Kev txwv tsis pub nyeem phau Ntawv Ntshiab nyob Saas Hais, ua rau muaj kev txhawj xeeb
Muaj xov xwm tshaj tias cov tseem hwv Suav ua nruj heev txog kev txwv muag Ntawv Ntshiab thiab txwv ua cov kab ke hauv kev ntseeg. Xws li kev tawm rooj fiv ntuj, kev tso tawm kev teev Ntuj nyob Online thiab cov kab ke pam tuag Kav Tos Liv nyob Saas Hais. Dhau no lawm cov tsev teev Ntuj Plos Tes Taas kuj raug kev txwv nruj dua qub thiab. Kev ntseeg Kav tos Liv thiab Plos Tes Taas yog ib hauv 5 txoj kev teev hawm uas raug lees txais nyob Suav teb. Tab txawm Suav txoj cai yuav lees txais kev twj lij ntawm cov kev teev hawm raug cai, tsis kav cov kws xyav moo hais tias : “Cov kab ke hauv cov kev teev hawm tseem nyob hauv qab txoj cai, thiab kev saib xyuas ntawm cov tseem hwv Suav nruj kawg.”
Lub Koom Haum kev ntseeg thiab lub Koom Haum nyiam teb chaws uas tau txais lus tso cai ntawm tseem hwv, muaj cai kav cov thaj tsam teev hawm, cov neeg ntseeg, kev luam ntaub ntawv thiab tej hauj lwm hauv kev ntseeg ntau kawg. Cov Mawv Xis Lim tshwj xeeb tshaj yog cov Us Yis Kus thiab cov Phus Thas nyob Tis Npes, kuj raug txwv los ntawm txoj cai cov haiv neeg tsawg, xws li kab lis kev cai thiab kev tseev tsim. Kev txwv zaum kawg no tau ua kom rov muaj kev txhawj xeeb hais txog cov neeg ntseeg hauv kev ua lawv tej kab ke. Ntawv Ntshiab yog qhov tseem ceeb rau cov neeg ntseeg Kav Tos Liv thiab Plos Tes Taas. Kev ua tej kab ke kuj yog qhov tseem ceeb hauv kev teev hawm ntawm cov Kav Tos Liv. Kev txhawj xeeb hais txog kev cheb ntxuav cov kev teev hawm muaj los ntau caum xyoo lawm. Tswv Qhia James Su Zhimin nyob Baoding ploj nyob hauv xyoo 1996, yog tom qab nws coj cov neeg ntseeg mus tawm rooj fiv Ntuj nyob ntawm Niam Mab Liab tus mlom nyob Donglu, hauv lub xeev Hawv Pem. Txog tam sim no tsis muaj leej twg paub tias Txiv Plig nyob qhov twg.
Ob peb xyoos tom qab cov thawj coj Plos Tes Taas coob leej kuj raug ntes, nrog rau cov thawj coj uas muaj feem cuam txog lub Koom Txoos Zion thiab lub Koom Txoos Early Rain Covenant. Kev ntes Txiv Plig thiab lwm tus thawj coj raug xyav moo los ntawm cov neeg txhawb nqa kev twj lij txawv teb chaws. Txiv Plig Ezra Jin Mingri tus coj lub Koom Txoos Zion raug tso tawm tom qab nws raug ntes kaw li 8 lub hlis, thiab nws kuj khiav tawm hauv Suav teb. Nws hais tias cov neeg ntseeg thiab lwm cov neeg ntseeg raug txwv thiab raug cov tseem hwv quab yuam heev kawg. Cov kws xyav moo ua kom pom txog lub hom phiaj ntawm tus kws lij choj pab cov thawj coj kev ntseeg uas raug ntes tias : yog pov thawj ntawm kev muab siab rau dav kawg hauv kev txwv kev twj lij ntawm cov neeg ntseeg. Kev txwv no tau ua rau muaj kev taij thov kom cov tseem hwv Suav hwm kev twj lij ntawm cov kev teev hawm uas raug lees txais nyob hauv tseem hwv tsab cai nqe 36. Thiab kheev kom cov Kav Tos Liv thiab lwm cov kev teev hawm ua lawv tej kab ke tau ywj siab, uas tsis muaj kev phem cuam tshuam los ntawm tseem hwv Suav.
