Tus thawj tswj lub pwm tsav Tswv Qhia As Xias (FABC), tham txog lub zeem muag yav tom ntej rau lub Koom Txoos As Xias ua ntej yuav sab laj.
Lub rooj sab laj no yog tsa nyob Jakarta hauv Is Ntos Nes Xias teb, txij hnub tim 20-26 lub 7 hli. Hauv lub ntsiab lus ‘‘Kev nqua hu kom tig los yuav lub siab tshiab raws lub pwm tsav txoj cai thiab cov hauj lwm hauv kev ua tus choj, thiab ua tus tuam coj nyob As Xias.” Yuav sau tas cov Tswv Qhia los xav txog kev ua hauj lwm ntawm lub Koom Txoos raws qhov tseeb hauv cov zej zog, hauv tej kab lis kev cai, hauv kev lag luam thiab cov kev ntseeg uas hloov mus nyob hauv xeev ntuj.
Hauv kev sib tham nrog Radio Veritas Asia, mas Tswv Qhia Ferrao hais tias :
“Lub Koom Txoos raug hu kom txhawb nqa kev thaj yeeb, kev sib haum xeeb thiab kev sib tham ntawm txhua yam kev txhawj xeeb. Xws li kev tsiv teb tsaws chaw, kev poob qab, kev piam sij ntawm txhua yam nyob ib puag ncig thiab cov kev ntseeg sib txawv.”
Tswv Qhia hais tias : “Vim Synodality mas lub Koom Txoos yuav ua tus choj txhawb nqa kev sib tham, kev sib haum xeeb thiab kev sib luag ntawm tib neeg hauv tej kab lis kev cai thiab lwm cov kev teev hawm. Uas yog tau txais kev txhawb siab los ntawm lub rooj sab laj lo lus hauv ntawv Moo Zoo tias : “Nej yuav tau pom tej yam loj dua no.” Yog lo lus nyob hauv Zam ntawv Moo Zoo, zaj 1 qib 50.
Tswv Qhia tau hais txog 5 yam tseem ceeb ntawm lub rooj sab laj no, xws li kev rov xav txog lub Koom Txoos cov hauj lwm nyob As Xias, kev tuav xam txog qhov tseem ceeb hauv kev tshaj Ntuj Lus, kev txhawb nqa kev sib koom tes ntawm cov Tswv Qhia, kev txhawb nqa kev sib tham thiab kev tsim kev thaj yeeb hauv cov kev teev hawm, thiab kev sib koom tes ntawm cov Tswv Qhia hauv kev txhawb nqa kev sib tham thiab tsim kev thaj yeeb. Dhau no lawm nws tseem vam tias lub rooj sab laj zaum no yuav ua kom muaj tsab ntawv kawg uas yog kev ua ntawm Synodality nyob As Xias thiab qhib txoj kev rau cov tsev teev Ntuj hauv zej zog nyob thoob xeev ntuj.
Tswv Qhia Ferrao hais tias : “Lub rooj sab laj zaum no yog lub zoo caij rau cov Tswv Qhia tau kev sib mloog thiab sib faib yam lawv ntsib nyob hauv kev tshaj Ntuj Lus. Thiab tau paub txog ntau yam tseeb ntawm cov tsev teev Ntuj hauv tej zej zog nyob thoob As Xias. Nws hais tias kev sib koom tes ntawm cov Tswv Qhia, yog qhov tsim nyog hauv kev daws teeb meem ua ke thiab tsim pov thawj ntawm lub Koom Txoos nyob hauv xeev ntuj.” Nws hais tias kev sab laj zaum no yog xav txhawb nqa cov Txiv Plig kom muaj feem cuam ntau tuaj. Cov Txiv Plig thiab cov neeg ntseeg cov hauj lwm hauv lub Koom Txoos, yog los ntawm kev sib mloog thiab kev lees txais ua ke. Tswv Qhia tseem hais ntxiv tias : “Leej Ntuj Plig Ntshiab yuav coj kev tuav xam thiab pab qhia txoj kev tshiab hauv kev tshaj lub Moo Zoo thiab txhawb nqa kev qhia kev ntseeg.” Nws vam tias lub rooj sab laj zaum no, yuav txhawb nqa kev muab siab rau ntawm lub Koom Txoos hauv lub Cim kev cia siab, kev sib haum xeeb thiab kev muaj vaj huam sib luag ntawm tsoom pej xeem nyob As Xias.
Thaum xav txog yav tom ntej, Tswv Qhia Ferrao hais tias : “Kev sab laj zaum no yog qhov tsim nyog hauv kev sib cog kev phooj ywg ntawm lub Koom Txoos As Xias. Txhawb nqa kev tshaj lub Moo Zoo, kom yog qhov tseeb uas tshwm sim tshiab thiab txhawb kev muab siab rau txog lub Koom Txoos kev sib tham, kev ncaj ncees, kev thaj yeeb thiab lub meej mom hauv kev ua neeg.”
