ZAJ NYEEM HNUB TIM 26 LUB 7 HLI 2025
HNUB NCO TXOG LEEJ NTSHIAB YOS AS KIS THIAB AS NAS
COV LUS NYOB HAUV MAS TAIS NTAWV MOO ZOO (MT 13: 16-17)
Kwv tij Hmoob sawv daws, hnub no peb yuav nco txog Leej Ntshiab Yos As Kis thiab Leej Ntshiab As Nas. Nkawd yog leej twg, tseem ceeb li cas, ua cas peb thiaj yuav tsum nco txog nkawd?
Leej Ntshiab Yos As Kis thiab Leej Ntshiab As Nas, nkawd yog Mab Liab niam thiab txiv, nkawd thiaj yog Huab Tais Yes Xus niam tais thiab yawm txiv.
Lub Koom Txoos pom tias Mab Liab ua ib tug neeg ntseeg zoo ntseeg ruaj, mas yeeb vim nws muaj niam thiab txiv ua tus qhia txog Tswv Ntuj rau nws, yog tus ntuas Mab Liab kom ua neej nyob hauv txoj kev ntseeg. Mab Liab muaj niam thiab txiv ua tus piv txwv rau nws yoog raws.
Ib yam li niaj hnub no peb pom tias peb ua zoo li cas mas yav tom ntej peb cov me nyuam yuav muaj tus yeeb yam thiab tus cwj pwm muaj ntsis zoo li peb. Yog peb ua neeg zoo txawj qhuab qhia me nyuam kom ua neeg zoo, mas lawv loj tuaj ua ib tug neeg zoo. Yog peb cov yog niam yog txiv niaj hnub sib cav sib ceg los sib ntaus, mas peb cov me nyuam loj tuaj lawv yuav ua neeg siab ceev tsis mloog leej twg hais.
Li ntawd, yog peb xav kom peb tej me nyuam ua ib tug neeg ntseeg zoo, mas peb kuj yuav ua tus neeg ntseeg zoo rau me nyuam pom thiab qhuab qhia lawv kom paub Tswv Ntuj.
Nyob hauv 4 phau Ntawv Moo Zoo lub Koom Txoos saib tias yog Tswv Ntuj tshoj kom neeg sau tseg cia; xws li Mas Tais Ntawv Moo Zoo, Mas Kos Ntawv Moo Zoo, Lus Kas Ntawv Moo Zoo, thiab Zam Ntawv Moo Zoo; thiab cov tsab ntawv hauv phau Ntawv Ntshiab, mas tsis muaj ib qhov tau hais txog Yos As Kis thiab As Nas.
Ob lub npe no yog cov ntseeg tiam tom qab tis rau. Lub npe ‘Yos As Kis’ txhais tias ‘Yas Ves txhim’, los yog ‘Huab Tais tsa sawv. Lub npe ‘As Nas’ yog txhais tias ‘txiaj ntsim’ los yog ‘ntxim siab’.
Hais txog zaj kwv huam piav txog Yos As Kis thiab As Nas, mas yog nyob hauv phau ntawv teeb tseg cia thaum tiam 2 thiab ib phau cov ntseeg tau teeb nyob hauv tiam 3; yog phau ntawv ‘Yas Kos Ntawv Moo Zoo’ thiab phau ntawv ‘Lub Moo Zoo hais txog Mab Liab yug los’.
Zaj kwv huam piav tias Yog As Kis yog Das Vis caj ces nyob hauv lub zos Nas Xas Les, Nkas Lis Lais teb. Thaum Yos As Kis yuav As Nas lawm, nkawd tsiv los nyob hauv Yes Lus Xas Les.
Yos As Kis yog neeg nplua nuj thiab muaj lub siab ncaj, nws nyiam pab cov tsev txoos thiab cov neeg txom nyem. Yos As Kis thiab As Nas nkawd tsis muaj me nyuam ces cov leej choj thiaj tsis kam txais nkawd cov txim txi Ntuj vim cov Yus Das ib txwm ntseeg tias cov neeg tsis muaj tub muaj ki mas yog Tswv Ntuj tsis nyiam lawv. Yos As Kis tu siab rau nkawd txoj hmoov phem, nws mus yoo mov thov Ntuj nyob teb chaws suab puam tau 40 hnub ces ib tug Tshiab tawm los hais rau Yos As Kis tias Tswv Ntuj yuav pub ib tug me ntxhais rau nkawd.
Yos As Kis rov los txog tsev, nws hais qhia rau As Nas ces As Nas cog lus rau Tswv Ntuj tias nws yuav muab tus me ntxhais txi rau Tswv Ntuj ua Tswv Ntuj tus ntxhais txib. Tsis ntev As Nas txawm yug tau ib tug me ntxhais tiag. Nkawd tis npe rau tus me nyuam hu ua ‘Mab Liab’ txhais tias ‘tus puv txiaj ntsim’.
Thaum Mab Liab muaj 3 xyoos, nkawd thiaj muab Mab Liab qee ua Tswv Ntuj tus ntxhais txib, nyob hauv lub Tuam Tsev Teev Ntuj.
Kwv tij, nyob hauv zaj kwv huam no, peb yuav pom tias Yos As Kis thiab As Nas, nkawd nyiam Tswv Ntuj thiab hlub zeej tsoom, nkawd pheej xeeb rau Tswv Ntuj thiab nco ntsoov Tswv Ntuj lub txiaj ntsim, nkawd thiaj muab nkawd tib tug ntxhais rov cev rau Tswv Ntuj. Yog li mas lub Koom Txoos thiaj cav txog nkawd tias yog ‘yawg koob pog koob hauv lub Koom Txoos’. Ces peb yuav cav txog nkawd lub moo xws li Npes Xis Las tau cav txog cov yawg koob tias “Peb yuav cav txog peb cov yawg koob. Sawv daws tsis hnov qab lawv tej hauj lwm ncaj. Lawv tej xeeb ntxwv yog zoo li ib lub cuab tam zoo nyob mus li, lawv lub koob meej yuav tsis ploj, lawv lub cev mus zwm av nyob hauv kev thaj yeeb, lawv lub npe yuav ciaj mus txheej dhau txheej. Cov haiv neeg yuav cav lawv kev thoob tsib, lub txoos yuav tshaj lus zoo txog lawv.”
Kwv tij, hais txog lub Moo Zoo hauv hnub no mas yog Huab Tais Yes Xus lo lus hais rau cov thwj tim luv luv li no tias “Hos nej, mas nej qhov muag tau txoj hmoov zoo, vim nej qhov muag pom kev. Nej pob ntseg tau txoj hmoov zoo, vej nej pob ntseg hnov lus. Kuv hais tseeb rau nej, cov Yaj Saub thiab cov neeg siab ncaj thaud coob leej ntshaw pom yam uas nej pom, tab sis lawv tsis tau pom; ntshaw hnov yam uas nej hnov tab sis lawv tsis tau hnov.”
Kwv tij, Tswv Ntuj npaj nws txoj hauj lwm cawm ntiaj teb neeg puag txheej thaud los, thiab txoj hauj lwm no los tsheej xeeb rau Huab Tais Yes Xus tiam neeg. Li ntawd, Huab Tais Yes Xus thiaj hais tias cov koom lub caij nrog Huab Tais Yes Xus, mas lawv txoj hmoov zoo. Lawv pom Tswv Ntuj kev cawm neeg thiab hnov Tswv Ntuj Lo Lus pub txoj sia. Niaj hnub no peb kuj tau txoj hmoov zoo, vim peb pom Huab Tais Yes Xus uas yog txoj kev cawm nyob hauv cov neeg txom nyem nyob ncig peb, thiab peb tau hnov Tswv Ntuj Lo Lus nyob hauv Ntawv Ntshiab. Tab sis peb yuav tau txoj hmoov zoo tshaj no yog tias peb nyiam cov neeg txom nyem thiab peb ua raws li Tswv Ntuj Lo Lus peb tau hnov tau nyeem.
