ZAJ NYEEM HNUB TIM 18 LUB 3 HLIS 2025
HNUB NCO TXOG LEEJ NTSHIAB XIS LIS NYOB YES LUS XAS LES
(HX 1:10, 16-20; MT 23:1-12)
Kwv tij Hmoob sawv daws, lub ntsiab hauv Huab Tais Yes Xus cov lus hnub no mas yog kom peb muab tas lub neej los ua tim khawv txog peb txoj kev ntseeg. Yog peb ntseeg leej twg mas peb yuav mloog thiab ua raws li nws qhia kom peb ua, tsis yog mloog tab sis tsis ua raws. Ib yam li cov Fas Lis Xais lawv mloog Mais Xes cov lus qhia tab sis lawv tsis ua raws li Mais Xes qhia, ces Huab Tais Yes Xus thiaj hais tias “Nej ua tas txhua yam cov Fas Lis Xais qhia thiab nej khaws huv tib si, tab sis nej txhob ua raws li lawv.”
Niaj hnub no yog peb muab piv rau peb txoj kev ntseeg txog Yes Xus mas peb piv tau tias cov Fas Lis Xais zoo puav tam li cov Leej Choj, cov Leej Phauj, cov Xib Hwb los cov Thawj Coj hauv lub Koom Txoos, hauv pawg ntseeg, hauv tsev teev Ntuj. Sawv daws yog cov coj cov qhuab qhia cov pej xeem ntseeg. Li ntawd, Huab Tais Yes Xus cov lus no thiaj tsis yog hais rau cov Fas Lis Xais txheej thaud xwb, tseem yog hais rau peb sawv daws hauv lub Koom Txoos niaj hnub no thiab.
Peb muab xav saib niaj hnub no peb puas ua li cov Fas Lis Xais, lawv mas lawv mloog Mais Xes ces lawv muab Txoj Cai ntim rau hauv tej lub txws coj nraim kom lawv lub cev npuab raws Txoj Cai, lawv sau Txoj Cai rau ntawm cov tw ntxhoo kom tau nco txog cov lus hauv Txoj Cai tas mus li, kom Mais Xes Txoj Cai ntuas lawv siab tsis tseg kom lawv txhob ua hla Txoj Cai. Niaj hnub no peb puas ua zoo li ntawd, peb coj rawv phau Ntawv Ntshiab, coj rawv txoj saw sai Yes Xus tus Ntoo Cuam, peb nco ntsoov Huab Tais Yes Xus cov lus tuaj nruab siab, los peb ua Ntoo Cuam Lub Cim tsis tseg. Tab sis peb tsis nco tias peb puas tau mloog thiab ua raws li cov lus Huab Tais Yes Xus qhia, peb puas tau yoog Huab Tais Yes Xus tus piv txwv.
Peb ntsia tus Ntoo Cuam muaj Huab Tais Yes Xus ntsia nyob ntawd, peb ua Ntoo Cuam lub Cim, qhov ntawd puas deeg txog peb peb siab kom ras tau tias peb tsum ua raws li Huab Tais Yes Xus kev nyiam Tswv Ntuj thiab hlub peb.
Yog peb lam coj phau Ntawv Ntshiab kom luag pom tias peb nyiam Tswv Ntuj Lo Lus, peb lam coj tus Ntoo Cuam kom luag pom tias peb yog ib tug ntseeg txog Yes Xus, peb lam ua Ntoo Cuam lub Cim kom luag paub tias peb npuab lub Koom Txoos Kav Tos Liv xwb, mas peb puas tab tom yoog raws cov Fas Lis Xais tus piv txwv?
Muab ntau leej hais tias peb mas peb yog Txiv Plig, yog Phauj, yog Xib hwb, yog neeg ntseeg tab sis peb kuj yog neeg xwb, peb zoo tsis tas, li ntawd nej mloog peb hais tab sis nej txhob ua li peb.
Ntshai peb txhob hais li no ntxiv, vim lo lus no mas zoo li peb tsis tso siab rau peb tias peb yuav ua tau ib tim khawv txog peb txoj kev ntseeg txog Yes Xus rau luag lwm tus pom.
Peb txhob hais ntawm ncauj tab sis tsis ua, peb yuav xub ua ua ntej mas hais ntawm ncauj vim Huab Tais Yes Xus hais rau peb nyob hauv hnub no tias “Nej yuav txo nej kom qis, nej yuav ua luag tej tus tub txib.”
Nyob zoo sawv daws.
ZAJ NYEEM HNUB TIM 19 LUB 3 HLIS 2025
HNUB HWM LEEJ NTSHIAB YOS XES
(2 XM 7:4-5, 12-14, 16; LM 4:13, 16-18, 22; MT 1:16, 18-21, 24)
Kwv tij Hmoob, hnub no lub Koom Txoos hwm Yos Xes uas yog Mab Liab tus txiv. Leej Ntshiab Yos Xes yog tus vaj Das Vis cov xeeb ntxwv tuaj puag tom qab. Tswv Ntuj xaiv nws los ua Yes Xus txiv kom muaj tuaj raws li Tswv Ntuj xub hais rau Das Vis tias “Thaum koj sim neej dua tas koj yuav mus nrog koj cov poj yawm txwv koob pw, kuv yuav cia koj ib tug xeeb ntxwv tawm ntawm koj roj ntsha los hloov koj ua vaj. Kuv yuav nres nws txoj kev ua vaj kom nyob ruaj nreb. Kuv yuav ua nws txiv, nws yuav yog kuv leej tub.”
Yos Xes lub npe muaj lub ntsiab tias Huab Tais ntxiv rau; yog li mas Yos Xes thiaj yog tus ntxiv kom Tswv Ntuj cov lus cog tias yuav xa ib tug tuaj cawm Tswv Ntuj haiv neeg tsheej xeeb tau, vim Tswv Ntuj siv Yos Xes los ua tus pov hwm thiab saib xyuas Tswv Ntuj Leej Tub thaum tseem yau kom hlob loj nyob hauv txoj kev paub Tswv Ntuj.
Kwv tij, peb hais tias ‘Tswv Ntuj siv Yos Xes’ vim tsis yog Yos Xes xaiv ua Mab Liab tus txiv thiab ua Yes Xus txiv, tiam sis yog Tswv Ntuj hu Yos Xes los ua txoj hauj lwm ntawd. Yos Xes tso siab rau Tswv Ntuj mas nws thiaj mloog thiab ua raws li Tswv Ntuj txib nws. Nyob hauv lub Moo Zoo peb thiaj hnov hais tias thaum Yos Xes paub tias Mab Liab xeeb tub mas nws txiav siab nrauj Mab Liab tab sis tus Tshiab los ua npau suav rau nws tias “Yos Xes, koj txhob ntshai coj Mab Liab koj tus poj niam los nyob hauv koj tsev. Yog Leej Ntuj Plig Ntshiab ua kom nws xeeb tub.” Yos Xes tsim los, nws ua raws li tus Tshiab hais, nws coj Mab Liab los nyob hauv nws tsev.
Qhov no yog qhov peb yuav kawm ntawm Leej Ntshiab Yos Xes; tso siab rau Tswv Ntuj siv peb mus raws li Tswv Ntuj pom zoo, txhob ua raws li peb xav.
Tus neeg ncaj mas nws ua raws qhov ncaj, nws ua raws li qhov yog tab sis hnub no peb pom tias tus neeg ncaj tiag mas yog tus ntseeg thiab tso siab rau Tswv Ntuj Lo Lus xws li Leej Ntshiab Yos Xes. Txoj cai mas kom lawv xuas pob zeb txawb cov poj niam tsis muaj txiv muaj me nyuam, txoj cai mas tus txiv neej twg yuav luag poj niam mas yog nws zes luag poj luag sev, txoj cai mas tus txiv neej twg yuav luga lub cuab tam los ua nws tug mas yog nws ua tub sab. Yog lwm tus mas ntshai lawv yuav ua raws li txoj cai qhia vim lawv ua li ntawd, lawv thiaj tau lub npe tias tus neeg ncaj. Tab sis Yos Xes tsis ua li ntawd, nws xaiv ua qhov ncaj raws li Tswv Ntuj nyiam.
Qhov no thiaj yog ib yam ntxiv uas peb yuav kawm ntawm Leej Ntshiab Yos Xes; tus neeg ncaj yog tus ua ncaj nyob ntawm Tswv Ntuj xub ntiag tsis yog ua ncaj nyob ntawm neeg xub ntiag.
Kwv tij Hmoob, hnub no peb hwm Leej Ntshiab Yos Xes ua Mab Liab tus txiv, mas peb yuav vam txog Leej Ntshiab Yos Xes pab thov Ntuj rau peb; kom peb txawj tso siab rau Tswv Ntuj siv peb ua Tswv Ntuj cov hauj lwm, thiab kom peb ua tau tus neeg ncaj nyob ntawm Tswv Ntuj xub ntiag yam li Leej Ntshiab Yos Xes tus neeg ncaj.
Nyob zoo sawv daws.
