Cov Tswv Qhia Fis Lis Pees txhawj xeeb thiab thov kom txhawb nqa kev ua Txiv Plig muaj ntxiv, vim cov Txiv Plig laus coob zuj zus.

Cov Tswv Qhia Fis Lis Pees txhawj xeeb thiab thov kom txhawb nqa kev ua Txiv Plig muaj ntxiv, vim cov Txiv Plig laus coob zuj zus.

Ib tug Tswv Qhia hauv lub Cheeb Koom Txoos Kav Tos Liv loj tshaj nyob Fis Lis Pees teb, tau thov kom muab siab rau txhawb nqa kom muaj Txiv Plig txhab ntxiv thiab npaj cov hauj lwm qhia kev ntseeg ntxiv mus. Vim cov Txiv Plig nyob hauv tej zej zog laus zuj zus lawm.

Hnub tim 28 lub 4 hlis no kev sib tham hauv lub Cheeb Koom Txoos thawj zaug, nyob hauv lub tsev teev Ntuj Sebu nyob Fis Lis Pees qab teb. Tswv Qhia Alberto Uy hais tias : “Cov Txiv Plig hauv lub Cheeb Koom Txoos 386 leej tseem muaj txaus siv zim txwv no, tab sis cov neeg ntseeg txhawj xeeb txog kev qhia kev ntseeg yav tom ntej. Raws li CBCP News tshaj tawm, zim txwv no cov Txiv Plig no ua hauj lwm nyob hauv 170 lub tsev teev Ntuj thiab lawv saib cov neeg ntseeg coob tshaj 4 plhom 600 txhiab leej. Txawm li cas kuj xij, yuav luag 60 feem pua ntawm cov Txiv Plig, mas lawv muaj hnub nyoog 50 tawm xyoo rov saud. Thiab kwv yees ib feem peb muaj hnub nyoog 60 xyoo, ces zoo li yog vam txog cov Txiv Plig laus ntau dua.

Tswv Qhia hais tias 8 xyoo tom ntej, xav tias yuav muaj coob leej Txiv Plig so laus thiab kev ua hauj lwm yuav tsawg, yog vim tsis muaj Txiv Plig. Tshwj zias cov npaj siab yuav kawm ua Txiv Plig muaj txhab ntxiv xwb. Tswv Qhia Alberto Uy thov kom muaj kev  txhawb nqa kev ua Txiv Plig txhab ntxiv, thiab pub lub hwj chim rau cov neeg ntseeg kom tau pab cov hauj lwm hauv lub Koom Txoos. Zim txwv no hauv lub Cheeb Koom Txoos muaj cov kawm ua Txiv Plig uas yuav tau txais lub Cim Tiag Tes 225 leeg. Lawv kawm raws Vas Tis Kas tus txheej txheem thiab lwm cov teb chaws raws li CBCP tshaj tawm. Dhau no lawm, tseem muab siab rau yuav txhawb nqa kev ua Txiv Plig los ntawm cov tsev kawm ntawv tub ntxhais hluas thiab txhua lub tsev teev Ntuj.

Tswv Qhia Uy hais tias : “Kev ua Txiv Plig tsis yog tshwm sim hauv qhov twm zeej, tab sis tshwm sim nyob hauv cov neeg ntseeg uas nquag teev Ntuj, nquag sib txhawb nqa thiab mus kev ua ke.”

Tswv Qhia Uy hais txog kev txhawb nqa hauv kev pab cov Txiv Plig, nrog rau kev kho mob dawb thiab kev teeb tsa cov kav xwm fab tib neeg kom muaj kev cia siab tias :  “Muaj nqi zog thiab muaj kev qhuab qhia ncaj ncees rau cov neeg ntseeg uas pab hauj lwm.”