Zaj nyeem hnub tim 2 lub 4 hlis 2026
Hnub Tsib Ntshiab
Cov lus nyob hauv Zam Ntawv Moo Zoo (Z 13: 1-15)
Kwv tij sawv daws, zaj lus nyob rau hauv hnub no yog hnub Tsib Ntshiab, uas yog yog zaj piav txog Huab Tais Yes Xus ntxuav cov thwj tim taw. Nyob rau txhua txhia xyoo thaum txog lub lis piam Ntshiab no, cov Txiv Plig kuj ntxuav cov ntseeg taw, kom xwv ua ib tug piv txwv raws li Huab Tais Yes Xus tau ua tseg. Huab Tais Yes Xus hais tias : “Kuv yog nej tus Tswv Ntuj thiab yog nej tus Xib Hwb, kuv tsob hwb nej, mas nej yuav tau tsob hwb luag lwm tus.”
Cov phooj ywg, lub ntsiab nyob rau hauv no, kuj yog Huab Tais Yes Xus qhia kom peb sib hlub, thiab qhia txog tus yeeb yam ntawm kev ua ib tug tub tshaj Ntuj lus, ib tug tub tshaj Ntuj lus, yuav coj Tswv Ntuj lub Moo Zoo mus tshaj txog luag lwm tus, peb yuav tsum xyaum ua neeg me, los tsob hwb luag tej. Peb tsis txhob ua neeg muab hlob, tsis txhob khav theeb.
Txawm tias txog hnub Huab Tais Yes Xus yuav ncaim peb mus, tsis kav, Huab Tais tseem hlub neeg txog qhov kawg, Huab Tais tau ua ib tug qauv zoo rau peb taug. Tab yog peb tseem yog ib co neeg txhaum, tsis kav Huab Tais tseem tso siab rau peb, thiab nws tos ntsoov peb, kom rov mus cuag tau peb tus Tswv uas tsim peb los ua neeg.
Qhov loj tshaj nyob rau hauv hnub no, yog Huab Tais Yes Xus tau teeb lub Cim Yug rau peb, kom xwv peb ntseeg tias Huab Tais tseem nrog peb nyob nraim, vim Huab Tais Yes Xus hlub peb kawg kiag, mas nws yuav tsis tso peb pov tseg, tab yog nws ncaim mus lawm, tab sis, kuj zoo li nws tseem nrog peb nyob nraim.
Thov kom peb tig los nrhiav Huab Tais Yes Xus mog
