ZAJ NYEEM HNUB TIM 6 LUB 3 HLIS 2025
HNUB TSIB TOM QAB HNUB PLAUB TXAIS TSHAUV
(HX 30:15-20; LK 9:22-25)
Kwv tij Hmoob sawv daws, caij Plaub Caug zoo rau peb muab siab rau mloog Tswv Ntuj Lo Lus vim tias Tswv Ntuj Lo Lus muaj zog yaug tau peb siab ntsws kom rov ntshiab tuaj, Tswv Ntuj Lo Lus nkag mus tau hauv peb cov paj hlwb txha, hauv peb cov ntshav ces yuav ntws mus yug tas peb lub cev. Peb yim mloog ntau yim pab tau peb kom npuab Tswv Ntuj.
Hnub no peb los mloog saib Tswv Ntuj Lo Lus tawm hauv Huab Tais Yes Xus lub ncauj los hais zoo li cas?
Huab Tais Yes Xus hais li no “Neeg Leej Tub yuav tsum raug txom nyem loj. Cov txwj laus, cov Thawj Leej Choj, thiab cov Kws Ntawv Ntshiab yuav muab nws xyeeb pov tseg. Nws yuav raug luag tua,tab sis hnub peb nws yuav sawv rov los.”
Cov lus no Huab Tais Yes Xus hais tom qab zeej tsoom sib cav txog Yes Xus tias yog leej twg, ces nws thiaj nug cov thwj tim saib ntawm lawv mas lawv xav tias nws yog leej twg. Thaum ntawd Pob Zeb teb tias raws li Pob Zeb pom thiab xav mas Yes Xus yog Tswv Ntuj tus Pleev.
Huab Tais Yes Xus pom tias Pob Zeb hais tau yog lawm, tab sis nws kuj paub tias Tswv Ntuj tus Pleev raws li Pob Zeb thiab cov Yus Das sawv daws xav mas txawv tus Pleev uas Tswv Ntuj xa tuaj no; cov Yus Das xav mas tus Pleev yog tus yuav sawv los ua cov His Xas Lais tus vaj kav tas lub teb chaws Pas Les Tis Nas, yuav coj cov Yus Das sawv ntiab cov Los Mas rov qab. Huab Tais Yes Xus ua tus Pleev tsis zoo li ntawd, nws tsis yog yuav ua cov His Xas Lais tus vaj tiam sis nws yuav ua sawv daws tus tub txib, nws tsis yog yuav caum cov Los Mas tawm mus tab sis nws yuav coj kev haum xeeb tuaj rau sawv daws, nws tsis yog yuav coj cov His Xas Lais txais kev twj lij xwb tiam sis nws yuav npo tas lub qab ntuj neeg ntawm kev ua txhaum qhev.
Huab Tais Yes Xus tsis yog mus txais lub mom teev kub ua vaj, tsis yog mus zaum lub theej kiab ua vaj nyob Yes Lus Xas Les. Qhov Huab Tais Yes Xus yuav mus txais yog lub kauj pos, yog tus Ntoo Cuam.
Huab Tais Yes Xus tsis yog mus kom sawv daws cav nws lub koob meej ua vaj, nws mus txais sawv daws cov lus hiam.
Vim li ntawd, Huab Tais Yes Xus thiaj qhia rai cov thwj tim tias nws kev ua vaj yog zoo li cas.
Huab Tais Yes Xus hais ntxiv tias “Leej twg xav los raws kuv, nws yuav tsis txhob nco txog nws, nws yuav niaj hnub kwv nws tus ntoo cuam thiab lawv kuv qab.”
Ua cas peb yuav tsum tsis txhob nco txog peb? Huab Tais Yes Xus teb tias “Vim tus nco txog nws mas nws tsuas xav qhov yuav ua li cas kom nws muaj txoj sia nyob ntxiv, tab sis tus tsis nco txog nws mas nws tsis nco txog nws txoj sia ces nws pom kev nyiam kev hlub luag loj dua, nws pab lawv txawm nws plam txoj sia lawm los nws yuav tau txais ib txog sia tshiab nyob mus li. Txoj sia tshiab no zoo dua txoj sia qub, txoj sia tshiab no muaj nqis dua txhua tsav yam.
Peb ua neeg nyob mas peb yeej xav tias leej twg thiaj yuav yeem muab tau tas nws txoj sia los puv pauv lwm tus txoj sia, peb xav li ntawd yeej tsis txhaum. Tab sis kom peb nco tias muaj ib tug ua tau li ntawd, nws ua piv txwv rau peb pom tias txoj sia tom qab plam yus txoj sia yeej yog zoo dua; tus ntawd yog Huab Tais Yes Xus. Li ntawd, lub caij Plaub Caug no peb teev Ntuj, peb thov Tswv Ntuj pab peb kom thaum txog lub sij hawm peb ntsib xwv txheej li hais mas peb ua tau raws li Huab Tais Yes Xus, peb mloog saib Huab Tais Yes Xus niaj hnub hais dab tsi qhia peb.
