ZAJ NYEEM HNUB TIM 20 LUB 6 HLI 2025
HNUB RAU, LIS PIAM 11 CAIJ NYOB NRUAB XYOO
COV LUS NYOB HAUV MAS TAIS NTAWV MOO ZOO (MT 6: 19-23)
Huab Tais Yes Xus hais tias “Koj txhab cuab tam nyob qhov twg, mas koj lub siab yuav nyob qhov ntawd. Yog koj lub qhov muag huv, mas tas koj lub cev pom kev nrig; yog qhov pom kev uas nyob hauv koj twb tsaus nti, ces qhov tsaus ntuj nyob txawm hauv koj.”
Kwv tij, yog peb xav ntsoov txog dab tsi, mas peb lub tswv yim yuav dai rau yam ntawd, xws li peb pom tias niaj hnub no peb tej me tub me nyuam thaum lawv xyeej kiag, mas lawv tuav hlo xov tooj, lawv zaum kov xov tooj, ib hnub hnub tsis ua dab tsi, vim lawv muab lawv lub siab dai rau tej yam lom zem nyob hauv lub xov tooj.
Thaum peb lub tswv yim xav txog qhov zoo, mas peb lub siab yuav kaj. Thaum peb lub tswv yim xib rau qhov phem, mas peb lub siab kuj yuav tsaus.
Peb pom tias ib tug neeg twg yog nws muab siab dai ncuv rau ib yam dab tsi mas nws yuav tsis quav ntsej txog lwm yam, nws yuav muab tas nws lub sij hawm rau yam ntawd.
Li ntawd, Huab Tais Yes Xus thiaj xav kom peb xav txog tej yam tuaj saum ntuj tuaj, mas peb lub siab thiaj yuav nyob ze Tswv Ntuj, ces Huab Tais Yes Xus hais ntxiv tias “Nej txhob sau tej cuab tam nyob ntiaj teb no, lub txhab cuab tam nej yuav sau mas tsum yog lub txhab cuab tam nyob saum ntuj.”
Lub txhab cuab tam nyob ntiaj teb no yog nyiaj txiag, kev nplua nuj, suab npe, txhua yam raws li ntiaj teb zaj tswv yim; yam li kev pleev, kev lom zem, kev cuav. Huab Tais Yes Xus ntuas kom peb txhob muab lub siab lub sij hawm dai ncuv rau cov txhab cuab tam no, vim muaj ib hnub tej no yuav ploj mus, peb yuav coj nrog peb mus rau lub neej tiam tom ntej tsis tau.
Lub txhab cuab tam saum ntuj yog kev tsim koob tsim hmoov, kev ua raws Tswv Ntuj lub tswv yim; yam li kev sib nyiam sib hlub, kev tswj tus kheej kom ntshiab. Peb yuav muab lub siab dai ncuv rau kev nrhiav Tswv Ntuj, nrog Tswv Ntuj tham thiab mloog Tswv Ntuj lub suab hais qhia rau peb. Qhov ntawd, yog kev ntseeg txog Yes Xus.
Lub qhov muag ua rau lub cev pom kev, kev ntseeg kuj ua rau lub siab pom kev. Thaum peb lub siab pom kev lawm, peb thiaj yuav nyob kaj lug. Thiaj hais tias kev ntseeg yog lub cuab tam nyob saum ntuj.
Huab Tais Yes Xus hais tias lub txhab cuab tam nyob ntiaj teb muaj kab rws kab lia txo thiab muaj tub sab thov qhov tsev tuaj nyiag cov cuab tam mus tau. Zoo ib yam li tej kev lom zem, kev deev siab uas tsheej xeeb tuaj rau peb lub siab ib pliag xwb ces twb yuav yaj mus. Tej ntawd pab tau peb me ntsis xwb yuav ua kom peb zoo siab xyiv fab mus ib txhis tsis tau. Kawg yog lub cuab tam nyob saum ntuj xwb thiaj yuav nyob mus li. Li ntawd, nej kav tsij nrhiav lub tseem cuab tam nyob saum ntuj mog. Nyob zoo sawv daws.
