ZAJ NYEEM HNUB TIM 10 LUB 3 HLIS 2025
HNUB OB, LIS PIAM 1 CAIJ PLAUB CAUG
(LV 19:1-2, 11-18; MT 25:31-46)
Kwv tij Hmoob, lub Moo Zoo hnub no mas peb hais tias yog Tswv Ntuj kev txiav txim lub zim txwv kawg. Huab Tais Yes Xus xav kom cov neeg tuaj mloog nws to tuab thiab pom kom tseeb mas nws thiaj hais cov lus duab tias hnub txiav txim mas Tswv Ntuj yuav cais cov neeg zoo thiab cov neeg phem yam li tus vaj cais cov yaj ntawm cov tshis.
Peb pom tias Huab Tais Yes Xus tsis tau hais txog ‘tus ntseeg thiab tsis ntseeg’ tab sis peb hnov Huab Tais Yes Xus hais txog ‘tus hlub thiab tsis hlub lwm tus’. Ib me ntsis peb yuav tham txog qhov no.
Ua ntej no xav kom peb to taub me ntsis tias cov His Xas Lais hais txog kev txiav txim lub zim txwv kawg li cas tso.
Nyob Yes Lus Xas Les muaj 2 lub roob siab; ib lub hu ua lub roob Mos Lis Yas, ib lub hu ua lub roob Txiv Ntoo Roj. Lub Tuam Tsev Teev Ntuj txhim nyob saum lub roob Mos Lis Yas. Lub vaj Nkes Ntxes Mas Nis uas Huab Tais Yes Xus raug ntes nyob ntawm ib ntav roob Txiv Ntoo Roj.
Ntawm lub roob Mos Lis Yas thiab lub roob Txiv Ntoo Roj ua hav tiaj muaj ib tug kwj deg hu ua kes Nroos. Cov Yus Das hais tias lub zim txwv kawg Tswv Ntuj yuav txiav txim rau sawv daws nyob ntawm tus kwj deg no, ces lawv nyiam coj lawv cov neeg mus zwm ntxwv nyob rau ntawm lub roob Txiv Ntoo Roj. Lawv hais tias hnub ntawd Tswv Ntuj yuav tsa cov neeg tuag lub cev sawv rov los txiav txim thiab coj cov neeg sawv rov los nce mus nyob saum lub Tuam Tsev Teev Ntuj saum lub roob Mos Lis Yas.
Txoj kev ntseeg txog Yes Xus ncau ntawm cov Yus Das kev ntseeg los, yog li mas peb cov neeg ntseeg txog Yes Xus thiaj ntseeg li cov Yus Das ntseeg tias muaj ib hnub Tswv Ntuj yuav tsa cov neeg tuag sawv rov los nrog cov tsis tau tuag nyob ua ke, ces Tswv Ntuj yuav txiav txim rau sawv daws raws li lawv cov hauj lwm thaum tseem muaj txoj sia nyob.
Huab Tais Yes Xus tsis tau hais tias txiav txim raws li lawv txoj kev ntseeg. Huab Tais Yes Xus tsuas hais tias “Tus vaj hais rau cov nyob sab xis tias ‘Nej txais lub Ceeb Tsheej uas Ntuj npaj tseg rau nej txij puag thaum pib tsim lub sim ceeb los ua nej tug, vim tias kuv tshaib plab nej pub rau kuv noj, kuv nqhis dej nej pub rau kuv haus, kuv yog ib tug pej kum neeg nej txais kuv, kuv liab qab nej muab rau kuv hnav, kuv mob nej tuaj xyuas kuv, kuv nyob hauv tsev loj faj nej tuaj tsham kuv’ thiab hais rau cov nyob sab laug tias ‘Nej mus nyob hauv cov hluav taws kub tsis txawj tuag uas Ntuj npaj rau tus dab phem thiab nws cov dab, vim thaum kuv tshaib plab nej tsis pub rau kuv noj, kuv nqhis dej nej tsis pub rau kuv haus, kuv yog ib tug pej kum neeg nej tsis txais kuv, kuv liab qab nej tsis muab rau kuv hnav, kuv mob thiab nyob hauv tsev loj faj nej tsis tuaj xyuas kuv’.
Ob pab neeg ntawd kuj nug tus vaj tias thaum twg lawv tau ua ib yam li tus vaj hais, ces tus vaj hais tias ‘Kuv hais tseeb rau nej, nej tau ua npaum li cas rau cov me tshaj hauv kuv tsoom kwv, mas yog nej ua rau kuv. Nej tsis tau ua rau cov me tshaj hauv kuv tsoom kwv npaum li cas, mas yog nej tsis tau ua rau kuv.’”
Kwv tij Hmoob, Huab Tais Yes Xus cov lus no nws hais rau cov thwj tim uas twb ntseeg txog nws, ces cov lus no thiaj yog hais rau peb cov neeg ntseeg sawv daws. Peb paub Huab Tais Yes Xus, peb ntseeg txog Huab Tais Yes Xus mas tsis tau hais tias peb yuav tau txais Ntuj Ceeb Tsheej ua peb tug, peb tsum nyiam, hlub, pab lwm tus raws nraim li Huab Tais Yes Xus qhia thiab ua rau peb pom thiab. Lub caij Plaub Caug no lub Koom Txoos thiaj txhib peb tsis tseg kom rov nco txog qhov no: Lub neej ua neeg ntseeg yog lub neej ua cov hauj lwm sis nyiam sis hlub tsis yog sib hiam sib ntxub.
