Ua ntej yuav teev Ntuj raws zaj tus Tshiab xa xov hauv Hnub Chiv lub Lis Piam 28 caij Nyob Nruab Xyoo, Vaj Qhia nthuav lub ntsiab hauv zaj paj lug lub ntees tshoob tias Tswv Ntuj hu sawv daws tuaj koom rooj tshoob, nyob ntawm sawv daws saib yuav mus koom los tsis mus. Vaj Qhia xav kom peb teb tias ‘kuv mam tuaj’ thiab muab ib kem hauv peb lub neej tshwj cia txais Tswv Ntuj tuaj nyob, mas peb thiaj yuav chaws tau mus nyob hauv thaj tsam muaj kev xyiv fab mus li.
Hnub tim 15 lub 10 hli, xyoo 2023 no ncaj rau Hnub Chiv lub Lis Piam 28 caij Nyob Nruab Xyoo, cov lus hauv Ntawv Moo Zoo yog zaj paj lug Tswv Ntuj lub Ceeb Tsheej piv zoo li lub ntees tshoob raws Lus Kas Ntawv Moo Zoo (LK 22: 1-14). Zaj paj lug no hais tias muaj ib tug vaj npaj ib lub ntees tshoob rau nws tus tub, ces tus vaj ua ntawv caw sawv daws tuaj koom nrog nws zoo siab. Tus vaj tsis xav yuam tus twg, nws thiaj cia sawv daws xaiv tias yuav tuaj los tsis tuaj. Vaj Qhia nthuav lo lus no tias “Tswv Ntuj npaj rooj qav to txais peb zoo li nyob hauv lub ntees tshoob, kom peb tau nrog Tswv Ntuj thiab nrog sawv daws nyob ua ke. Tswv Ntuj caw peb sawv daws chaws mus koom rooj tshoob no.”
Yog peb yuav mus koom lub ntees tshoob, mas peb yuav tso lub sij hawm ua lwm yam tseg, thiab muab siab rau teb lo lus caw no tias ‘kuv mam tuaj koom’. Vaj Qhia pom tias Tswv Ntuj kev khaub sim nrog peb no tsis zoo li tus tswv thiab tus tub txib, tab sis yog zoo li leej txiv thiab leej tub vim Tswv Ntuj pub peb xaiv ywj siab saib yuav teb lo lus caw los tsis teb.
Lub Moo Zoo piav tias muaj tej tus tub txib tsis teb tus vaj cov lus caw, muaj tej tus tsis quav ntsej txog lub ntees tshoob ces lawv yeem tawm mus ua lawv cov hauj lwm, Vaj Qhia pom tias cov hais tias ‘tsis mus koom lub ntees tshoob’, mas tus vaj tseem ua siab ntev thiab ua siab dav rau lawv. Tus vaj tseem rov xa neeg mus hu lawv ntxiv. Tiag mas tus vaj xa neeg mus hu lawv tas txwv kom txog lub zim txwv muaj ib tug hauv cov neeg pluag yuav teb tus vaj lo lus caw.
Ntawm cov neeg tsis liam fab rau tus vaj lo lus caw, mas Vaj Qhia xam pom tias lawv yuav tsum npaj ib lub sij hawm rau tus vaj, lawv thiaj yuav muaj lub sij hawm xyeej ces lawv lub siab thiaj yuav kaj thiab raug kho kom rov zoo tuaj tau, lawv thiaj yuav nyob kaj lug, lawv thiaj yuav sov siab thiab ntsib kev xyiv fab, lawv yuav dim ntawm dab phem, kev kho siab thiab kev plam.
Muab piv rau peb cov neeg ua Ntuj kev cai, peb yuav nrhiav tau ib qhov chaw xyeej rau Huab Tais Tswv Ntuj nyob hauv lub Txoos Txi Ntuj, peb yuav tau mloov Tswv Ntuj Lo Lus, peb yuav tau teev Ntuj, thiab ua cov hauj lwm sib nyiam nyob hauv kev pab cov neeg txom nyem, cov muaj mob, cov nyob ib leeg; los yog peb tau ua cov hauj lwm sib hlub thaum ib tug mloog ib tug, ib tug txhawb siab rau ib tug. Thaum ntawd, Huab Tais Tswv Ntuj nyob nruab nrab hauv peb.
Yog li mas peb yuav rov nug peb tias ‘Kuv yuav teb zoo li cas rau Tswv Ntuj lo lus caw kuv?’
Hnub no, cov lus Vaj Qhia xav kom sawv daws khaws coj mus xav ntxiv yog cov lus li no: niaj hnub peb muab sij hawm ntau los tsawg rau Tswv Ntuj, peb tsuas xav txog peb ntau xwb los peb teb Tswv Ntuj cov lus caw peb, thiab peb puas pab cov neeg tos kev pab ntawm peb.
“Thov niam Mab Liab tus tau teb rau Tswv Ntuj tias ‘kom muaj raws li koj hais’, pab peb kom txhob ua neeg lag ntseg tsis hnov Tswv Ntuj lo lus caw peb mus koom lub ntees tshoob.”
