ZAJ NYEEM HNUB TIM 5 LUB 6 HLI 2025
HNUB NCO TXOG LEEJ NTSHIAB NPOS NIS FAS.
COV LUS NYOB HAUV ZAM NTAWV MOO ZOO (Z 17: 20-26)
Kwv tij Hmoob sawv daws, nyob hauv nej cov mloog lub Moo Zoo hauv hnub no mas muaj coob tus yog niam yog txiv, nej muaj me nyuam tab sis nej cov me nyuam mus kawm ntawv los yog ua hauj lwm deb nej lawm, thaum nej hnov ib yam xwm dab tsi mas nej yuav nco txog nej cov me nyuam, nej muaj kev zoo siab los tu siab mas nej xav qhia rau nej cov me nyuam; nyob hauv nej cov mloog lub Moo Zoo hauv hnub no kuj muaj ib txhia yog me nyuam tso niam tso txiv tuaj ua hauj lwm deb, los yog niam txiv tso nej tseg lawm, nej kuj yuav nco ntsoov txog lawv. Ib yam peb pom zoo tshaj hauv peb cov Hmoob lub neej, yog qhov tias peb nco txog cov tau tso ntiaj teb tseg; peb muaj noj mas peb nco txog lawv, peb thov Ntuj rau lawv. Qhov peb ua li no mas yog vim peb nyiam thiab hlub lawv.
Peb ua neej nyob, peb puas zoo siab thaum paub tias muaj ib tug tseem nco txog peb, nug txog peb moo mus li, tshwj xeeb tseem thov Ntuj rau peb tsis tseg thiab.
Kwv tij, hnub no peb hnov cov lus Huab Tais Yes Xus thov Ntuj rau cov ntseeg txog nws, tsis yog cov thwj tim nrog nws ua neej nyob lub caij thaud xwb, tseem yog rau cov ntseeg tuaj puag tom qab xws li peb thiab.
Huab Tais Yes Xus hais rau Tswv Ntuj tias “Txiv. Kuv tsis thov koj rau cov no xwb, kuv tseem thov koj rau cov uas yuav ntseeg txog kuv vim lawv lo lus.”
Hais tau tias tab yog peb tseem tsis tau yug los, mas Huab Tais Yes Xus twb nyiam peb, nco txog peb lawm. Li ntawd, peb yuav tsum zoo siab uas peb tus Huab Tais Yes Xus hlub peb tas npaum no.
Kwv tij, Huab Tais Yes Xus thov dab tsi rau peb? Huab Tais Yes Xus thov Tswv Ntuj rau peb kom peb koom ua ib leeg ib yam li Huab Tais Yes Xus thiab Leej Txiv koom ua ib tug.
Kwv tij, niam txiv kev zoo siab yog pom cov me nyuam sib nyiam sib hlub, lawv muaj kev haum xeeb koom siab koom ntsws. Huab Tais Yes Xus kuj xav pom peb cov ntseeg txog nws muaj kev haum xeeb li ntawd.
Peb yuav koom ua ib leeg tsis tau yog tias peb tsis txawj sib nyiam. Peb yuav sib haum xeeb tsis tau yog peb tsis muaj kev mloog lus.
Ob niam txiv sib sau los ua ib cuab vim nkawd sib nyiam. Lub txiv txi hauv nkawd txoj kev sib nyiam yog nkawd cov me nyuam. Tus txiv thiab tus niam nkawd nyob haum xeeb tau vim nkawd ib tug mloog ib tug hais.
Huab Tais Yes Xus nyiam thiab hlub peb, nws xub thov Ntuj ob txhiab xyoo ua ntej rau peb kom nyob hauv peb tsoom neeg ntseeg, peb koom siab tau ua ib leeg; yog kom peb txawj sis nyiam sis hlub, txawj sib mloog hais.
Niaj hnub no, peb mus teev Ntuj hauv tsev teev Ntuj, peb sim tig ntsia ib ncig saib tshuav tus twg peb tseem tsis tau nrog nws haum xeeb, peb thiab nws tseem niaj hnub muaj lus tsis sib haum, tseem sib dub muag. Xav kom peb hloov siab tshiab los nyiam nws, hais lus zoo rau nws, mloog nws hais, rov nrog nws tsim kev koom siab.
Nyuaj kawg uas ib tug neeg yuav koom siab tau nrog tus uas nws tsis nyiam, nyuaj kawg nkaus uas ib tug neeg yuav koom siab tau nrog tus tsis mloog hais. Tab sis peb muaj Huab Tais Yes Xus ua tus pab peb, nws thov Ntuj rau peb, nws ntxiv zog rau peb kom peb hle tau lub siab ntxub pov tseg los hnav lub siab nyiam. Peb vam txog Huab Tais Yes Xus pab.
Kwv tij Hmoob sawv daws, xav kom peb sib nyiam mas peb thiaj yuav koom ua tau ib leeg. Yog peb tsis sib nyiam, Huab Tais Yes Xus tuaj nyob hauv peb tsis tau, peb los peb kuj yuav nrog Huab Tais Yes Xus nyob tsis tau thiab.
Yog peb nyiam Huab Tais Yes Xus, peb yuav nyiam cov nyob puag ncig peb, peb nrog lawv ua ib leeg, ces Huab Tais Yes Xus yuav nyob hauv peb, thiab peb yuav nrog Huab Tais Yes Xus nyob. Nyob zoo.
