Is Ntias teb : Cov hauj lwm hauv chav tsev ua zaub mov noj, tau coj ib tug ntxhais hluas hauv lub xeev Odisha mus rau kev ua Leej Phauj.
Leej Phauj Chandrika Pradhan ntawm lub Koom Haum Leej Phauj Carmel los yog CMC, thiab 56 tus Leej Phauj tau cog lus ua Leej Phauj mus tas ib sim neej hauv hnub tim 25 lub 5 hlis xyoo 2026, nyob hauv lub xeev Kerala. Tom qab ntawd hnub tim 13 lub 6 hli lawv tau ua ib thaj txi Ntuj ua Tswv Ntuj tsaug nyob hauv lub zos Somagota uas yog lub zos nws yug los. Muaj cov neeg ntseeg thiab cov qhua tuaj koom ua kev zoo siab ntau pua leej nyob hauv lub thaj txi Ntuj.
Leej Phauj Chandrika yug nyob hauv xyoo 1995. Tom qab nws kawm tiav qib nrab xyoo 4 xyoo 2013, mas nws tau mus rau lub nroog Angamaly uas nyob hauv lub xeev Kerala, kom tau pab cov hauj lwm ua zaub mov noj rau cov Leej Phauj. Kev tau nyob ze cov Leej Phauj, ua rau nws maj mam pom txog lub suab hu nws.
Nws hais tias : “Leej Phauj Jeya Rose hauv lub Koom Haum cov Leej Phauj Carmel yog tus txhawb dej siab rau kuv, ces ua rau kuv maj mam pom txog lub suab hu hauv kev ua Leej Phauj. Kuv ua Tswv Ntuj tsaug rau lub suab hu muaj nuj nqis no.”
Nws cog lus thawj zaug hauv xyoo 2019, ua ntej nws yuav cog lus mus tas ib sim neej nyob hauv xyoo no. Txiv Plig Michael Behera tus coj lub Txoos ua Tswv Ntuj tsaug tau hais tias : “Kev ua hauj lwm hauv niaj hnub yuav coj mus txog lub suab hu tau li cas ? Ntawm Tswv Ntuj mas tsis muaj ib yam twg ua tsis tau. Nws tuaj yeem hloov lub neej niaj hnub kom rais ua lub neej tshwj xeeb tau.”
Yos Xes Pradhan uas yog Leej Phauj txiv hais tias : “Qhov uas nws tus ntxhais muaj feem cuam txog tsev teev Ntuj cov hauj lwm, kev teev Ntuj thiab tau koom thaj txi Ntuj txhua txhua hnub, yog qhov txhawb nqa nws tus ntxhais kom muab tus kheej los cev rau Tswv Ntuj thiab ruaj khov tuaj.” Lub Koom Haum cov Leej Phauj Carmel, txhim tsa nyob hauv xyoo 1866 nyob Kerala. Yog thawj pab Leej Phauj uas teeb tsa los ntawm cov neeg ntseeg nyob hauv lub tsev teev Ntuj Syro Malabar. Tam zim no muaj 6,000 tus Leej Phauj tshaj lub Moo Zoo nyob hauv 19 lub teb chaws nyob thoob ntiaj teb. Tam sim no Leej Phauj Chandrika ua hauj lwm nyob hauv lub xeev Meghalaya, nyob Is Ntias toob fab pej.
