Kev nplua nyiaj ntawm Nyab Laj teb, hais txog kev quab yuam cov me nyuam yog ib lub Cim ceeb toom.

Kev nplua nyiaj ntawm Nyab Laj teb, hais txog kev quab yuam cov me nyuam yog ib lub Cim ceeb toom.

Tsab cai tshiab no tej zaum yuav daws tau tej kev quab yuam uas ntsia tsis pom. Yog tias cov niam cov txiv, cov xib hwb thiab zej zog tseem coj rawv qhov yuav pauv ntxeev. Yog thawj zaug uas Nyab Laj teb tau teeb txoj cai muab txim rau cov niam cov txiv, uas lawv quab yuam lawv tej me nyuam kawm ntawv hnyav dhau lub peev xwm. Raws li tseem hwv tsab cai tshiab uas yog ib feem ntawm kev tswj hwm tshiab hais txog kev ua phem hauv tsev neeg, teeb meem zej zog thiab tsoom pej xeem kev noj qab nyob zoo. Kev quab yuam cov neeg hauv tsev heev dhau, nws yog kev ua phem rau lub siab ntsws. Yuav raug nplua 5-10 plhom dong los yog 200 txog 400 US dos las. Kev tsis quav ntsej los yog tsim txom lub cev hauv tsev neeg thiab lwm yam, xws li tsim txom cov laus, cov poj niam cev xeeb tub thiab cov tuag tes tuag taw. Yuav raug nplua nyiaj siab li ntawm 20 plhom dong. Txoj cai no xav tias yog kev lees txais raug cai thawj zaug tias : “Kev quab yuam hauv kev kawm”, yog ib yam kev phem. Nws tsis haum rau Khoov Fum Txws tej kev cai uas thov kom mloog cov niam cov txiv hais thiab ntsia pom tias kev kawm yog lub luag hauj lwm ntawm cov laus.

Kev ntsia pom tias kev quab yuam hauv kev kawm yog ib yam kev phem hauv tsev neeg. Ua kom pom txog kev txhawj xeeb hauv kev vam meej uas txaus poob siab, nws tab tom ua kom cov tsev neeg Nyab Laj ntxhov siab kawg. Yog kev quab yuam uas tsis yog los ntawm cov niam cov txiv xwb, tab sis yog los ntawm fab kev kawm thiab. Raws kev soj ntsuam ntawm lub pwm tsav kev kawm thiab kev qhuab qhia xyoo 2024, pom tias 67 feem pua ntawm cov me nyuam kawm ntawv qib nrab ntxhov siab ua ntej lawv yuav muaj kev sib twv hauv tsev kawm ntawv. Thiab ib feem plaub ua tawm txog qhov lawv ntsoos, lub sij hawm kawm ntawv zoo li ntev heev. Tej ntaub ntawv coj rov mus ua hauv tsev tshuav ntau kawg thiab kev kawm Online muaj ua ntu zus. Ua rau cov me nyuam coob leej ntxhov siab, lawv pw tsis txaus thiab lub cev sab.

Nyob hauv 10 xyoo dhau los, muaj ib tug tub kawm Nyab Laj tau txais qhov paj tshab txiaj kub 112 lub, txiaj nyiag 140 lub thiab txiaj tooj liab 89 lub. Nws kuj tau txais ntawv pov thawj 21 daim hauv kev sib tw Olympic ntawm cov teb chaws, fab kob cuj, physics, chemistry, biology thiab informatics. Nyab Laj tau tim ib, tab sis tsis muaj ib tug tau txais qhov paj tshab Nos Npes li. Tsis muaj kev tshawb fawb uas ntiaj teb lees txais, thiab tsuas muaj ob peb tus neeg tsim tawm uas tau hloov lub ntiaj teb xwb. Kev kawm tau tsim cov tub kawm tshaj lij hais txog kev sib tw, tsis yog cov neeg muaj tswv yim. Txoj cai no qhuas txog kev paub cai thiab kev muab siab rau kawm, tab sis tsis meej tseeb rau tej kev xav. Yog qhov khoob ntshuv uas tsis muaj qhov paj tshab twg los txhaws kom puv tau.

Yog tias cov me nyuam muaj caij so txaus, mas kev xav paub xav pom ntawm lawv kuj yuav rov qab los. Cov nyiam ncaws pob, cov ntaus paj nruag los yog cov kos duab, lawv yuav txhim kho lawv lub tswv yim thiab kev txawj ntse hauv zej zog tau zoo dua lwm tus phooj ywg uas nyob rawv hauv kev kawm thiab kev sib tw nkaus xwb.

Kev kawm tseeb tiag tsis yog qhov twv kom yeej, tab sis yog kev txhim kho hauv kev ua neeg. Kev ua tiav tsis yog nyob ntawm kev kawm tau zoo, tab sis yog kev ua lub neej kom muaj qab hau, txawj nyiaj txawj uv thiab sawv ntseg thaum muaj kev piam sij.

Kwv tij Hmoob sawv daws ! Hnub no peb tham txog kev nplua nyiaj nyob Nyab Laj teb, hais txog kev quab yuam cov me nyuam kawm ntawv hnyav dhau los xaus li no xwb. Nej cov uas yog niam thiab txiv, thov nej muab siab rau qhuab qhia nej cov me nyuam hauv kev khuv leej, kev sib pom dej siab thiab hauv kev nyiam kev hlub. Nej tsis txhob yuam lawv rau kev kawm hnyav tshaj nej cov hauj lwm. Cia nej cov me nyuam tau so kom txaus, ces lawv tsis mob paj hlwb thiab lub tswv yim yuav khiav zoo. Txawj xav yam zoo thiab tsis ntxhov siab tsis muaj qhov npau taws. Vim kev kawm tsis yog kev sib tw kom yeej thiab tau tus zauv zoo xwb, nws tseem yog kev nrog zej zog sib fim, paub cai thiab muaj kev khuv leej nrog kev nyiam kev hlub thiab.

Thov Huab Tais Yes Xus Pleev lub txiaj ntsim nrog nej nyob, qhib nej lub siab kom nthuav dav hauv kev nyiam kev hlub. Thov Yes Xus ua nej lub siab kaj lug. Lwm zaus peb mam sib ntsib dua, nej sawv daws nyob zoo !