ZAJ NYEEM HNUB TIM 5 LUB 7 HLI 2025
HNUB NCO TXOG LEEJ NTSHIAB TUAM MAB LIAB NTXAS KAS LIAS
COV LUS NYOB HAUV MAS TAIS NTAWV MOO ZOO (MT 9: 14-17)
“Tsis muaj leej twg ntxiv ib daim ntaub tshiab rau ib lub qub tsho, tsis muaj leej twg xuas hnab tawv qub los ntim cawv tshiab. Vim daim ntaub ntxiv yuav rub lub qub tsho, ces haj yam ntuag loj; cov cawv tshiab kuj yuav tom cov hnab tawv qub, ces hnab yuav tawg.” Kwv tij Hmoob, muaj coob tus neeg xav paub tias Huab Tais Yes Xus lo lus yog hais txog dab tsi tiag?
Ua ntej yuav phua lub ntsiab, mas peb tig mus ntsia saib yog leej twg tuaj ntsib Huab Tais Yes Xus, thiab Huab Tais Yes Xus hais cov lus no rau leej twg lub sij hawm twg.
Mas Tais, Mas Kos, thiab Lus Kas lawv 3 leeg sau zaj no tom qab Huab Tais Yes Xus nrog cov neeg txhaum noj mov nyob hauv Mas Tais tsev. Yog Mas Tais ntsib Huab Tais Yes Xus, nws txiav siab raws Huab Tais Yes Xus, mas nws thiaj ua rooj qav thiab nws hu tas cov neeg sawv daws saib yog neeg txhaum xws li nws tuaj koom rooj mov, kom lawv tau nrog Huab Tais Yes Xus tham thiab tau lo lu nplij siab ntawm Huab Tais Yes Xus.
Ntshai thaum Huab Tais Yes Xus lawv koom Mas Tais rooj mov, mas yog lub caij cov Yus Das ua kab ke yoo, cov Fas Lis Xais pom mas lawv hais tias ua cas Huab Tais Yes Xus thiaj koom tsum mov nrog cov neeg txhaum; Zam cov thwj tim pom mas lawv xav tias ua cas Huab Tais Yes Xus thiaj tsis coj cov kab ke yoo raws li txoj cai qhia.
Peb paub tias cov Fas Lis Xais thiab Zam lawv coj Mais Xes txoj cai zoo heev. Cov Fas Lis Xais coj txoj cai sab nraud kom luag pom tias lawv coj nruj tab sis nyob sab hauv lawv hla txoj cai. Zam thiab nws cov thwj tim coj Mais Xes txoj cai nruj sab hauv thiab sab nraud tib si; lawv nyiam yuam lawv lub cev kom txhob mloog lub siab ntshaw.
Yog li mas thaum lawv pom tej pab neeg tsis coj txoj cai nruj, yam li tsis yoo mov, mas lawv thiaj xav paub tias tim dab tsi, ces lawv thiaj nug tej ntawd ntawm Huab Tais Yes Xus.
Huab Tais Yes Xus yuav hais li cas, lawv thiaj yuav to taub zoo, ces nws hais tias nyob hauv ib lub ntees tshoob, mas sawv daws yuav ua lom zem tab txawm tias muaj kev tu siab. Hnub no muaj ib tug neeg txhaum tig los yuav siab tshiab, nws npaj ib pluag ua kev zoo siab, mas tsim nyog yuav nrog nws zoo siab. Hnub no Huab Tais Yes Xus tseem nrog cov thwj tim nyob, nws zoo li tus nraug vauv nyob hauv lub ntees tshoob, mas lawv kuj yuav ua lom zem ua ntej; hnub twg nws tsis nyob lawm, sawv daws mam tu siab thiab yoo mov.
Huab Tais Yes Xus muab cov Fas Lis Xais thiab Zam cov thwj tim coj Mais Xes txoj cai, los piv rau lub qub tsho; Huab Tais Yes Xus muab cov Fas Lis Xais thiab Zam cov thwj tim coj Mais Xes txoj cai, los piv rau lub hnab tawv qub. Huab Tais Yes Xus muab nws cov lus qhia piv rau daim ntaub tshiab thiab piv rau cov cawv tshiab, ces nws hais tias yog cov Fas Lis Xais thiab Zam cov thwj tim tseem ua zoo li lub qub tsho los lub hnab tawv qub, mas lawv yuav txais tsis tau Huab Tais Yes Xus cov lus, lawv khaws tsis tau cov lus qhia tshiab rau hauv lawv txoj sia. Huab Tais Yes Xus cov lus yuav ua kom lawv ntuag los tawg mus xwb.
Yog cov Fas Lis Xais thiab Zam cov thwj tim xav khaws tau Huab Tais Yes Xus cov lus, lawv tsum ua lub tsho tshiab thiab lub hnab tawv tshiab.
Muaj ntau zaus, Huab Tais Yes Xus hais txog cov Fas Lis Xais tias lawv yog cov neeg zoo sab nraud, lawv ua kom luag qhuas tab sis nyob sab hauv mas lawv tsis ntseeg los tsis coj raws li lawv tus yeeb yam ua tawm los; lawv coj Mais Xes txoj cai ntawm lub ncauj xwb. Ntawm Zam cov thwj tim mas raws li tau hais, lawv coj Mais Xes txoj cai nruj ces ntau zaus zoo li lawv rov txov lawv txoj sia, lawv rov muab txim rau lawv xwb.
Huab Tais Yes Xus cov lus qhia, mas yog kom ua tus neeg ncaj puag hauv nruab siab tuaj, thiab tsis muaj dab tsi yuav tseem ceeb dua lub siab nyiam thiab khuv leej neeg.
Li ntawd, tus yuav txais Huab Tais Yes Xus cov lus tau, nws tsum hle lub tsho pov tseg, nws thau nws lub hnab tawv tshiab los ntim; yam li nws ua tus neeg tshiab, txhob muab tej kev cai los tej yam uas yuav khuam peb kom txhob ua cov hauj lwm hlub lwm tus los saib ua qhov loj, los ua chaw khuam peb cia. Ib yam li hnub no, Huab Tais Yes Xus tsis saib kev yoo mov raws li cov kab ke muaj qab hau dua nrog cov neeg txhaum faib lawv lub nra nyob saum lawv lub xwb pwm thiab nrog tus hloov siab tshiab zoo siab.
