Hnub tim 8 lub 4 hlis 2025.
Lis piam 5, hauv lub Caij Plaub Caug.
Hauv ntawv Xam Phaj, cov His Xas Lais peb tag kev cia siab thiab lawv yws yws rau Tswv Ntuj. Thaum txhua yam tshwm sim tsis mus raws li lawv siab xav. Hauv Ntawv Ntshiab, cov His Xas Lais tsis nkag siab txog Yes Xus, nws yog qhov txaus khuv leej kawg. Vim peb leej tib neeg tsis tuaj yeem nkag siab txog Tswv Ntuj tiag tiag. Nyob hauv peb lub neej, thaum txhua yam tsis mus raws peb siab xav. Peb lub siab kheev kheev tsis pom txog Tswv Ntuj txoj kev nyiam kev hlub, thiab pib tag kev cia siab. Peb tsis xav teev Ntuj thiab tig mus thov mus vam txog lwm yam.
Lub sij hawm zoo li ntawd, thov koj txiav txim siab thiab tsa taub hau mus saib Yes Xus uas raug ntsia nyob saum Ntoo Cuam. Daim duab uas dai nyob hauv kem tsev, los yog txawb nyob saum lub thaj teev Ntuj hauv tsev, los yog tso nyob saum lub rooj hauv pem kem tsev. Saib Yes Xus raug ntsia nyob saum Ntoo Cuam, ces peb yuav pom tias muaj dab tsi tshwm sim nyob hauv peb lub siab.
