim Tswv Ntuj, tus twg teev Ntuj ntau mas tu twg yim nrog Tswv Ntuj sib fim. Li ntawd 40 hnub no thiaj zoo caij rau peb teev Ntuj kom ntau; hais lus ua Tswv Ntuj tsaug, thov txhaum ntawm Tswv Ntuj, thov Tswv Ntuj pub txiaj ntsim paj tshab rau yus kom rov haum xeeb nrog Tswv Ntuj thiab ntiaj teb neeg.
3. Kev yoo tshaib; yog nqhis kev nyiam Tswv Ntuj thiab nyiam ib zeej tsoom ntau dua nqhis tej yam noj yug lub cev kom tsau, yug lub siab kom txhob nqhis. Tsis li ntawd xwb, tseem yog tso tus cuj pwm tsis yoo, tso lo lus phem, tso lub tswv yim qias pov tseg thiab.
Tag nrho peb yam li hais los saum no, Huab Tais Yes Xus hais tias txhob ua kom tau ntsej muag, tau lus qhuas, tau txiaj ntsim ntawm luag tej. Huab Tais Yes Xus hais zoo li no “Thaum koj pub rau luag, koj txhob tshuab hom ua koj ntej, koj txhob cia koj sab tes laug paub qhov uas sab tes xis ua. Thaum koj teev Ntuj, koj txhob tab meeg teev Ntuj kom luag pom, tab sis koj teev Ntuj nyob twj ywm hauv koj kem txaj. Thaum koj yoo tshaib mas koj txhob ua ntsej muag ntshaus ntshaus kom muaj neeg paub tias koj tab tom yoo.”
Kwv tij Hmoob, nyob hauv lub txoos, nej tseem hnov 2 zaj lus ua ntej yuav tau txais Yes Xus lub Moo Zoo; yam li zaj lus hauv tus Yaj Saub Yos Es phau ntawv hais tias “HUAB TAIS hais ib co lus zoo li no ‘Nyem no, nej rau siab rov qab los cuag kuv. Nej yoo tshaib, nej quaj, nej nyiav zoo li cov ntoo xyom. Nej tsis txhob ua nej tej tsho ntuag. Nej yuav ua nej lub siab ntuag thiaj yog. Nej rov qab los cuag nej tus HUAB TAIS Tswv Ntuj”, thiab tus Hauv Paus Xa Lus Paj Lug cov lus tias “Peb yog cov uas Tswv Ntuj xa mus ua Leej Pleev cov tiam lis. Peb tuav txog Leej Pleev lub npe thov nej tas zog, kom nej cia li nrog Tswv Ntuj rov sib haum xeeb.
