Lo lus hauv lub neej, lub 8 hli 2025.
“Nej txhab kub nyob qhov twg, nej lub siab kuj yuav nyob qhov ntawd.”
(Lus Kas 12 : 34)
Leej Ntshiab Lus Kas tus sau ntawv Moo Zoo tau piav tias : Yes Xus hais lo lus no rau nws cov Thwj Tim thaum lawv tab tom mus hauv Yes Lus Xas Les, uas yog qhov chaw Yes Xus yuav ntsib kev txom nyem, kev tuag thiab kev sawv rov qab los. Thaum lawv tab tom mus kev, Yes Xus hu lawv ua “pab me yaj.” Thiab nws qhia qhov tob hauv nws fab ntsuj plig rau lawv. Qhov tob hauv Yes Xus no, yog kev tso tag txhua yam hauv lub ntiaj teb no tseg, thiab tso siab rau Tswv Ntuj txoj kev khuv leej. Kom ceev faj thiab npaj txhij tos txog hnub Tswv Ntuj lub Ceeb Tsheej tuaj txog.
Ua ntej Yes Xus yuav hais lo lus no, Yes Xus xub qhia nws cov Thwj Tim kom lawv tsis txhob ntshaw kev nplua nuj. Txhob txhawj xeeb txog tus kheej txoj sia.
Yes Xus hais tias kom lawv txhob txhawj txog yam ub yam no, vim nej Txiv nyob saum Ntuj paub tias nej xav tau dab tsi. Nej xub nrhiav Tswv Ntuj lub Ceeb Tsheej tso, nej ceev kev nplua nuj nyob saum Ntuj. Muaj tseeb tiag uas Yes Xus puas tau txhawb kom peb saib tej yam hauv ntiaj teb no rau qhov tsis zoo ? Yes Xus xav kom peb tso kev txhawj xeeb, kev ntxhov siab thiab kev ntshai pov tseg.
“Nej txhab kub nyob qhov twg, nej lub siab kuj yuav nyob qhov ntawd.”
Lo lus “siab” hauv no, yog hais txog qhov nruab nrab hauv ib tug neeg txoj sia. Yog lub hom phiaj ntawm txhua tus lub neej. Yog qhov peb ntsib qhov tseeb tiag, tsis yog kev ntxias dag los lam ua txuj. Qhov no qhia txog kev npaj siab tseeb tiag ntawm peb. Yam uas peb xav nyob hauv nruab siab, yam uas peb ntseeg los yog yam uas peb xav tau. Kev nplua nuj yog yam uas peb xav tias muaj nqis tshaj txhua yam, ces peb ntseeg qhov no. Vim nws muab kev ruaj khov rau peb tam sim no thiab yav tom ntej.
Vaj Qhia Fas Ntshis Kus tau sau tseg tias : “Hauv lub ntiaj teb uas muaj kev muas los thiab muag tas mus li, muaj neeg paub tias ; yus qhov muaj nqis yog nyob hauv yam yus ceev tseg hauv lub hwj chim thiab nyiaj txiag. Peb paub tias yuav muas kom peb muaj siv. Peb raug kev lag luam kav, tsis pub kom peb ntsia pom qhov tseem ceeb thiab yam uas yog lub ntsiab hauv lub neej.” Qhov tob tiag nyob hauv tib neeg lub neej, peb tseem nrhiav kev sov siab uas tsis ua rau peb tag kev cia siab. Vim kev nplua nuj nyob ntiaj teb no tsis ua kom peb txawj txaus.
Keira Lubick tau sau tseg tias : “Yog lawm, ntawd yog yam uas koj nrhiav nyob hauv koj lub siab. Koj nrhiav yam tsis muaj tas, yam uas tsis txawj tuag, kev cia siab uas tsis tag kev cia siab, kev ntseeg tias yuav dim ntawm qhov tsaus ntuj txoj kev tuag, thiab ua qhov pom kev rau cov neeg muaj kev ntseeg. Koj tsis tau vam txog yam tsis muaj kev cia siab. Koj tsis tau ntseeg yam tsis muaj nyob tiag, tab sis koj muaj kev cia siab, muaj kev ntseeg, kom tau nyiam tau hlub.”
“Nej txhab kub nyob qhov twg, nej lub siab kuj yuav nyob qhov ntawd.”
Lo lus no ua kom peb rov xav txog kev ncaj ncees dua tias : kev nplua nuj ntawm kuv yog dab tsi ? Kuv saib yam twg muaj nqis tshaj ? Tej zaum nws yuav muaj ntau lo lus teb, xws li kuv xav tau kev nplua nuj fab nyiaj txiag, kuv xav muaj suab nto npe, xav kom ua dab tsi los tiav thiab muaj hwm chim.
Kev paub qhia peb tias; peb yuav rov tig mus nrhiav peb lub neej tseeb tiag. Txhob mus rau ub rau no, tab sis kom peb tig los nrhiav kev nyiam kev hlub tseeb tiag raws ntawv Moo Zoo qhia.
“Kev ua neeg ntseeg, kev sib raug zoo ntawm peb nrog kwv tij phooj ywg ntawd, thov kom peb ua neeg zoo, muaj kev khuv leej, ua neeg me thiab ua tiag uv nws tsis tau txaus. Peb yuav tsum muaj kev nyiam kev hlub xws li Yes Xus qhia peb.
Kev hlub li no, tsis yog tias npaj pub txoj sia, tiam sis yog yuav tsum pub txoj sia.”
Peb yuav nyiam kwv tij phooj ywg txhua tus uas peb tau ntsib nyob hauv txhua txhia hnub. Tsis hais hauv peb tsev neeg, hauv tej chaw ua hauj lwm los yog lwm qhov chaw. Vim txoj kev hlub no, peb lub neej loj hlob tsis yog nco txog tus kheej, tab sis yog nco txog lwm tus lub neej kev loj hlob, mas peb yuav ntsib kev thaj yeeb tiag.
Cov lus no sau los ntawm pab neeg lo lus pub txoj sia.
