ZAJ NYEEM HNUB TIM 9 LUB 8 HLI 2025
HNUB NCO TXOG LEEJ NTSHIAB TES LES XAS NPESNES DIS TAS
COV LUS NYOB HAUV MAS TAIS NTAWV MOO ZOO (MT 17: 24-20)
Kwv tij Hmoob, cov thwj tim nug Huab Tais Yes Xus hais tias ua cas lawv ntiab tsis tau dab tawm, Huab Tais Yes Xus teb rau lawv tias “Vim nej ntseeg tsawg.”
Kwv tij, puas yog cov thwj tim tsis ntseeg tias lawv tau txais lub hwj huam ntawm Huab Tais Yes Xus kom lawv ntiab tau dab? Los yog vim tus me nyuam raug dab ntawd nws txiv tsis ntseeg tias cov thwj tim muaj hwj huam ntiab tau dab?
Ua ntej no Huab Tais Yes Xus tau hais tias “Caj ces neeg tsis ntseeg thiab siab phem, kuv yuav nrog nej nyob txog tav twg, kuv yuav nyiaj nej txog thaum twg?”
Yog Huab Tais Yes Xus hais rau nws cov thwj tim. Tos Huab Tais Yes Xus hais li ntawd, vim nws pom tias cov thwj tim tseem tsis ntseeg tias nws yog Leej Pleev.
Kwv tij, yog nej nco tau, mas thaum Huab Tais Yes Xus nug lawv saib lawv xav tias nws yog leej twg, mas Pob Zeb hais tias Huab Tais Yes Xus yog Leej Pleev, ces Huab Tais Yes Xus tau qhia ntau yam txog nws txoj kev tuag thiab sawv rov los. Huab Tais Yes Xus xav tias ntshai cov thwj tim yuav to taub thiab ntseeg nws cov los ntawd lawm, tab sis hnub no nws pom tias lawv tseem tsis tau ntseeg li ntawd, mas Huab Tais Yes Xus thiaj hais cov lus ntxhib ntawd rau cov thwj tim.
Cov thwj tim tsis to taub thiab tsis ntseeg cov lus Huab Tais Yes Xus hais, mas ntshai yog vim thaum Huab Tais Yes Xus hais rau lawv, lawv ua siab fab nco txog lwm yam ces lawv tsis muab siab rau mloog Huab Tais Yes Xus cov lus.
Muaj ntau zaus peb kuj zoo li ntawd, peb lub tswv yim xav mus rau lwm yam, peb tsis hnov cov lus luag hais rau peb, ces peb tsis to taub thiab nco tsis tau luag cov lus.
Nyob hauv lub Moo Zoo hnub no, peb tsuas hnov tias leej txiv coj tus me nyuam mus nrhiav cov thwj tim, thov kom lawv pab ntiab tus dab tab sis cov thwj tim ntiab tsis tau tus dab tawm. Tab sis yog peb mus nyeem hauv Mas Kos Ntawv Moo Zoo, zaj 9 qib 14 txog 29 mas peb yuav pom tias tus me nyuam raug dab ntawd nws txiv tsis muaj lub siab ntseeg tias cov thwj tim yuav ntiab tau tus dab ntawd, thiab nws kuj tsis ntseeg tias Huab Tais Yes Xus ntiab tau tus dab ntawd. Nws hais tias “Yog koj pab tau, mas thov koj pab ntiab tus dab ntawd tawm hauv kuv tus me nyuam.”
Kwv tij, yog peb tsis ntseeg, mas peb yuav tsis pom lub hwj huam Tswv Ntuj ua nyob hauv peb ib yam li tus txiv neej no, tab sis yog peb ntseeg tias Tswv Ntuj yuav pab tau peb, los peb ntseeg tias peb yuav tsum ua tau, mas peb yuav pom Tswv Ntuj lub hwj huam pab peb xws li thaum tus txiv neej no hais tias “Kuv ntseeg, thov koj pab kuv”, ces nws pom tus dab tawm hauv nws tus tub mus.
Kwv tij Hmoob sawv daws, peb ua dab tsi mas peb tsum ntseeg tias peb ua tau, mas peb thiaj yuav ua tau tiag. Peb hais tias “Kuv yog Huab Tais Yes Xus cov thwj tim”, mas peb kuj tsum yuav ntseeg tiag tiag txog Huab Tais Yes Xus cov lus qhia, thiab peb tsum ntseeg tiag tias Huab Tais Yes Xus cawm tau peb, pab tau peb, mas peb thiaj yuav pom Tswv Ntuj lub hwj huam nyob hauv peb mog.
