Vaj Qhia Les Os 14 hais lus rau lub Koom Txoos sab hnub tuaj tias lub Koom Txoos Kav Tos Liv xav tau lawv
Nyob hauv hnub tim 14 lub 5 hlis no, Vaj Qhia Les Os 14 qhib rooj txais cov ntseeg txog Yes Xus npuab lub Koom Txoos sab hnub tuaj (Eastern Catholics) nyob hauv Vas Tis Kas, ces tus Tuam Tswv Qhia nyob Kis Yes (Kyiv) uas yog tus thawj coj lub Koom Txoos Hes Las Kav Tos Liv nyob Ua Nkas Zis Nas teb muab daim duab hais txog kev thov Ntuj rau cov tuag (Requiem Prayer) pub rau Vaj Qhia Les Os 14. Daim duab no qhia txog cov neeg Ua Nkas Zis Nas kev txom nyem. Tus kos daim duab no nws tus tub raug tua tuag nyob hauv tshav rog Ua Nkas Zis Nas thiab Lav Xias.
Tos tus Tuam Tswv Qhia pub daim duab no rau Vaj Qhia Les Os 14 vim tias nyob hauv hnub tim 11 tas los ntawd, Vaj Qhia tau nco txog cov Us Nkas Zis Nas kev txom nyem thiab tseem nqua hu kom tseem hwv sib pab tsim kev thaj yeeb nyob hauv lub teb chaws; yam li tso cov neeg raug txim rov mus tsev, tso cov me nyuam rov mus cuag lawv niam lawv txiv.
Vaj Qhia Les Os 14 cov lus hauv hnub ntawd, zoo li ib kuab tshuaj pab cawm cov neeg Us Nkas Zis Nas tus ntsuj plig nyob hauv kev mob hnyav kom ntaug tuag.
Tom qab ntawd, Vaj Qhia Les Os 14 ntsib cov ntseeg hauv lub Koom Txoos sab hnub tuaj nyob hauv chav tsev Vaj Qhia Paj Lug 6. Vaj Qhia xav kom lawv txuag lawv cov kab ke thiab thov Ntuj rau tseem kev thaj yeeb uas yog ‘kev haum xeeb’ (Reconciliation), ‘kev zam txhaum’ (Forgiveness), thiab ‘ua siab tawv’ (Courage) ntxeev thiab pib sau dua lub neej tshiab.
Vaj Qhia Les Os 14 foom lus zoo rau lawv raws li txoj kab ke foom lus nyob hauv caij Hla tias “Leej Pleev sawv rov los! Nws sawv los lawm tiag!” ces Vaj Qhia Les Os 14 hais ntxiv tias “Nej muaj nuj nqis heev (Precious) nyob hauv Tswv Ntuj ncua muag. Thaum kuv ntsia nej, kuv nco txog nej ntau lub hauv paus, nej lub keeb nto moo, thiab tej kev txom nyem ntau tsav uas nej tau ntsib thiab tab tom ntsib.”
Vaj Qhia Les Os 14 kuj rov lees xws li Vaj Qhia Fas Ntshis Kus tau lees tias tsim nyog lub Koom Txoos sab hnub tuaj yuav ‘tshua’ (Cherish) thiab ‘ntaus nqi’ (esteem) txog lawv tej kab ke sab ntsuj plig thiab muaj tswv yim zoo uas lawv tau txuag, thiab tas txhua yam tau pab qhia kom paub txog lub neej ua neeg ntseeg, kev sib sab laj txog kev ntseeg, thiab kab ke teev Ntuj.
Tsis tas li ntawd, Vaj Qhia Les Os 14 tseem txhawj xeeb txog cov kwv tij nyob sab hnub tuaj uas lawv raug ntiab tawm hauv lawv vaj tse mus; tsis yog lawv yuav plam lawv lub teb lub chaw (Native land) xwb, lawv tseem yuav plam hom thawj ntawm lawv kev ntseeg (Religious identity) thiab.
Yog li mas Vaj Qhia Les Os 14 thiaj xav thov lub rooj pwm tsav fab Koom Txoos sab hnub tuaj pab teeb tus txhooj (principle), tus qauv (norm), thiab tus txheej txheem (guideline) kom pab tau cov Tswv Qhia thiab cov ntseeg hauv lub Koom Txoos sab hnub tuaj nyob hauv cov teb chaws lawv thoj nam mus nyob kom lawv txuag lawv cov kab ke.
Vaj Qhia Les Os 14 hais rau cov ntseeg Ntuj npuab lub Koom Txoos sab hnub tuaj tias “Lub Koom Txoos xav tau nej sawv daws. Li ntawd, yog qhov tseem ceeb uas nej yuav tau txuag nej cov kab ke cia, txhob cia ploj mus.”
Yav tas los Vaj Qhia Fas Ntshis Kus tau hais tias cov ntseeg nyob sab hnub tuaj mas lawv yog lub Koom Txoos tim khawv (Martyr Churches) vim lawv ntsib kev kub ntxhov ntau yam. Vaj Qhia Les Os 14 kuj ntsia pom li ntawd thiab nws nrog sawv daws tu siab uas niaj hnub no tseem muaj tsov rog nyob hauv lub Koom Txoos sab hnub tuaj; yam li hauv Teb Chaws Ntshiab, Us Nkas Zis Nas, cheeb tsam Toob Fab Nrab, Tis Nkais, thiab hauv Kaus Kas Xyus.
Yog kom peb tsim hauv cov xwm txaus ntshai no, mas lub Koom Txoos thiaj nqua hu txog txoj kev thaj yeeb. Tsis yog vim Vaj Qhia tab sis yog vim Leej Pleev tus tau hais tias “Kuv pub kuv txoj kev thaj yeeb rau nej.” Li ntawd, Vaj Qhia Les Os 14 thiaj thov sawv daws tias “Nej los peb thov Ntuj rau txoj kev thaj yeeb no ua ke. Txoj kev thaj yeeb no yog kev haum xeeb, kev zam txhaum, thiab ua siab tawv ntxeev thiab pib sau dua lub neej tshiab.”
Vaj Qhia Les Os 14 cog lus yuav muab siab rau txhua txoj kev kom mus txog kev thaj yeeb, Vas Tis Kas kuj yuav ua txhua yam kom coj tau ob tog los sib tham kom tsoom pej xeem ntsib kev hom khaj thiab rov tsa tau kev thaj yeeb lub koob meej.
Vaj Qhia Les Os 14 kuj xa lo lus thov mus rau lub qab ntuj neeg thiab tsoom nom tswv sawv daws kom lawv tig los sib ntsib, sib tham, thiab hais kom haum rau ob tog. Thov kom sawv daws tso tseg kev siv cuab yeej sib ntaus sib tua vim riam phom tsis pab daws teeb meem, tsuas yog ua kom kev sib cov nyom yim hlob yim kub tuaj.
Vaj Qhia Les Os 14 kuj tsis nco ua tsaug Tswv Ntuj uas tau tseb lub noob thaj yeeb rau hauv daim teb thiab tseem ua tsaug cov ntseeg hauv lub Koom Txoos sab hnub tuaj uas tau ua siab loj siab tawv nyob rawv hauv lawv lub teb chaws; lawv tau ua qhov pom kev rau lub ntiaj teb pom tias lawv nyob ruaj hauv lawv txoj kev ntseeg, kev tso siab, thiab kev nyiam. Tsis tas li ntawd, Vaj Qhia Les Os 14 tseem nqua hu cov saib xyuas lub Koom Txoos sab hnub tuaj kom pab txhawb nqa cov koom zej zos pheej xeeb kom lawv ua tau ib lub zos sib raug zoo thiab muaj kev sib pab sib nres.
Vaj Qhia Les Os 14 qhuas txog lub Koom Txoos sab hnub tuaj tias niaj hnub no lawv qhov zoo nkauj yog lawv tsis ib rau ntiaj teb zaj tswv yim thiab txhua tsav yam tsis haum rau kev sib haum xeeb, kom lawv tau pheej xeeb nyob hauv kev mloog lus thiab ua pov thawj txog lub Moo Zoo.
