Cov hauj lwm ua luam muag neeg, ua rau cov nyab hnub nyoog mos muaj coob heev nyob Mas Les Xias teb.

Cov hauj lwm ua luam muag neeg, ua rau cov nyab hnub nyoog mos muaj coob heev nyob Mas Les Xias teb. The rampant business of child bride trafficking in Malaysia

Hafeesa ib tug me nyuam ntxhais Rohingya 14 xyoos, nws raug yuam yuav ib tug txiv neej 49 xyoos uas muaj mob thiab los qaub ncaug tas li. Tus txiv neej ntawd tes taw kuj tsis muaj zog thiab. Nkawd nyob hauv ib lub zos me me uas nyob deb nroog nyob Mas Les Xias teb.

Hafeesa raug cov neeg ua luam neeg ntxias coj nws tawm ntawm Mias Mas teb 2-3 xyoos tag los. Cov neeg ntawd nrog nws niam nws txiv cog lus tias lawv coj nws mus, nws yuav tau hauj lwm zoo ua nyob Mas Les Xias teb. Tab sis txhua yam tsis yog zoo li hais, nws raug yuam yuav ib tug txiv neej 49 xyoos. Tus txiv neej ntawd cog lus tias yuav xa nyiaj mus rau Hafeesa niam thiab txiv txhua txhua lub hlis. Nws piav tias nws tau ntsib Hafeesa thawj zaug nyob hauv lub 3 hlis xyoo 2023, thaum nws mus ua hauj lwm nyob hauv zos. Hafeesa yog ib tug nyob hauv 10 tawm leej uas raug nyiag ntawm Mias Mas teb mus muag, los yog hauv cov Rohingya ua thoj nam nyob Npees Las Des teb mus rau Mas Les Xias teb. Lawv raug quab yuam ua niam ntiav los sis muag ua nyab rau lwm tus los ntawm cov neeg ua luam neeg hla teb chaws. Nyob Npees Las Des teb cov neeg thoj nam Rohingya ze ntawm ib nrab plhom leej ua lub neej tsis muaj kev ncaj ncees hauv 33 lub yeej thoj nam uas nqaim nqaim ti ti. Tom qab lawv khiav kev kub ntxhov nyob Mias Mas teb los. Lawv tsis tuaj yeem yuav tshais chaw tau ywj siab thiab tsis tau txais txoj cai ua hauj lwm.       

Ib tug neeg Rohingya hais tias : “Tsis muaj leej twg yuav pab Hafeesa tau, vim nws yuav txiv raws kev cai nyob Mas Les Xias teb.”

Lub xeev Kelantan yog lub xeev nyob nrug deb ntawm toob fab pej uas nyob ntug hiav txwv Mas Les Xias. Tas txhua yam no yuav tsum lees txais tau.

Cov me nyuam ntxhais Rohingya uas tuaj ntawm Mias Mas teb tuaj nyob hauv Mas Les Xias teb, lawv zoo siab thiab muaj suab luag lub caij lawv tau kawm ntawv nyob hauv lawv cov neeg nyob Ampang ntawm ntug nroog Kuala Lumpur, hnub tim 20 lub 5 hlis xyoo 2014.

Tsis muaj txoj hau kev khiav tawm.

Pab neeg ntawm tib neeg kev ncaj ncees hais tias : Li ntawd, cov poj niam thiab cov me nyuam ntxhais coob leej thiaj nyiag kev khiav, kom lawv tau tawm mus rau lwm cov teb chaws uas nyob sib npuas ciam. Tab sis qhov kawg lawv poob nyob hauv txoj kev ua luam muag neeg.

Cov Rohingya ze ntawm 140,000 leej raug kaw nyob hauv cov yeej thoj nam hauv lub xeev Rakhine uas nyob nruab nrab hauv Mias Mas teb txij xyoo 2012 los. Thaum kev kub ntxhov heev zuj zus tuaj Human Rights Watch pom tias muaj cov Rohingya 600,000 leej nyob hauv kev cais tawv nqaij thiab kev raug hiam raug kaw, ces thiaj ua rau lawv nrhiav kev khiav tawm.

Thaum lawv nug Hafeesa tias : “Vim li cas nws tsis hu xov tooj mus rau nws niam thiab txiv, thiab qhia tias muaj dab tsi tshwm sim rau nws ? Los puas yog nws xav nyiag kev khiav ?” Hafeesa teb tias : “Nws ntshai.” Nws ntxhov siab heev tsam ho muaj dab tsi tshwm sim rau nws niam thiab nws txiv. Vim yog tej yam txaj muag. Yog luag tej paub tias lawv tus ntxhais poob nyob hauv tej kev phem no.

Nws hais tias ; nws txaus siab yuav ua tiag uv, kom nws tsev neeg tau txais me ntsis nyiaj nyob hauv txhua txhua lub hlis.

Daim duab no yog tus me nyuam ntxhais nyob hauv nroog Mah Meri nyob Mas Les Xias. Ua ntej yuav raug xa mus rau Puja Pantai nyob hauv hiav txwv. Yog cov kab ke teev Ntuj thiab ua tsaug rau cov ntsuj plig nyob hauv hiav txwv. Hauv lub pov txwv Pulau Carey nyob ntug nroog Kuala Lumpur, hnub tim 9 lub 2 hlis 2019.

Tus nkauj nyab hnub nyoog mos uas raug kev cai.

Nyob Mas Les Xias teb, kev sib yuav thaum hnub nyoog yau nws muaj nyob hauv txhua pab pawg neeg. Tsis hais cov Mawv Xis Lim, cov tsis yog Mawv Xis Lim, cov neeg ib txwm nyob txawm thiab cov neeg thoj nam. Raws kev soj ntsuam ntawm UNICEF xyoo 2018. Kev sib yuav thaum hnub nyoog yau tseem muaj tas li, tab txawm tias muaj kev tawm tsam los ntawm tsoom pej xeem kuj xij. Vim cov tsev neeg pluag txom nyem pom tias yog txoj kev tawm uas yuav tiv thaiv kom txhob pub cov me nyuam ntxhais muaj me nyuam ua ntej tsis tau sib yuav. Yog qhov xwm yeem hauv qee thaj tsam nyob Mas Les Xias teb. Nws tsis yog kev txhaum txoj cai, tab sis nws rais ua qhov xwm yeem uas neeg ib txwm ua kam lawm. Tab sis nov yog kev txhawj xeeb hauv Mas Les Xias txoj cai uas tsis pub siv yuav thaum hnub nyoog tseem yau.

Michael tus thawj coj fab kev kawm ntawm cov teb chaws thiab tus thawj tswj hauv lub tsev kawm ntawv txheej siab nyob Kuala Lampur hais tias : qhov uas cov me nyuam ntxhais raug muag, tsuas yog hais tias nws tsis raug yuam yuav txiv, tsis tau ua kom kev sib yuav thaum hnub nyoog yau txhaum cai.

Raws txoj cai txawv teb chaws, mas kev sib yuav thaum hnub nyoog yau yog kev yuam sib yuav thiab kev yuam sib yuav yog ib txoj kev ua luam neeg. Kev txaus siab ntawm cov me nyuam ntxhais hais txog kev sib yuav, txhais tias mus tsis tau thiab lam hais xwb, vim cov me nyuam tsis muaj cai txiav txim siab sib yuav tau. Raws lub Leej Haum Kuj txoj cai tiv thaiv thiab rau txim txog kev ua luam neeg. Txawm li cas kuj xij, Mas Les Xias teb kheev cov ntxhais uas tsis yog Mawv Xis Lim sib yuav, mas yuav tsum yog ob leeg muaj 18 xyoo. Cov Mawv Xis Lim mas tus txiv neej yuav tsum muaj 18 xyoo, hos tus poj niam yog 16 xyoo thiaj pub sib yuav.

Dhau ntawd lawm, cov me nyuam ntxhais uas hnub nyoog qis dua 16 xyoo, tuaj yeem sib yuav tau, tab sis yuav tsum yog tau txais lus tso cai los ntawm lub tsev txiav txim

Sharia hauv nyias lub xeev. Kev sib yuav ntawm cov Mawv Xis Lim hauv txoj cai Islam hauv lub xeev, tsis yog txoj cai ntawm tseem hwv. Raws UNICEF kev soj ntsuam, pom tias cov me nyuam ntxhais Mawv Xis Lis hnub nyoog qis dua 18 xyoo, feem coob yuav txiv tas lawm. Vim txoj cai kheev cov me nyuam ntxhais nyob Mas Les Xias teb yuav txiv thaum lawv muaj 16 xyoo. Ces cov me nyuam ntxhais Mawv Xis Lim hnub nyoog qis dua 18 xyoo thiaj yuav txiv tas. Nyob hauv 1,500 tus me nyuam ntxhais uas yuav txiv nyob Mas Les Xias teb xyoo 2018, 74 feem pua yog cov ntxhais Mawv Xis Lim.

Tawv nqaij dawb, yog qhov neeg xav tau.

Ib txwm los cov neeg ua luam neeg yuav ncig mus nrhiav neeg nyob hauv txhua lub yeej thoj nam nyob Npees Las Des teb los yog Mias Mas teb, vim lawv xav tau cov me nyuam ntxhais uas dawb thiab hnub nyoog 11 los 12 xyoos. Lawv yuav muab tej yam zoo zoo los nrog cov niam cov txiv sib tham, lawv them nyiaj rau niam rau txiv thiab coj cov me nyuam ntxhais ntawd mus rau Mas Les Xias teb. Ib tug poj niam txhais lus neeg Rohingya tau mus ncig saib ntau lub zos uas yog nws cov hauj lwm, yog tus hais cov lus no. Muaj ntau zaus uas cov neeg txais cov me nyuam ntxhais nkag mus Mas Les Xias teb, lawv muab cov me nyuam ntxhais no mos deev ua ntej yuav xa mus rau tej qhov chaw deb nroog, thiab yuav tej tug txiv neej laus laus uas yog neeg nplua nuj. Cov me nyuam ntxhais no lawv tsuas yog nyob raws lawv txoj hmoo thiab khaws tej nyiaj uas lawv tau. Lawv xav tias yog lawv tab tom pab nyiaj rau lawv niam lawv txiv.

Cov nkauj nyab hnub nyoog mos uas yog neeg Rohingya thiab neeg Npees Las Des feem coob muaj nyob hauv cov thaj tsam deb nroog nyob Mas Les Xias teb. Nws yooj yim dua yuav mus tos lawv hauv cov yeej thoj nam, vim tsis muaj leej twg mus kom rau tub ceev xwm, tsis zoo li nyob hauv nroog uas muaj neeg hu xov tooj mus qhia cov tub ceev xwm thaum muaj tej yam txawv txav.

Tus poj niam neeg Rohingya uas yog tus txhais lus piav tias : lub hauv xyoo no, nws tau ntsib ib tug ntxhais Npees Las Des 17 xyoo. Tus ntxhais ntawd hais tias : tus neeg txais nws coj nws mus hauv ib lub tsev, thiab muab nws mos deev. Deev tas ntshai tsam nws muaj me nyuam, ces tus neeg ntawd yuam kom nws noj ib co tshuaj. Yog tias muaj me nyuam, mas tus me nyuam yuav tsum tuag thiab cov tshuaj ntawd nyob tau hauv nws lub cev ib lis piam. Tus neeg ntawd khiav lawm, tsis muaj leej twg coj nws mus tsev kho mob. Tus ntxhais ntawd quaj quaj thiab muaj neeg nyob ze ntawd hnov, ces lawv thiaj hu tub ceev xwm tuaj pab. Lawv coj nws mus tsev kho mob thiab coj nws mus nyob rau ib lub tsev so ib ntus. Thaum cov tub ceev xwm mus pom nws, nws mus tsis taus kev. Nws lub duav thiab ceg tsis muaj zog, nws pib ua neeg mob siab. Nov yog tus poj niam Rohingya txhais cov lus no rau tub ceev xwm.

Mas Les Xias yog qhov chaw hla ciam teb.

Lub Koom Haum tiv kev ua luam neeg thiab tiv kev nyiag neeg nkag teb chaws ntawm tseem hwv Mas Les Xias tshaj tawm lub 11 hlis tag los no tias : “Lawv tau pab cov me nyuam ntxhais 67 leej dim ntawm kev nyiag neeg mus rau Mas Les Xias teb nyob hauv 5 xyoos tag los. Nyob hauv cov me nyuam raug nyiag no, yog nyiag mus ua neeg thov khawv thiab muag toob xib nyob ntawm tej ntug kev. Hos cov me nyuam me me uas raug nyiag, mas yog coj mus muag.”

Mas Les Xias teb tsis yog lub teb chaws uas txais tos cov me nyuam raug nyiag xwb, tseem yog qhov chaw hla teb chaws thiab. Tsaib no, cov tub ceev xwm zov ciam teb tau nthuav tawm qhia txog cov neeg ua luam neeg uas lawv nyiag me nyuam tuaj ntawm Xis Laas Kas teb tuaj thiab nyiag ua ntaub ntawv mus kev cuav rau cov me nyuam no ua ntej yuav raug xa mus muag nyob Aws Los Pas. Cov neeg ua luam neeg yuav tau txais nyiaj li ntawm 30,000 txog 50,000 Euro, los ntawm ib tug me nyuam ua ntawv mus kev cuav raug xa mus Aws Los Pas teb. Tsis paub tseeb tias cov me nyuam ntawd raug muag mus ua dab tsi nyob Aws Los Pas. Tsis tas li ntawd, cov neeg ntawd tseem nyiag txais cov nkauj nyab hnub nyoog mos hauv kev ua neeg thoj nam Rohingya nyob Npees Las Des thiab Is Ntos Nes Xias teb. Lawv hais tias lawv yuav pab cov nyab ntawd thiab coj mus rau Mas Les Xias teb, kom lawv tau kev nrhiav nyiaj. Cov lus no yog tshaj raws kev ua luam neeg xyoo 2023 nyob Mas Les Xias.

Kev ua luam neeg txhaum cai thiab kev koom tes ntawm cov neeg ua luam neeg, tseem yog teeb meem tseem ceeb hauv cov tub ceev xwm.

Michael hais tias : cov me nyuam ntxhais uas lawv hnub nyoog tsis tau nto 18 xyoo raug xa mus Mas Les Xias uas yog nyiag ntawm cov thaj tsam nyob ze ntug dej Naj Khoom hauv Nyab Laj teb, Mias Mas teb thiab Khas Phus Chas teb, lawv raug muag rau cov tsev ua niam ntiav thiab raug muag rau cov txiv neej nyob thaj tsam ntawd yuav ua poj niam. Xyoo 2018, muaj 2 zaug nyob hauv kev yuav nyab hnub nyoog mos, ua kev kub ntxhov mus txog kev txwv tsis pub yuav cov nyab hnub nyoog mos.

Thawj zaug yog ib tug ntxhais Thaib 11 xyoos, nws raug yuam yuav ua niam 3 ntawm ib tug txiv neej hlais ntoo roj hmab hnub nyoog 41 xyoos. Ib zaug yog tus ntxhais Mas Les Xias hnub nyoog 15 xyoos, raug ib tug txiv neej hnub nyoog 44 xyoos yuav ua niam 2. Ob qho xwm txheej no yog tshwm sim nyob hauv lub nroog Kelantan.

Kev nrhiav txiaj ntsim qab hau ntawm cov me nyuam hauv txhua lub tswv yim.

Michael hais tias : cov Koom Haum ncig tsham teb chaws nkim nyiaj ntau kawg nyob Mas Les Xias teb, kuj yog lawv muaj feem cuam ua kom kev ua luam neeg txhab tuaj. Me nyuam ntxhais yog qhov xav tau nyob hauv tej tsev hu nkauj lom zem thiab tej chaw so xws li : cov Resort, cov tsev hu nkauj Karaoke, tsev zuaj ib ce thiab lwm cov tsev. Tsis tas li ntawd, cov me nyuam ntxhais li hais no kuj raug quab yuam muag cev thiab. Qee tus me nyuam ntxhais saib zoo li lawv lub cev loj dua lub hnub nyoog, ces thiaj tsis muaj leej twg yuav xav txog li. Zoo li cov hnub nyoog 15- 16 xyoo.

Nyob Sabah muaj cov me nyuam ntxhais tsis muaj ntaub ntawv coob kawg, lawv poob nyob hauv kev ua luam neeg. Lawv poob nyob hauv lwm tus kev nrhiav nyiaj xws li quab yuam ua hauj lwm hauv tej vaj txiv ntoo roj. Michael hais ntxiv tias : tseem hwv Mas Les Xias npaj 3 lub tswv yim nyob hauv 5 xyoos. 3 yam hauv kev daws teeb meem ua luam neeg txij xyoo 2010 thiab lub tswv yim 3 yuav tag rau lwm xyoo.

Tab sis tas txhua yam no tseem tsis tau pom muaj dab tsi tshwm sim ntau. Cov neeg nrhiav kev ncaj ncees ntseeg tias : yog tias muaj qhov ruaj khov nyob hauv kev tseev tsim thiab siv txoj cai kom nruj sib npaug, mas nws yuav pab txo kev ua luam neeg tau.