ZAJ NYEEM HNUB TIM 6 LUB 10 HLI 2025
HNUB NCO TXOG LEEJ NTSHIAB NPLUS NOS
COV LUS NYOB HAUV LUS KAS NTAWV MOO ZOO (LK 10: 25-37)
Kwv tij sawv daws, muaj coob leej ntau tus neeg tau nyeem thiab mloog Yes Xus lub Moo Zoo tas, lawv nkag siab, tiam sis, lawv tsis tuaj yeem ua raws, vim tsis yooj yim rau lawv ua. Tab sis, kuj tsis yog tias nyuaj dhau peb ua tsis tau. Qhov tsis yooj yim kuj yog vim tias neeg muaj txoj kev ntshaw ntau yam los khuam siab khuam ntsws, yog yus yuav xaiv Tswv Ntuj txoj kev taug, yus yuav tsum tso txhua yam kev ntshaw nyob ntiaj teb no tseg. Vim nqe lus qhia loj nyob rau hauv zaj no qhia tias “koj yuav nyiam koj tus Tswv Ntuj kawg siab kawg ntsws kawg koj lub tswv yim, thiab koj yuav nyiam tus nyob ze koj ib yam li koj nyiam koj” txhais tias peb yuav tsum nyiam Tswv Ntuj tshaj tas txhua txhia yam nyob ntiaj teb no. Li ntawd, hnub Chiv yog Tswv Ntuj hnub, peb yuav tsum mus nrhiav Tswv Ntuj, mus teev Ntuj, yog hnub Chiv peb tsis mus teev Ntuj peb mus ua lwm yam, puas yog peb nyiam Tswv Ntuj tshaj txhua yam raws li peb hais. Tsis tas li ntawd, peb yuav tsum nyiam luag tej ib yam li peb nyiam peb tus kheej thiab. Ob nqe lus no Huab Tais Yes Xus kuj tau lees tseeb tias yog nqe lus tseem ceeb tshaj. Tab sis, neeg feem coob yeej coj tsis tau raws li lo lus qhia no.
Qhov neeg ua tau tsuas yog thawj nqi xwb, nqi ob neeg coj tsis tau.
Koj nyiam koj tus Tswv Ntuj kawg siab kawg ntsws, kawg koj lub tswv yim kawg koj tus ntsuj plig, qhov no peb coj tau yooj yim kawg, vim yog yam uas peb ntseeg lawm ces peb yeej nyiam tshaj tas txhua yam. Tiam sis, qhov ob tuaj “Koj yuav nyiam tus nyob ze koj ib yam li koj nyiam koj.” Nqe no, ua tsis yooj yim. Vim li ntawd, tus Kws Lij Choj thiaj rov nug Yes Xus kom meej meej tias yog li leej twg thiaj yog tus nyob ze kuv. Yes Xus thiaj li ua paj lug hais txog zaj tus Xas Mas Lias siab zoo no, uas nws tau pab tus neeg raug tub sab lwg ntawd, kom xwv nws pom tseeb tias yus yuav tsum hlub luag tej, tab yog tsis txheeb tsis ze yus, tsis kav yus yuav hlub luag, thaum yus pom luag poob rau hauv kev txom nyem yus yuav tsum ces tes pab luag.
Kwv tij sawv daws, peb yuav lees tias peb ntiaj teb neeg muaj lub siab nqaim siab ti, peb muab cai los sib cais ua koj pab kuv pawg, koj haiv kuv haiv, koj kwv tij kuv kwv tij. Thaum peb muaj kev sib cais li no lawd, ua rau peb lub siab nqaim nqaim ti ti, peb thiaj hlub tsis tau luag lwm leej lwm tus, peb tsuas hlub tau peb cov kwv tij kiag xwb, qees leej twb tsis txawj hlub tej kwv tij lawm thiab.
Huab Tais Yes Xus thiaj tuaj qhia txog Tswv Ntuj txoj kev hlub rau peb, Huab Tais xav kom peb txawj sib hlub, Huab Tais xav kom peb rhuav peb tus ntsa laj kab uas peb hla tsis tau mus hlub luag lwm tus. Kom peb txawj qhib siab los hlub luag tej, qhov ntawd yog qhov Tswv Ntuj xav kom peb ua, vim nyob rau hauv Tswv Ntuj lub Ceeb Tsheej peb yog ib co kwv tij lawv xwb, tsis muaj koj pab kuv pawg ntxiv lawm.
Nyob zoo sawv daws.
