Vaj Qhia Leo 14 cov lus nthuav ntawv Moo Zoo, hauv kev pib ua Vaj Qhia.
Cov lus nthuav ntawv Moo Zoo, Hnub Chiv tim 18 lub 5 hlis 2025.
Kwv tij zoo nyiam sawv daws !
Kuv thov hais lus rau nej hauv lub siab uas ncaj ncees thiab nyob hauv qhov pib cov hauj lwm ua tub txib ntawm kuv, cov hauj lwm uas kuv tau txais los. Leej Ntshiab Aus Nkus Tis Nus sau tias : “Leej Txiv Tswv Ntuj, koj tsim peb los rau koj thiab peb lub siab yuav tsis tiaj tus mus txog thaum peb tau nyob hauv koj.”
Nyob hauv lub sij hawm no, peb tau ntsib tej kev xav tsis zoo. Vaj Qhia Fas Ntshis Kus txoj kev tuag ua kom peb tu siab ntxhov siab. Hauv tej kev ntxhov siab no, peb pom tias cov neeg uas nyob hauv ntawv Moo Zoo hais tias : “Zoo li cov yaj uas tsis muaj tswv zov.” Hnub Chiv Hla, peb tau txais Yes Xus cov lus foom hmoov zoo kawg. Vim qhov pom kev hauv kev sawv rov los, peb thiaj pom yam uas tshwm sim nyob hauv txhua txhua hnub thiab cia siab tias ; Tswv Ntuj yuav tsis tso nws haiv neeg pov tseg. Tab sis yuav sau lawv thaum lawv tawg ua sab ua sua thiab txuag lawv.
“Zoo li tus Tswv zov yaj uas saib nws pab yaj.”
Vim tus ntsuj plig hauv txoj kev ntseeg no, cov Tswv Qhia Liab thiaj tau sib sau ua lub rooj sab laj loj. Peb tuaj ntawm ntau haiv neeg thiab kev paub sib txawv, peb thiaj muab peb txoj kev xav tso nyob ntawm Tswv Ntuj xub ntiag, hauv kev xaiv ib tug tshiab los tuav Pob Zeb cov hauj lwm. Nws yog tus Tswv Qhia nyob Los Mas. Tus tswv zov yaj uas yuav txuag tau lub cuab tam muaj nqis ntawm cov neeg ntseeg. Ua ke ntawd peb kuj ntsia mus rau yav tom ntej, kom tau tim ntsej tim muag nrog cov lus nug, kev ntxhov siab thiab qhov txaus ntshai ntawm lub ntiaj teb zim txwv no.
Thaum peb sib koom teev Ntuj, peb kuj pom txog kev ua hauj lwm ntawm Leej Ntuj Plig Ntshiab. Nws coj peb mus txog kev sib haum xeeb xws li cov twj paj nruag, kom peb lub siab tshee na mus ua ke. Kuv yog tus raug xaiv, tab sis tsis muaj dab tsi zoo kiag. Tam sim no kuv ntshai thiab ib ce tshee na, kuv tuaj ntsib nej zoo li yog ib tug kwv tij uas xav ua nej tub txib hauv nej txoj kev zoo siab, thiab yuav nrog nej taug Tswv Ntuj txoj kev ua ke. Vim Tswv Ntuj xav kom peb sawv daws sib sau ua ib tug nyob hauv ib tsev neeg. Kev nyiam kev hlub thiab kev sib koom tes yog ob yam hauv cov hauj lwm uas Yes Xus muab rau Pob Zeb. Peb pom nyob hauv zaj ntawv Moo Zoo hnub no, uas coj peb mus rau lub hiav txwv Nkas Lis Lais. Yog qhov chaw Yes Xus pib nws cov hauj lwm uas tau txais ntawm Leej Txiv. Qhov ntawd yog kev ua tus neeg puav ntses thiab puav neeg, kom tau npo neeg tawm los ntawm dej hauv kev phem thiab kev tuag. Thaum mus raws ntug dej hiav txwv, Yes Xus tau hu Pob Zeb uas yog thawj tus Thwj Tim, kom nws ua tub puav neeg xws li Yes Xus. Tom qab Yes Xus sawv rov los lawm, Pob Zeb ua tus thawj coj lawv ua txoj hauj lwm no ntxiv mus. Pov vas ntau zaus, kom tau coj kev cia siab ntawm lub Moo Zoo mus hauv lub ntiaj teb cov dej. Caij nkoj hauv lub hiav txwv muaj txoj sia, kom sawv daws tau mus nyob ntawm Tswv Ntuj xub ntiag.
Pob Zeb yuav ua cov hauj lwm no tau li cas ? Lub Moo Zoo qhia peb tias ua tau kawg, vim nws txoj sia tau chwv Tswv Ntuj txoj kev nyiam kev hlub uas tsis muaj tag. Tab txawm yog lub caij nws piam sij thiab tsis lees txais. Vim li no, thaum Yes Xus hu Pob Zeb, lub Moo Zoo thiaj siv xeem lus Hes Laas tias “agapao”, txhais tias Tswv Ntuj txoj kev nyiam kev hlub uas muab rau peb. Yog kev cev tus kheej yam tsis khuv xim.
Yog lo lus uas teb Pob Zeb hais txog kev nyiam kev hlub ntawm phooj ywg uas peb muaj sib pub. Li ntawd, thaum Yes Xus nug Pob Zeb tias : “Xis Moos, Zam tub tub ! Koj puas nyiam kuv ?” Yes Xus tab tom hais txog kev nyiam kev hlub ntawm Leej Txiv. Yes Xus hais rau Pob Zeb tias : “Tsuas yog thaum koj paub thiab koj chwv txog Tswv Ntuj uas yog Leej Txiv txoj kev nyiam kev hlub xwb, koj thiaj yuav nyiam koj cov kwv tij. Ntawd yog kev muab koj txoj sia rau koj cov kwv tij.”
Li ntawd, Pob Zeb thiaj tau txais cov hauj lwm kom sib nyiam sib hlub ntxiv, thiab zoo siab tuag vim cov yaj. Pob Zeb txoj hauj lwm pom meej tseeb nyob hauv kev nyiam kev hlub uas tus kheej txaus siab tuag, vim lub Koom Txoos nyob Los Mas yog tus coj kev nyiam kev hlub. Thiab lub zog ntawm kev nyiam kev hlub, yog Yes Xus txoj kev nyiam kev hlub. Tsis tau siv lub zog quab yuam leej twg, tsis tau siv lub hwj chim txw leej twg kom los ntseeg, tab sis yog kev nyiam kev hlub uas Yes Xus ib txwm ua.
Pob Zeb hais tias Yes Xus yog lub pob zeb uas nej cov txhim tsev tsis xav yuav. Tab sis zaum no nws yog thawj lub pob zeb txheem lub tsev. Yog tias lub pob zeb yog Yes Xus, Pob Zeb yuav tsum saib cov yaj tsis pub kom poob hauv kev sim siab, kom dhau los ua tus muaj hwj chim. Kev nyob ua ke ntawm ntau yam raws Leej Ntshiab Aus Nkus Tis Nus cov lus tias : “Lub Koom Txoos muaj sawv daws nyob sib xyaws nrog nyias tej kwv tij thiab nyias tej txheeb ze.”
Kwv tij sawv daws ! Kuv xav kom thawj yam kev xav ntawm peb, yog lub Koom Txoos uas sib koom ua ib tug. Nws yog lub Cim ntawm kev sib koom tes thiab kev ua ib tug, uas yuav rais ua ntiaj teb kev rov sib haum xeeb. Hauv tiam neeg no, peb tseem pom kev sib txeeb sib tawg ntau, lub qhov txhab uas tshwm sim los ntawm kev sib ntxub, kev phem yav tag, kev ntshai uas sib txawv thiab kev lag luam uas txeeb txhua yam hauv lub ntiaj teb thiab thawb cov neeg pluag txom nyem tawm mus.
Ntawm peb, peb xav ua tus nplaim taws me me ntawm kev sib koom tes, kev sib koom tes thiab kev ua kwv tij nyob hauv lub ntiaj teb. Peb xav qhia lub ntiaj teb hauv kev ua neeg me thiab kev zoo siab. Thov saib Yes Xus Pleev, thiab txav mus ze nws. Tos txais nws lub Moo Zoo uas ci pom kev thiab nplij siab. Mloog Tswv Ntuj txoj kev nyiam kev hlub thiab nrog nws koom ua ib yig nyob hauv Yes Xus tib tug, ces peb yog ib tug. Nov yog txoj kev taug ua ke nyob hauv peb, thiab hais txog lub Koom Txoos uas yog peb cov kwv tij nrog rau cov teev lwm txoj kev ntseeg, nrog cov poj niam thiab txiv neej txhua tus uas lawv muaj kev xav zoo, kom tau tsim lub ntiaj teb tshiab uas nyob thaj yeeb mus ib txhis.
Nov yog tus ntsuj plig hauv kev tshaj lub Moo Zoo uas yuav txhib peb. Tsis yog kaw tus kheej nyob hauv tej pab tsawg tsawg ntawm peb, ua kom peb xav tias tus kheej siab dua lub ntiaj teb. Peb raug hu kom xa kev nyiam kev hlub ntawm Tswv Ntuj mus rau lwm tus, kom kev sib koom tes tiav txhob sib tawg. Kom muaj nqis rau txhua txhia tus thiab tej kab lis kev cai hauv zej zog, thiab txhua txhia tus txoj kev teev hawm.
Kwv tij sawv daws ! Nov yog lub sij hawm hauv kev nyiam kev hlub. Lub Moo Zoo lub plawv, yog Tswv Ntuj kev nyiam kev hlub uas ua kom peb ua kwv tij. Ib yam li Vaj Qhia Leo 13 tus xub ua Vaj Qhia ua ntej kuv. Peb rov nug tus kheej tau nyob hauv hnub no tias ; yog txoj kev no yeej lub ntiaj teb, txhua txoj kev sib tawg yuav nres tas thiab kev thaj yeeb puas rov muaj ?
Vim qhov pom kev thiab ruaj khov ntawm Leej Ntuj Plig Ntshiab, peb los tsim lub Koom Txoos nyob hauv Tswv Ntuj kev nyiam kev hlub. Lub Cim ntawm kev sib koom tes, lub Koom Txoos tub tshaj Ntuj Lus uas xyab tes rau lub ntiaj teb. Tshaj lub Moo Zoo, cia tus kheej tsis tau nyob kaj siab. Rais ua kev sib koom tes ntawm ib tsoom neeg. Thov peb sib koom ua ib tug hauv kev ua kwv ua tij mus cuag Tswv Ntuj thiab sib nyiam sib hlub mog !
Kwv tij Hmoob sawv daws ! Hnub no peb tham txog Vaj Qhia Leo 14 cov lus nthuav ntawv Moo Zoo los xaus li no xwb. Thov Huab Tais Yes Xus Pleev lub txiaj ntsim nrog nej nyob, ua nej siab kaj lug ! Peb mam sib ntsib dua, nej sawv daws nyob zoo !
