ZAJ NYEEM HNUB TIM 6 LUB 6 HLI 2026
HNUB NCO TXOG LEEJ NTSHIAB NOS NPAWS
COV LUS NYOB HAUV MAS KOS NTAWV MOO ZOO (MK 12: 38-44)
Kwv tij Hmoob, lub Moo Zoo hnub no peb pom txog 2 pab neeg. Ib pab neeg yog cov neeg nplua nuj; lawv muaj nyiaj, muaj tsoos tsho zoo nkauj hnav, lawv muaj hwj chim, lawv muaj hmoo; yam li cov kws Ntawv Ntshiab. Ib pab neeg yog cov neeg txom nyem; lawv pluag nyiaj, lawv hnav khaub hlab, lawv tsis muaj tsim, lawv raug txoj hmoo phem; yam li tus poj ntsuam.
Peb tib neeg, mas peb nyiam ntsia thawj pab neeg dua ntsia pab neeg tim ob. Peb muab thawj pab neeg saib rau nqi, pab neeg tim ob peb saib tsis muaj nqis pes tsawg. Tab sis nyob ntawm Huab Tais Yes Xus, nws ntsia txawv peb. Tus muaj los tus pluag, tus nplua nuj los tus txom nyem, Huab Tais Yes Xus saib lawv muaj nqis zoo tib yam. Qhov Huab Tais Yes Xus muab siab rau, yog qhov tias ob pab neeg no, pab tuag yuav muaj qab hau dua.
Ib txhia neeg lawv nplua nuj vam meej, lawv muaj txoj hmoo loj; tab sis yog lawv ua neeg dog dig, lawv tsis muab siab rau hlub lwm tus, lawv tsis quav ntsej txog luag tej, mas Huab Tais Yes Xus saib lawv tsis muaj qab hau.
Ib txhia neeg lawv pluag pluag txom nyem, ua neeg kob huam nyob nrog txoj hmoov phem; tab sis lawv muab siab rau hlub cov nyob ib ncig, lawv ua neeg tsim txiaj, mas Huab Tais Yes Xus saib tias lawv ua neej nyob muaj qab hau.
Ib yam li hnub no, Huab Tais Yes Xus pom tus poj ntsuam pluag txom nyem muab 2 lub txiaj toog me me tso rau hauv lub txhab ceev nyiaj, mas Huab Tais Yes Xus saib tias nws tso nyiaj ntau dua cov neeg muaj.
Kwv tij, txawm tias nej lub neej yuav zoo li cas los xij, thov kom nej ua neej nyob kom muaj qab hau muaj txiaj ntsim rau lwm tus mog.
Nyob zoo sawv daws.
